Read Te B'aib'ara Warekaia Iteraera 2 Bible Online

Warekaia Iteraera 2 - Te B'aib'ara bible

Warekaia Iteraera 2

¹Ao e tuangiia Moote ma Aaron te UEA

²aron katean aia auti n rianna: A na riai ni katei aia auti n rianna barongan Iteraera i aan aia buraeki, ao i aan naba buraekin aia utu nako. A na karauaki ni kateaki raoi aia maeka ni katobibia te Um'antabunrianna, ma a na aki rangi ni kaaniaki ma te Um'antabunrianna.

³E na katei auti n rianna te baronga are Iuta, ma baronga ake a m'aati ma ngaiia i mainikun te Um'antabunrianna, i aan aia buraeki.

⁴A na baaireaki ana taanga ni buaka te baronga are Iuta are 74,000 m'aitiia kaaina nakon m'akoroia, ao a na kairaki iroun Nation are natin Amminataba.

⁵E na mena te baronga ae Itakara n iteran te baronga are Iuta teuana,

⁶ao a na kairaki aia taanga ni buaka are 54,400 m'aitiia kaaina iroun Netanera are natin Tua.

⁷Ao te baronga are Teburun n te itera are teuana,

⁸ao a na kairaki aia taanga ni buaka are 57,400 m'aitiia kaaina iroun Eriaba are natin Eron.

⁹Taanga ni buaka aikai aika 186,400 m'aitiia kaaina, ake a na rimoa ni kaira te buaka.

¹⁰Ao e na katei auti n rianna te baronga are Reuben, i maiakin te Um'antabunrianna i aan aia buraeki, n reitaki naba ma baronga ake a m'aati ma ngaiia.

¹¹A na taanga ni buaka te baronga are Reuben are 46,500 m'aitiia kaaina, a na baaireaki nakoni m'akoroia, ao a na kairaki iroun Eritua are natin Teteura.

¹²A na mena kaain te baronga are Timeon n iteran te baronga are Reuben teuana,

¹³ao a na kairaki aia taanga ni buaka are 39,300 m'aitiia kaaina iroun Terumiera are natin Turitiatai.

¹⁴Ao te baronga are Kata n te itera are teuana,

¹⁵ao a na kairaki aia taanga ni buaka are 45,650 m'aitiia kaaina iroun Eriataba are natin Teuera.

¹⁶Taanga ni buaka aikai aika 151,450 m'aitiia kaaina bon te kaua taanga ni m'aati nakon te buaka.

¹⁷A na m'aati te baronga are Rewi i akuun te baronga are Reuben. A na m'aati n aia m'akoro nako ni bon aron naba baaireaia n aia auti n rianna. A na uouota te Um'antabunrianna, ao aia buraeki.

¹⁸Ao te baronga are Eberaim, e na katei auti n rianna i maeaon te Um'antabunrianna i aan aia buraeki n ikotaki ma baronga ake a m'aati ma ngaiia.

¹⁹A na baaireia raoi ana taanga ni buaka te baronga are Eberaim are 40,500 m'aitiia kaaina nakoni m'akoroia, ao a na kairaki iroun Eritiama are natin Ammiuta.

²⁰E na mena te baronga are Manate n iteran te baronga are Eberaim teuana,

²¹ao a na kairaki ana taanga ni buaka are 32,200 m'aitiia kaaina iroun Kamariera are natin Betatura.

²²Ao te baronga are Beniamin n te itera are teuana,

²³ao a na kairaki ana taanga ni buaka are 34,400 m'aitiia kaaina iroun Abitan are natin Kiteoni.

²⁴Taanga ni buaka aikai aika 108,100 m'aitiia kaaina, boni ngaiia ake te katenikoraki ni m'aati nakon te buaka.

²⁵Ao e na katei auti n rianna te baronga are Taan ma baronga ake a m'aati ma ngaiia, i meangin te Um'antabunrianna, i aan aia buraeki.

²⁶A na baaireaki raoi ana taanga ni buaka te baronga are Taan are 62,700 m'aitiia kaaina nakoni m'akoroia, ao a na kairaki iroun Aietera are natin Ammitiatai.

²⁷E na mena te baronga are Atera n iteran Taan are teuana,

²⁸ao a na kairaki ana taanga ni buaka are 41,500 m'aitiia kaaina iroun Bakiera are natin Okeran.

²⁹Ao e na mena te baronga are Nabetari n te itera are teuana,

³⁰ao a na kairaki ana taanga ni buaka are 53,400 m'aitiia kaaina iroun Aira are natin Eran.

³¹Aikai taanga ni buaka aika 157,600 m'aitiia kaaina ake a na kabanea ni m'aati nakon te buaka.

³²Ma ngaia are, a bane ni warekaki Iteraera ake n taian auti n rianna ni kaineti ma aia utu. A baaireaki aia taanga ni buaka nakon m'akoroia nako, ao bootaia bon 603,550.

³³Bon ti te baronga are Rewi ae aki warekaki n aron are E a tia ni mwiokoa iai Moote te UEA.

³⁴A karaoi b'aai ni kabane Iteraera ake E a tia te UEA n tuanga Moote. A baairei raoi aia maeka ni kaineti ma aia kaainga ma aia utu, ao aia baronga nako, i aan aia buraeki. Ao bon anne te babaaire are a m'aati iai nakon te buaka.