Read Te B'aib'ara Warekaia Iteraera 35 Bible Online

Warekaia Iteraera 35 - Te B'aib'ara bible

Warekaia Iteraera 35

¹Ngke a bon tabe ni maeka Iteraera n aaba ake a rinano i Moaba i rarikin te Karaanga are te Ioretan ni kaaitaraa Ieriko n iteran te karaanga are teuana, ao E tuanga Moote te UEA

²b'a e na kaangai nakoia: Ngkana e reke iroumi aban ami baronga nako, ao kam na anga kaawana tabeua ma tawaana ni uteute tabeua nakoia te baronga are Rewi.

³Ao a na kona iai kanoan Rewi n reke aia kaawa ake a na maeka iai, ao aia katawanang ni uteute ike a na am'am'arake iai aia man.

⁴A na riai n tikuea tein taian tawaana n uteute ake a katobibi kaawa aikai n tatabeua nako, ao e na mena i nuuka te kaawa.

⁵A na riai ni koro 3,000 te buuti ab'akin iterana nako, ao 1,500 te buuti man te kaawa nakon tokin te tawaana ni uteute. A na riki aikai b'a aia tawaana ni uteute kanoan Rewi.

⁶A na riki onoua te kaawa man ake kam anganiia, b'a taiani Kaawa ni Kamauri, ike e na kona ni kamanoaki iai te aomata ae tiringa te aomata temanna n tiaki nanona. Ma kam na riai naba n anganiia kanoan Rewi abwi ma uoua riki kaawa tabeua,

⁷b'a aonga n reke m'aitin aia kaawa ae abwi ma mm'aane aika a airi ma tawaana n uteute i rarikiia.

⁸Ao i bukina ngke a reke aia kaawa kanoan Rewi man abaia taiani baronga, ma ngaia are, e na bon m'aiti riki ana kaawa ae anga te baronga ae buubura nakon te baronga ae uarereke.

⁹Ao te UEA. E tuanga Moote b'a

¹⁰e na kaangai nakoia Iteraera: Ngkana kam tia n ri aon te Karaanga are te Ioretan ma ni maeka i Kanaan,

¹¹ao kam na rinei taiani Kaawa ni Kamauri, ike e na kona ni birinako ni karabaa iai te aomata ae tiringa te aomata temanna n tiaki nanona.

¹²B'a ngkana a na irantaanga ana utu teuare e tiringaki, [138] E na kona ni birinako te aomata are bukinaki n tiritiri nakon Kaawa ni Kamauri aikanne ni kamanoa iai b'a e aonga n aki tiringaki i m'aain kabowiana.

¹³A na riai n reke onoua Kaawa ni Kamauri,

¹⁴A na reke kaka tenua n iteran te Karaanga are te Ioretan ake uoua.

¹⁵Ana riki b'a taabo ni kamauri nakoia aomata ake a maeka i aon Iteraera ake a tiritiri n tiaki nanoia. Ao E taku te UEA:

¹⁶Ngkana ko orea te aomata temanna n te m'akoro ni biti,

¹⁷ke te atiibu ae buubura, ke te kai.

¹⁸Ao ngkana e a ti mate naba te aomata anne, ao ko a reke n te tiriaomata, ao ko a riai n tiringaki

¹⁹iroun temanna ana utu teuare e mate. [139] E na bon irantaanga i bukin maten ana koraki n te tai naba are ko reke iai irouna.

²⁰Ngkana ko un, ao e a ti mate naba konam ngke ko butuia, ke ko oreia, ke ko kareia n te b'ai teuana.

²¹Ko a reke n te bure, ao ko a riai n tiringaki iroun temanna ana utu ni kaan te mate.

²²Ma ngkana tao arona b'a bon akea unim iroun te aomata, ke akea naba ribaakina iroum,

²³ao e a ti mate naba tao ngke ko butuia ke ko kareia.

²⁴A na kabowi kaain te kaawa ni baairea taekam.

²⁵Ngkana ko aki reke ni bure, ao ko na kaawakinaki mairouia ana utu te mate, ao ko na kanakoaki nakon Kaawa ni Kamauri ni karokoa te tai are mate iai te ibonga are rietaata.

²⁶Ma ngkana ko bon kiitana te Kaawa ni Kamauri

²⁷ao ko a tiringaki irouia ana utu te mate, ao a na bon aki kona ni katuaaeaki iai i bukin kamateakim.

²⁸Ko na tiku i nanon te Kaawa ni Kamauri ni karokoa maten te ibonga are rietaata, ao ko a tib'a kona ngkanne n okira mwengam.

²⁹A na riai n ongotaeka nakon taian tua aikai te botaki ni Iteraera.

³⁰Tuaan te tiriaomata bon te mate. E na bon aki tiringaki te aomata ngkana e bukinaki n tiritiri, ma ti ngkana a reke uoman taani kakoaua n ana bure.

³¹Kam na aki anga te m'ane b'a kam aonga n aki katuaaeaki n tiringaki; e na bon kabooaki ni maiumi!

³²Ngkana ko a tia ni kakoauaaki b'a bon akea am bure, ao ko a boni maeka n te Kaawa ni Kamauri, ao ko bon aki kona naba ni kabooa otinakom n okira am auti; ko na bon tiku ikanne ni karokoa maten te ibonga are rietaata.

³³Bon te UEA Ngai ae I maeka i buakomi Iteraera, ma ngaia are, e riai ni kaawakinaki itiakin abami. B'a ngkana iai te tiritiri, ao e na b'aro te raraa n tanon te aba, ao e na kam'araea.

³⁴Ngkana e riki anne, ao e na tiringaki te tia tiritiri, b'a e aonga ni manga itiaki te aba. Tai karaoa te m'akuri n tiritiri mai aon Iteraera!