Read Te B'aib'ara Warekaia Iteraera 20 Bible Online

Warekaia Iteraera 20 - Te B'aib'ara bible

Warekaia Iteraera 20

¹Ao a roko Iteraera n te Rereua are Tin n te moan nam'akaina, [50] ao a katea aia maeka i rarikin te kaawa are Kateti. Bon arei te tabo are e mate iai Nei Miriam, ao e taunaki naba iai.

²Ao e a bane aia ran Iteraera, ma ngaia are, a nakoni Moote ma Aaron,

³ao a ngurengure, ao a taku, “Tao e bon raoiroi riki ngke ti a kamani mate ma koraki akekei i matan ana Um'antabunrianna te UEA.[51]

⁴Ko kairiira nakon te Rereua aei, ao ngkai ae ti nang mate ma ara nanai ni man!

⁵E raoiroi riki Aikubita nakon te tabo ae buakaka aei. Kai a bon reke naba karara uita, biiku, kureebe, ao bamkuranete [52] ikekei, ma ngkai, ngaia e aki reke naba te ran teutana.”

⁶Ao e nako Moote ma Aaron nako matan te Um'antabunrianna, ao a bobaraaki. Ao E kaoti te UEA nako ia ma mimitongina ae moan te korakora,

⁷ao E taku, “Anaa okom [53] Moote. Ao i mwiina, kam na weteia Iteraera ni botiia ngkoe ma Aaron,

⁸ao tuanga te b'a anne b'a e na anganiko te ran. Ao anne arom ni karekea te ran nako ia Iteraera ma aia nanai ni man.”

⁹Ao e ongotaeka Moote, ao e anaa okona man te Um'antabunrianna.

¹⁰Ao ngke e a tia Moote ma Aaron ni botiia aomata ni katobibia te b'aa, ao e taku, “Nooria, bon aomata ngkami aika taani kamangao. Ao kam nang noora ngkai te ran ae na tiinako man te b'aa aei!”

¹¹Ao e tabeka okona i eta, ao e orea te b'aa uoua te tai, ao e a rina naba n tiinako te ran man te b'aa, ao e a reke nimaia aomata ma aia nanai ni man.

¹²Ao E taku te UEA nakoni Moote ma Aaron, “A aki kubarai aomata i bukina ngke ko aki onimakina m'aakau. Ma ngaia are, Tiaki ngkoe, ae ko na kairiia aomata nakon te aba are I a tia ni berita iai b'a N na anganingkami.”

¹³A tia ni ngurengure aomata nakon te UEA, ao E a tia ni kaota m'aakana ae tabu ngke E anganiia nimaia te ran. Ma ngaia are, a arana te tabo arei b'a Merib'a are nanona “Ngurengure.”

¹⁴Ao e kanakoa ana tia uarongorongo Moote man aia tabo are a katei maeka iai i rarikin Kateti, ma ana rongorongo nakon uean Etom. Ao a kaangai, “Bon Iteraera ngaira aika bon ami koraki ni koaua. Ao ti kakoaua b'a ko a bon tia n ongo rongorongon b'aai aika buakaka ake a riki nako ira.

¹⁵A maeka ngkoa ara bakatibu i Aikubita, ao a maeka ikekei n te tai ae maan. Ma i mwiin te tai ae maan, ao a karaoa te m'akuri ae aki raoiroi nakoira kaain Aikubita.

¹⁶Ao ngke ti bubutiia te UEA buokara, ao E kaeka ara tataro, ao E kaotinakoira man te aba arei. Ngkai ae ti katei auti n rianna n tian abam i rarikin te kaawa are Kateti.

¹⁷Taiaoka, kariaia b'a ti na toua nanon abam. Ti na bon kararoaira ma ami katawanang, ma ami nne ni kureebe, ao ti na bon aki mooi naba man ami m'anib'a. Ti a bon nakonako naba i nanon te kawai [54] ni karokoa ti kitana raoi abami.”

¹⁸Ma e taku uean Etom, “Kam na aki. I aki kariaia b'a kam ma toua nanon abau! Ao ti na bon buakaningkami ngkana kam ri nanona.”

¹⁹Ao e manga kaoka te rongorongo Moote ao e taku, “Ti boni berita b'a ti na bon ti nakonako i nanon te kawai, ao ngkana tao iai mai roura, ke ara nanai ni man ae nima ami ran, ao ti na manga kabooa mwiina. Akea riki te b'ai ae ti tangiria b'a ti na ti ri nanon abami.”

²⁰Ao e kanakoa ana taeka te uea ao e taku, “Kam na bon aki ri nanon abara!” Ao i mwiina, e a kanakoa ana taanga ni buaka ae te kabanea ni matoatoa Etom

²¹b'a a na totokoia Iteraera ngkana a ri nanon abaia. Ma ngaia are, a riai Iteraera n toua te kawai teaina.

²²Ao i mwiina, ngke a tia ni kiitana Kateti Iteraera ao n roko n te Maunga are Ora

²³are n tian abaia kaain Etom, ao E taku te UEA,

²⁴“Aaron, bon aei te tabo ae ko na mate iai. Ko a tia n aki ongotaeka i Rou ngkoe ma Moote i Merib'a, ma ngaia are, kam na aki roko n te aba are I a tia ni berita iai nakoia Iteraera.

²⁵Moote, naako ma Aaron, ao natina te mm'aane are Ereata nako taubukin te maunga.

²⁶Ao i mwiina, anaa niiniiran Aaron n ibonga ao ni katoka i aon Ereata. Ao e na mate Aaron ikekei.

²⁷Ao e ongotaeka Moote, ao a bane ni mataku aomata ngke e tam'arake ma Aaron, ao Ereata nako taubukin te maunga are Ora.

²⁸Ao e anaa te niiniira n ibonga mairoun Aaron, ao e katoka i aon Ereata, ao e mate Aaron ikekei. Ao ngke e ruorikaaki Moote ma Ereata,

²⁹ao a ataia aomata ae a tia ni mate Aaron, ao a tang i bukina i nanon 30 te bong.