Read Te B'aib'ara Warekaia Iteraera 34 Bible Online

Warekaia Iteraera 34 - Te B'aib'ara bible

Warekaia Iteraera 34

¹Ao te UEA, E tuanga Moote

²b'a e na tuangiia Iteraera aron abaia:

³E na riki Rereuan Tin ao m'akoron Etom are maeao meang b'a tian te aba mai maiaki. E na moa te tia aei mai tabon Taari are Mate mai maiaki.

⁴E na wairio mai ikekei, ma e na manga rairaki nako maiaki ni kaineta Kawain Akerabim Tikaobian i nanona, te kaawa ae uarereke are Tin, ao kaawan Kateti B'anea. Ao mai ikekei, e na manga waaki nako te tia nako Atia Ata ni karokoa Atimon.

⁵E na manga biri i mataniwiin te karaanga ae uarereke are i Aikubita, ao e na toki n Taari are Mereterenian.

⁶E na riki Taari are te Mereterenian b'a tiana mai maeao

⁷E na moanaki tiana mai meang man te Mereterenian, ao e na waaki nako ni waerake nakon te Maunga are Ora. [136]

⁸Ao i mwiin anne, e na manga biri nakon Rebo Amata, ao rinukan Tetata, are boni ngaia tokin abami mai meang.

⁹E na manga waaki nako te tia mai Tetata ni waerake nako Tiberon, ao e toki i Ata Enan.

¹⁰E na moa tiana mai Ata Enan are i meang, ao e na biri nakoaiaki nako Tebam,

¹¹ao ni manga biri rikaaki nako Ribera are i mainikun Ain. Ao mai ikekei, e na manga nakoaiaki nakon taian tabuki ake i mainikun te Nama are Kariraia, [137]

¹²Ao e a manga ira te Karaanga are te Ioretan rikaaki nako tabon Taari are Mate mai meang. Kam na boni b'aini aaba akana a mena i nanon taian tia akanne.

¹³Ao e a taetae Moote nakoia aomata ni kaangai, “A na reke i roumi aaba akana i nanon taian tia akanne. A na riki b'a ami b'ai, ma E a tia te UEA ni mwiokoingkami b'a kam na tib'aia nakon ruaiwa ma te itera te baronga.

¹⁴A tia n reke abaia te baronga are Reuben, Kata, ao Manate Mainiku

¹⁵i mainikun te Karaanga are te Ioretan ni kaaitaraa Ieriko n iteran te karaanga are teuana.”

¹⁶Ao E taku te UEA nakoni Moote,

¹⁷“A na tib'a aon te aba Ereata are te ibonga, ao Iotua are natin Nun nakoia Iteraera.

¹⁸A na buokaki irouia kaka temanna man taiani baronga nako.

¹⁹Ao aikai araia:

²⁰Kareb'a are natin Iebunne man te baronga are Iuta,

²¹Temuera are natin Ammiuta man te baronga are Timeon,

²²Eritata are natin Kitiron, Buki are natin Iokeri man te baronga are Taan,

²³Anniera are natin Ebota man te baronga are Manate,

²⁴Kemuera are natin Tibetan man te baronga are Eberaim,

²⁵Eritaban are natin Barenaka man te baronga are Teburun,

²⁶Baretiera are natin Atan man te baronga are Itakara,

²⁷Aiuta are natin Teromi man te baronga are Atera,

²⁸ao Betaera are natin Ammiuta man te baronga are Nabetari.

²⁹Ao aikai mm'aane ake E mwiokoia te UEA b'a a na buoka Ereata ma Iotua n tib'a aon te aba nakoia Iteraera.