Read Te B'aib'ara Warekaia Iteraera 27 Bible Online

Warekaia Iteraera 27 - Te B'aib'ara bible

Warekaia Iteraera 27

¹Terobeata [89] bon kaain te baronga are Manate, ao boni iai natina aine aika niiman, aika Nei M'ara, Nei Nooa, Nei Okera, Nei Mireka, ao Nei Tireta.

²Ao a nakon te Um'antabunrianna natin Terobeata aikai n te tai teuana, ao a kaaitibo ma Moote, Ereata, ao tabeman taani kairiri irouia Iteraera, ao a kaaitibo naba ma aia bootaki Iteraera ae korakora, ao a taku aine aikai:

³Kam bon ataia b'a e mate tamara n te rereua. Ma e boni mate i bukin te b'ai teuana are e karaoia, ma tiaki i bukin raonakin Kora ngke e kamangao nakon te UEA. Bon akea natin tamara te mm'aane i mwiina

⁴are e na kateimatoa aran ana utu. Ma e aera ngkai e nang kamaunaaki arana i bukina ngkai akea natina te mm'aane? Kam na anganiira naba abara n ai aroia ara koraki tabem'aang i nanon ara kaainga, b'a e aonga n teimatoa ni maiu aran tamara.

⁵Ao e bubuti Moote nakon te UEA b'a tera ae na karaoia,

⁶ao E kaeka te UEA, ao E taku:

⁷A eti natin Terobeata aine. A bon riai n anganaki n tatabemaniia te m'akoro n aba are e riai n reke iroun tamaia ngke arona b'a e maiu.

⁸Tuangiia Iteraera ni kabane b'a ngkana e mate te mm'aane ao akea natina te mm'aane, ao a na b'aib'ai n abana natina aine.

⁹Ao ngkana akea natina aine, ao a nang b'aina abana tarina.

¹⁰Ma ngkana akea naba tarina, ao e na b'aina abana tarin tamana.

¹¹Ao ngkana akea naba tarin tamana, ao e na kanakoaki te aba nakoia ana koraki ni kaan i nanon ana kaainga. Bon aei Au tua, ao a riai n ira nanona Iteraera.

¹²Ao E taku te UEA nakoni Moote, “Ko na nako n tam'arakea te Maunga are Abarim n te bongi teuana, ao mai ikekei, ko na noora te aba are N na anganiia Iteraera.

¹³Ao i mwiin norana, ko na mate [90] n aron tarim are Aaron,

¹⁴i bukina b'a kam uaia n aki ongotaeka i Rou i Merib'a i rarikin te kaawa are Kateti n te Rereua are Tin. Kam aki onimakina M'aakau ae Tabu ngke a karaoa te b'ai ae aki raoiroi nako Iu aomata ikekei.” [91]

¹⁵Ao e kaeka Moote, ao e taku,

¹⁶“Bon te UEA Ngkoe ae te Atua, ao ko atai b'aai ni kabane ake i nanoia aomata. Ma ngaia are, I a butiiko b'a Ko na rinea te tia kairiri irouia Iteraera.

¹⁷A kainanoa te aomata temanna Iteraera are e na kairiia nakon te buaka, b'a a kaawa n riki b'a tiibu aika m'aninga nako b'a akea te tia kaawakiniia.”

¹⁸Ao E taku te UEA, “E kona ni karaoa te m'akuri anne Iotua are natin Nun. Katoka baim i aona ni kaotia b'a boni ngaia are e na onomwi.

¹⁹Ao naako ma ngaia n tei i matan Ereata are aia ibonga Iteraera. Ao n rinea Iotua b'a te tia kairiri ae boou,

²⁰ao tuangiia b'a a na riai ngkai n ongotaeka irouna, n ai aroia ngkoa n ongotaeka i roum.

²¹Ma e na riai Iotua ni mwiokoa Ereata i bukin kakaaean te b'ai ae I tangiria b'a e na karaoia [92] ngkana e na kairiia Iteraera nakon te buaka.”

²²Ao Moote, e karaoa nanon Ana kaetieti te UEA, ao e kaira Iotua nakon Ereata ma aomata,

²³ao e katoka baina i aon Iotua, ao e katabua b'a te tia kairiri irouia Iteraera.