Read Te B'aib'ara Warekaia Iteraera 6 Bible Online

Warekaia Iteraera 6 - Te B'aib'ara bible

Warekaia Iteraera 6

¹Ao E tuanga Moote te UEA

²b'a e na kaangai nakoia Iteraera: Ngkana iai i buakomi ane kan anga boni ngaia nako Iu ni berita b'a e na riki b'a te Natiraite,

³ao e na aki manga nima te wain, te biia, ke ni kabongana te beneka. E na aki nima ranin te kureebe ke ni kana te kureebe, ke te kureebe ae kam'auaki

⁴ao e na aki kana naba atina ke kunna.

⁵E tabu naba iran atuun te Natiraite. E na aki kokorea iran atuuna.

⁶I nanon te tai are e riki iai te aomata b'a te Natiraite, ao e na aki kaakaniia ma te mate,

⁷e aoria naba ngkana bon tamana, ke tinana, ke tarina, ke mm'aanena. E na riki ni kam'ara ngkana e karaoa aei.

⁸E na riki iran atuuna b'a te kanikina, b'a e a tia ni katabuaki b'a au aomata, ma ngaia are, e na riai n tabu.

⁹Ngkana e mate te aomata temanna i rarikim, ao e na uruaki iai tabun iran atuum, ma ngaia are, ko na koromaraiko, itiua te bong i mwiin te tai are mate iai te aomata arei.

¹⁰Ao ko na uoti uoman te taobe ke uoman te bitin nakon te ibonga n te Um'antabunrianna n te bong are i mwiina.

¹¹Ko na anga temanna te mannikiba b'a am karea i bukin kab'araan am bure, ao ko na anga are temanna b'a te karea are kakukureiau, [11] Ao e na kab'araaki am bure i mwiin kaanian te mate, ao e na manga oki tabun iran atuum.

¹²Ma e a tia ni kamaunaaki kariaiakam n riki n Natiraite i mwiin kaanian te mate, ma ngaia are, ko riai ni manga karaoa riki am berita b'a ko na riki b'a te Natiraite, ao ko na manga katabuaki riki. Ao kabaneana, ko na anga te tiibu te teei ae teuana ana ririki ni maiu b'a am karea i bukin kaetan b'aai ni kabane.

¹³Ao ngkana a koro tain am berita i bukin rikim n Natiraite, ao ko na nakon te Um'antabunrianna,

¹⁴ao ko na anga teniman te man aika akea toabuakan rab'ataia. Ko na anga te tiibuteteei ae teuana ana ririki ni maiu i bukin te karea are kakukureiau, ao te tiibu te teei ae te aine i bukin te bure, ao te tiibu te teei ae e a ikawai b'a te karea i bukin bubutiakiu au kakab'aia. [12]

¹⁵Ko na anga naba te angab'ai are te wain, ao te karea are te uita ma maan aikai. Ao te kabanea, ko na riai ni uota naba te b'atiketi ni kariki aika karaoaki man te buraawa ae rangi ni mte, ao b'aan te oriwa, ma e na aki itinaki. Ao ko na uota naba te buraibaan ae kabiraki aona n te b'a.

¹⁶E na uoti taiani b'aintangira aikai te ibonga nakon Au baonikarea ma n anga nako Iu, b'a I aonga ni kukurei ma ni kab'arai am bure.

¹⁷Ao i mwiina, e na kareana te tiibu mm'aane, ma n anga te wain, te uita, ao te kariki.

¹⁸Ao i mwiin aei, ao ko na tei ni mataroan te Um'antabunrianna, ao ko na koromara atuum, ao ko na kaaki iran atuum n te ai are anga te karea ni bubuti Au kakab'aia iai te ibonga.

¹⁹E na anaa irikon angan te tiibu mm'aane te ibonga n te tai are e m'ai iai, n ikotaki ma teaina te kariki, ao teuana te buraibaan ae kabiraki aona n te b'a, ao e na anganiko.

²⁰Ao ngkoe, ko na manga kaoki n angan te ibonga, ao te ibonga, e na tabekirake [13] ni katabui nako Iu, ao i mwiin aei, ao e a kona ni kana irikon angan te tiibu mm'aane, n ikotaki ma rii ni kaokaona, ao rangana, b'a bon anne tib'angana man te karea. Ao i mwiin aei, ao ko na aki manga atongaki b'a te Natiraite, ao ko a inaomata n nima te wain.

²¹Ao akanne b'aai aika a tangiraki i bukin te Natiraite, ma ngkana ko taku b'a ko kona n anga ae m'aiti riki nakon anne, ao ko riai n anga.

²²Ao E taku te UEA nakoni Moote,

²³“Ngkana E taetae ni kakab'aiaia Iteraera Aaron ma natina mm'aane, ao a na kaangai:

²⁴I tataro b'a E na kakab'aiaingkami ma ni kaawakiningkami te UEA,

²⁵ao E na nanoangaingkami ma n akoingkami.

²⁶E na karaoa ae raoiroi nako imi, ma n anganingkami te rau.”

²⁷Ao E taku te UEA, “Ngkana a butiai Aaron ma natina mm'aane i bukin kakab'aiakiia Iteraera, ao N na anganiia Au kakab'aia.”