Read Te B'aib'ara Warekaia Iteraera 21 Bible Online

Warekaia Iteraera 21 - Te B'aib'ara bible

Warekaia Iteraera 21

¹Ao e maeka uean Arata are kaain Kanaan n Rereuan Kanaan are mai Maiaki, ao ngke e ongo b'a i aon kawaia Iteraera n roko nakon ana kaawa are Atarim, ao e buakaniia ao e kataenikaia tabeman mai iai.

²Ao a tataro Iteraera ao a taku, “Ara UEA, ngkana Ko bon buokiira ni kataenikaiia kaain Kanaan, ao ti na bon kamaunai aia kaawa ma kanoana ni kabane, ni kaotia b'a bon Am b'ai ngaiia.” [55]

³Ao E kaekai aia tataro te UEA ao E buokiia ni kamateia ni kabane tautian Kanaan, ma ni kamaunai aia kaawa ni kabane. Ao bon anne bukina are e aranaki iai te kaawa teuana ikekei b'a Oma are nanona “Te Tabo ae Kamaunaaki.”

⁴Ao a m'ananga Iteraera ri tinanikun te aba are Etom, ma ngaia are, ngke a kitana te Maunga are Ora, ao a m'ananga ni kaineta Taari are Uraura. [56] Ma a aki kona n taotaon nanoia aomata ngke a tabe ni m'ananga,

⁵ao a ngurengure nakon te Atua, ao a taku nakon Moote, “Ko bon kaotinakoira mai Aikubita b'a ko na tiringiira n te rereua? Bon akea te ran ikai, ao a aikoa rin am'arake aika buakaka aikai!”

⁶Ao E kanakoia naeta aika a rangi ni boitin te UEA ao a tenaia aomata, ao a m'aiti ake a mate iai.

⁷Ao a nakon Moote tabeman aomata, ao a taku, “E boni bure arora ngke ti ekiko nako ma te UEA. Ma ti a butiiko b'a ko na bubutiia b'a E na kanakoia naeta aikai.” Ao e tataro Moote,

⁸ao E kaeka ana tataro te UEA ao E taku, “Karaoa te naeta man te buraonti, ao kanimm'a i aon tabon te kai. A na tara te naeta anne aomata akana tenaaki n te naeta, ao ane a na aki mate.”

⁹Ao e ongotaeka Moote iroun te UEA. Ao a bane ni maiu aomata ni kabane ake a tara te naeta are karaoaki man te buraonti, e ngae ngke a tia n tenaaki n te naeta are rangi ni boitin.

¹⁰Ao ngke a reitanako m'anangaia Iteraera nako Kanaan, ao a katei maeka i Obota,

¹¹ao i mwiina, a manga katei maeka i Iie-abarim n te rereua are i mainikun Moaba,

¹²i mwiina, i Tereta.

¹³Ao i mwiin anne, a manga ri nanon te Karaanga are Arenon, ao a manga katei maeka n rereuan Moaba are tian abaia kaain Amora. Te Arenon bon te tia i marenaia kaain Moaba ma Amora.

¹⁴E taekinaki n te anene are n Bokin Ana buaka te UEA [57] kaawan Waeba ma karaangan ranna aika uarereke n te aba are Tuba (Tuba). E taekinaki naba iai te Karaanga are Arenon,

¹⁵ma taiani m'arua are wene i aon tian abaia kaain Moaba, ma n roota te kaawa ae Are.

¹⁶Ao a waakinako Iteraera man te Arenon nakon te m'anib'a are i rarikin te kaawa are Beere, ike E taetae iai te UEA ngkoa nakoni Moote ni kaangai, “Ikotiia aomata, ao N na anganiia nimaia te ran.”

¹⁷Bon anne naba te tabo are a anenea iai te kuna aei Iteraera: Ti na karaoa ara botaki ni kukurei! E a tia te m'anib'a aei n anganiira te ran.

¹⁸A tia taani kairiri ni kotea te tabo ike ti na kena iai te m'anib'a n tabon aia kainuea. A kiitana te rereua Iteraera, ao a katei maeka i rarikin te kaawa are Matana,

¹⁹ao i mwiina, a manga katei maeka i Naariera, ao i mwiina Bamota.

²⁰Ao n tokina, a roko n aban Moaba, ike a manga katei maeka i rarikin te Maunga are Bitika [58] n te m'arua are kaaitaraa te rereua are i meangin Taari are Mate.

²¹Ao a kanakoa te rongorongo aei Iteraera nakon uean Amora are Taion:

²²Ti butiiko b'a ko na kariaia b'a ti na ri nanon abam, ti berita b'a ti na bon kararoaira man ami katawanang ma ami nnenikureebe, ao ti na aki nima naba ranin ami m'anib'a. Ao ti na bon aki kitana nanon te kawai [59] ngkana ti roko i nanon abam.

²³Ma e rawa Taion ni kariaia b'a a na ri nanon abana Iteraera, ao e weteia ana taanga ni buaka, ao a m'ananga nakon te rereua ni buakaniia Iteraera i rarikin te kaawa are Iaati.

²⁴Ma a konaaki irouia Iteraera, ao a tauaki abaia kaain Amora man te Karaanga are Arenon ni karokoa meangin Iaboka are abaia kaain Ammon, ake a korakora riki nakoia Iteraera.

²⁵Ao a maeka Iteraera n aia kaawa kaain Amora, n reitaki naba ma kaawan te tautaeka are Etibon ma kaawa nako ake i rarikina.

²⁶E a tia n tautaekana Etibon te uea are Taion, i mwiin konaakiia kaain Moaba irouna, ma anaakin abaia are i meangin te Karaanga are Arenon.

²⁷Ao bon aei bukina are a otea iai te kuna aei kaain Amora: Nakomai manga katea Etibon. Kaawan ana tautaeka te uea are Taion!

²⁸A m'aati nakon te buaka ana taanganibuaka kaanga ai aron uran te ai, ma ni kabuoka te kaawa are Are, ma ni kamaunai [60] taian tabuki ake i rarikin te karaanga are Arenon.

²⁹Ai kaawara ngkami kaain Moaba! E boni manga tewenakoingkami atuami are Kemoti, a na tauaki b'a taenikai, ma ni uotaki nako iroun te uea are Taion are kaain Amora.

³⁰Ti kataenikaia raoi Moaba. Kaawa aika Etibon ma Ribon, ao Nob'a (Nob'a) ma Meteb'a kam a urubekebeke ma ni mauna nako. [61]

³¹Ao ngke a tia ni maeka Iteraera n aban nako Amora

³²ao Moote, e kanakoia tabeman mm'aane b'a a na tuoa te aba are Iatera. I mwina, ao a taui taiani kaawa akekei Iteraera; a katobibia, ao a kanakoia kaaina ake a maeka iai.

³³Ao a manga m'ananga nako Iteraera ni kaineta aonon Batian, are e tautaeka iai te uea are Oka. Ao e kairiia ana taanga ni buaka ni kabane Oka nako Eterei b'a a na butim'aia Iteraera ni buaka ma ngaiia.

³⁴Ao E taku te UEA nakoni Moote, “Ko na aki maaka Oka, N na buokiko b'a ko na konaa ma ana taanga ni buaka, n ai aron naba are ko karaoia nako te uea are Taion, are e tautaeka i Etibon. Ko na b'aina aban Oka.”

³⁵Ma ngaia are, a kamaunaa Oka Iteraera, ma ana utu, ma ana taanga ni buaka ni kabane. Bon akea nikiraia ni maiu. Ma ngaia are, a b'aina aban Batian Iteraera.