Read Te B'aib'ara Warekaia Iteraera 11 Bible Online

Warekaia Iteraera 11 - Te B'aib'ara bible

Warekaia Iteraera 11

¹Ao n te bong teuana, ao a ngurengure Iteraera i bukin aia kangaanga. Ao E ongo te UEA ngurengureia, ao E rangi n un iai, ao E kamaunai taian auti n rianna ake i mataniwiin te maeka ni katobibia n te ai.

²Ao ngke a butiia aomata Moote, ao e tataro Moote, ao e mate te ai arei.

³Ao e arana te tabo arei b'a “Te Bue.” [24] i bukina ngke E un te UEA, ao E kaurarakea aia maeka.

⁴Ao n te tai teuana, ao a taonaki n te baki tabeman iruwa ake a maeka i buakoia Iteraera, ao bon Iteraera naba a tang ao a kaangai, “Ai bon akea tannara!

⁵A bon toki nanora n tannaira n te ika i Aikubita, ao iai naba taian kukamb'a, meron, anian, ao taiani kaariki.

⁶Ma ti a mate ni baki ikai, ao ti karara ae kona n reke bon ti te maana.”

⁷Ti te bo te maana ma taian ati aika mainaina

⁸ao ti te bo kanakina ma te b'ai ae umunaki ma b'aan te oriwa ae karewe. E kakaoti n te bong ma te aoi.

⁹Ao a rikoi kanaia te maana aomata n te ingabong, ao a kamantia ni karikia ni buraawa, ao a kaburoa ao a karaoia b'a taian buraibaan aika mmani.

¹⁰Ao a teibabaa Iteraera i rarikin nako aia auti n rianna ni ngurengure. Ao e ongo Moote ngurengureia, ao e b'ara nanona b'a a manga kauna naba te UEA.

¹¹Ao e tataro Moote: Bon Am toro ngai te UEA, ao e aera ngkai Ko a manga karaoa aei nako iu? Tera ae I a tia ni karaoia ngkai e a manga riki aei? Ko bon anganai tib'angau te kaawakiniia aomata aikai,

¹²ao bon tiaki natiu. Ko tuangai b'a N na tabeakiniia, ma ni kairiia nakon te aba are Ko berita iai nakoia aia bakatibu.

¹³A rangi ni kaberoroa te aba i bukin tangiran tannaia, ma n nang karekea ia tannaia?

¹⁴E rangi ni matoatoa te tib'anga aei nako iu. N nang kanga n tabeakiniia aomata aikai ni kabane n ti ngai?

¹⁵Ngkana arom aei nako iu, ao e raoiroi riki ngkana Ko tiringai ngkai b'a e aonga n toki rawawatau!

¹⁶Ao E taku te UEA nakoni Moote: “Rineia 70 taani kairiri mai buakoia Iteraera, ao kairiia nakon te Um'antabunrianna

¹⁷N na anganiia m'aakam teutana ngkana I maroroo ma ngkoe ikekei, b'a aonga ni kona n tararuaia naba aomata ma ngkoe. Ko nang aki manga tararuaia aomata n ti rab'atam.

¹⁸Ko na tuangiia Iteraera b'a I a tia n ongo ngurengureia i bukin akean tannaia, ao i bukina naba ngke a bon totoki nanoia ni baika a tangiri i Aikubita. Ma ngaia aei, ko na tuangiia b'a a na tabuia b'a N nang karokoa tannaia nakon te ingabong.

¹⁹A nang bon tannaia ni katoa bong-tiaki tii i bukin te bongina ke uabong, ke nimabong, ke 10 ke 20 te bong, ma i nanon teuana te nam'akaina.

²⁰A ngurengure nako iu, ao a tangiria n okira Aikubita. Ao ngkai a nang kang iriko ni karokoa marakin birotoia.

²¹Ao e taku Moote, “Tao e kaaniia 6,000 mm'aane aika ikawai ikai, ao Ko na kanga n taku b'a a kona ni karekei tannaia ma aia utu i nanon teuana te nam'akaina?

²²B'a ngkana tao ti a tiringiia ara tiibu ma ara kao b'a tannaia, ke tao ti kabanea ikan taari n anaia b'a tannaia, ao a na bon aki ngae naba iai.”

²³Ao E taku te UEA, “I kona ni karaoi b'aai ni kabane! Ko na nooria b'a a na koro bukin Au taeka ni kabane.”

²⁴Ao e tuangiia aomata Moote b'aai ake E taekin te UEA. Ao e rineia 70 taani kairiri, ao e kairiia nakon Ana Um'antabunrianna te UEA ma ngaiia. A tei ni katobibia te Um'antabunrianna taani kairiri akekei, ao Moote, e rinnako nanon te Um'antabunrianna.

²⁵Ao ngke E taetae te UEA ma ngaia, ao te UEA, E anaa te m'aaka teutana [25] mairoun Moote, ao E anganiia taani kairiri ake 70. Ao ngke a niniaki n te Tamnei, ao a takaarua n ai aroia burabeti. Ma bon ti aei te tai are a karaoa iai te aro aei.

²⁶Ao a aki roko n te Um'antabunrianna taani kairiri ake uoman ake Eretata, ao Metata. Ao ngke a niniaki n te Tamnei, ao a takaarua i nukan te maeka arei n ai aroia burabeti.

²⁷Ao e biri te ataeinimm'aane temanna ni kaongoa Moote taekaia Eretata, ao Metata.

²⁸Ao e mena Iotua [26] i rarikini Moote n aron are e boni kakaraoia ma ngke te ataeinimm'aane ngaia. Ao e taku nakoni Moote, “Teuae ko karineaki, Ko riai ni katokiia!”

²⁹Ma e taku Moote nako ina, “Ko ira taangau? I tangiria riki b'a E na anga Tamneina te UEA nako ia aomata nako, b'a a aonga n riki ni burabeti aomata ni kabane.”

³⁰Ao i mwiin arei, ao a nako Moote ma taani kairiri ake 70 n okira te maeka.

³¹Tabeua te tai i mwiina, ao E a karokoa te ang ae korakora te UEA are a uki taiani kuere mai taari ni karokoa ae onrake aia maeka Iteraera n te mannikiba ni katobibia. A uataorake, e kaaniia teuana te miita rietaatana, ao tabeua te kiromiita raababan te tabo are kaonna n taabo nako.

³²Ao a rikoi taiani kuere aomata i nanon uabong-e kaaniia teuana te tan rawawatan konan temanna. Ao i mwiina, a karaua ni kamaaea n taawaia.

³³Ma i m'aain are e kona ni kanaki, ao E un te UEA i rouia, ao E karokoa te aoraki nakon te maeka.

³⁴Ao ngke a tia n taunaki rab'ataia koraki ake a rangi n nanonrang n te kuere, ao a arana te tabo arei b'a “Ruanimateia Nanonrang.”[27]

³⁵Ao i mwiina, a kab'arai aia auti n rianna Iteraera, ao a m'ananga nako Aterota.