Read Te B'aib'ara Warekaia Iteraera 12 Bible Online

Warekaia Iteraera 12 - Te B'aib'ara bible

Warekaia Iteraera 12

¹E ngae ngke bon te aomata ae rangi n nanorinano Moote nakoia aomata ni kabane n te aonnaba, Miriam ma Aaron a moanna ni ngurengureakinna,

²“Bon akea riaina b'a e na iein Moote ma ainen Itiobia arei![28]

³B'a kaanga ai bon antai ngaia n ana iango? E bon tataetae naba te UEA nako ira tiaki tii ngaia.” E bon ongo te UEA ngurengureia

⁴ao E tuanga Moote, Aaron, ao Miriam b'a a na nako mataroan te Um'antabunrianna.

⁵Ao E kaoti te UEA n te nang ao E tuanga Aaron ma Miriam b'a a na kaaniia riki.

⁶Ao ngke a tia n tuangiia b'a a na kakauongo raoi, ao E taku: “Bon te UEA Ngai, ae taetae nakoia burabeti n taiani kaotioti ma taiani mii.

⁷Ma Moote bon Au tia m'akuri ae te tia kairiia Au aomata.

⁸E norai, ao n i taramata ma ngai, ao b'aai ni kabane ake I tuangnga a teretere raoi. Ao bon akea riaimi ni ngureakina Au tia m'akuri ae Moote.”

⁹Ao E un te UEA irouia Aaron ma Miriam, ao ngke e a kitaniia

¹⁰ao e mauna nako te nang mai aon te Um'antabunrianna, kunin Miriam e bitaki ni mainaina man rebera.[29] Ao ngke e noora te b'ai ae riki nakon kunin neirei Aaron,

¹¹ao e taku nakoni Moote, “Teuae ko karineaki, taiaoka, ko na aki katuaaira n ara m'akuri n nanobaba aikai.

¹²Ko na aki kakuonakoa kunin Nei Miriam n ai aron te ataei ae e a bung naba ni mate!”

¹³Ao e tataro Moote ni kaangai, “Te UEA ae te Atua, taiaoka kamaiua neiei.”

¹⁴Ma E taku te UEA, “E na tiku n rawawata Nei Miriam i nanon itiua te bong ngkana e a tia tamana ni katuaaea ni baawarea matana. Ma ngaia ae, ko na katikua i tinanikun te maeka i nanon itiua te bong, i m'aain okina.”

¹⁵Ao E aki roko n te kam'ainga aia maeka Iteraera te UEA ni karokoa okin Miriam i mwiin itiua te bong.

¹⁶Ao i mwiina, a kiitana Aterota, ao a manga katea aia maeka n Rereuan B'aran.