Read Te B'aib'ara Mika 5 Bible Online

Mika 5 - Te B'aib'ara bible

Mika 5

¹Bootia am taanga ni buaka ngkoe ae Ierutarem, b'a ko a katobibiaki irouia am kairiribai. A tia ni buakana Iteraera, ao a orea taban te Tia Tautaeka n te kai.

²E kangai te UEA nakon te kaawa ae Betereem Eberata, “Bon te kaawa naba ngkoe teuana ae ko uarereke i buakon kaawan Iuta, ma N na kaotinakoa te Tia Tautaekana Iteraera mai iroum, ae te aomata ae iai reitakina ma ake a kakannato ake ngkoa.”

³Ma ngaia are, te UEA e anga ana aomata ake I-Iteraera nakoia aia kairiribai ni karokoa te tai are te aine e na bungia iai te nati te m'aane, ao a tib'a kona n oki iai ake a kataenikaiaki ni kaitibo ma aia koraki.

⁴Ngkana e roko, ao E na bon taua taekaia ana aomata ma te korakora are e anganna te UEA, ao ma ni kaotiota naba mimitongin te UEA n ti Ngaia. A na boni maeka ana aomata ma te rau, i bukina b'a e bon namakinaki kakannaton ana tautaeka ni kabutaa te aonnaba,

⁵ao e na karekea te rau. Ngkana a na roko I-Aturia ni buakana ara kaawa ma n ninii nako ara nono, ao ti na kanakoia ana taani kairiiri aika a korakora b'a a na totokoia.

⁶A na kataenikaia Aturia are n aban Nimrota n aia b'ai ni buaka, ao a na kamaiura mairouia I-Aturia ngkana a roko ni buakaniira.

⁷A na riki nikiraia Iteraera ake a maiu ma ni uamaaenako i buakoia botannaomata b'a b'aai ni kamaiu aika a kanakoaki mairoun te UEA n ai aron te aoi ma te karau i aon taian aroka. A na mwioko iroun te Atua, ao tiaki iroun te aomata.

⁸A na riki b'a kaanga raian aika a kakaaei kanaia i buakonikai ke i aon uteute: a rin i buakoia tiibu, a ewekia, ao a raebitiia-ao bon akea manga kantaningaan te kamaiuaki.

⁹A na kataea aia kai aiaia Iteraera, ao a na kabaneia n tiringiia n akea nikiraia.

¹⁰E taku te UEA, “N na uotii nako aia aoti, ao N na kabuoki aia kaa ni buaka n te tai arei.

¹¹N na urui kaawan abam nako, ao N na urubekei am tabo nako ake a nonoaki.

¹²N na urui m'aakan am tabunea ake ko tabuneaiko iai, ao N na katikuko b'a te tabo ae akea te tia kaiwa iai.

¹³N na urui am bouananti ma am baangota nako; b'a kam na aki manga taromaurii baika kam boni karaoi.

¹⁴N na kab'akai bannan te atua n aine are Nei Aatera akana i abam, ao N na urui am kaawa nako.

¹⁵I bukin marakin nanou, ao N na kamaunaia te botannaomata ake a rawa n ira nanou.