Read Te B'aib'ara Mika 3 Bible Online

Mika 3 - Te B'aib'ara bible

Mika 3

¹Ongora ngkami aika taan taua taekan Iteraera! Kam kantaningaaki b'a kam na kaawakina karaoan te eti,

²ma ngaia kam tangira te bure ao kam riba te raoiroi. Kam kuoti kuniia au Aomata ngke a boni maiu, ao kam taeki irikoia man riia.

³Kam kaniia au aomata, kam kanakoi kuniia, kam otoi riia ao kam korokoroia nako nanon te b'aata kaanga taian iriko maiu.

⁴E na roko te tai are kam na tang iai nakon te UEA, ao E na aki kaekai ngkami, E na aki kan ongo ami tataro, i bukina b'a kam a tia ni karaoa ae e buakaka.

⁵A tia ni keweaki au aomata irouia burabeti ake a taetae ni burabetiia te rau nakoia ake a reke booia mairouia, ao te buaka nakoia ake a aki reke booia mairouia.

⁶“Ngkami aika burabeti e a roko tokin ami bong ni burabeti, e a bung taai i aomi. Kam a tia n aki kairiia raoi au Aomata. Kam na aki kona ni manga noori mii ni burabeti, ao kam na aki manga taetae ni burabeti.”

⁷A na kamamaaeaki burabeti akana a taetae ni burabeti i bukin taai aika a na roko b'a a na aki koro bukin aia taetae ni burabeti. A na kamamaaeaki b'a E na aki kaekaia te Atua.

⁸Ma ngai bon irou, E a tia ni karina tamneina ao korakorana te UEA irou, ao E anganai ataakin te eti ao te ninikoria ni kan tuangiia Iteraera aroia aika a bure.

⁹Kakauongo ngkami aika taan tautaeka i Iteraera, ngkami aika kam riiribaa te eti, ao kam kab'aoua te raoiroi nakon te buakaka.

¹⁰Kam katea ana kaawa te Atua ae Ierutarem i aon aana ae te tiritiri ma te kaairua.

¹¹A taua taekaia aomata taan tautaeka i bukin te babakanikawai. A kab'arab'arai tuua ibonga i bukin kaboakiia. A taetae ni burabeti i bukin te m'ane. Ao a bane n taekinna b'a aongkoa e mena te UEA irouia. Ao a kaangai, “Akea te rekenikai nakoira. E boni mena te UEA iroura.”

¹²Ao i bukim, e na kamarauaki Tion kaanga te tawaana, ao e na riki Ierutarem b'a b'ariko ni b'ai aika a uruaki, ao tabukin te Tembora, e na riki b'a te buakonikai.