Read Te B'aib'ara Mika 6 Bible Online

Mika 6 - Te B'aib'ara bible

Mika 6

¹Kam na ongora n ana bukibuki te UEA nakon Iteraera. Ko na teirake ngkoe ae Te UEA ao Ko na taekina bukinaia iroum; ke a ongora maunga ma tabuki baika ko taekin i bukiia.

²Ngkami aika maunga, aika bouan te aonnaba ma ngkoa, ongora nakon Ana kauntaeka te UEA! Iai Ana kauntaeka te UEA i marenana ma Ana aomata aika Iteraera are E na tabekaarake taekana.

³E taku te UEA, “Tera ae I a tia ni karaoia nakoimi au Aomata? Tera arou ae I a tia ni karawawataingkami iai? Kam na kaekaai.

⁴I kaotinakoingkami mai Aikubita; I kamaiungkami man te tautoronaki; I kanakoa Moote, Aaron, ao Miriam b'a a na kairingkami.

⁵Au Aomata, kam na uring ana iango B'araka ngkoa are uean Moaaba, are e na karaoia nakoimi, ma ana kaeka B'araam nakoina are natin Beora. Kam na uring aromi ngke kam ri aon te karaanga are te Ioretan ngke kam m'ananga mai Titim nako Kirekara. Kam na uring ni kabane baikai ao kam na namakin Au m'akuri ni kamaiu i bukimi.”

⁶Tera uotau nakon te UEA ae Atuan karawa, ngkana I roko n taromauriia? E koaua b'a N na uotii kao ataei ma ni kabuokii b'a taiani karea nakoina?

⁷E koaua b'a E na kukurei te UEA ngkana I uoti nakoina tiibu aika m'aane aika ngaa, ma b'aan te oriwa ae e bure baireana? E koaua b'a N na anganna moan natiu b'a au karea ni kab'arabure?

⁸Bon tiaki ngaia anne, E a tia n reireiniira te UEA ataakin ae e raoiroi. Aikai baika E tangiri te UEA mairoura: Ti na karaoa ae e eti, ti na kaota te tangira ae e teimatoa, ao ti na iraorao ma Ngaia ma te nanorinano.

⁹E wanawana ane e maaka te UEA. E wetea te kaawa ni kaangai, “Kam na ongora ngkami aomata aika kam bootaki i nanon te kaawa!

¹⁰Iai te kaub'ai ae e reke n te babakanikawai i nanon aia auti aomata aika a buakaka. A kamanenai b'aai ni baire aika a kaairua, ao bon aikai baika I bati n ribaai.

¹¹N na kangaa n nanoangaa te aomata are e kamanenai kainikatine aika a buakaka ma rawaawata aika a kairua?

¹²Am aomata aika a kaub'ai a babakanikawaia aika akea aia b'ai, ao bon taani kewe ngkami ni kabane.

¹³Ma ngaia are, I a tia ni moana uruam ma kamaunaam i bukin am bure aikai.

¹⁴Ko na am'arake ma ko na aki kona ni ngae; n te koaua, ko na boni baki naba. Ko na uotii nako b'aai, ma ko na bon aki konaa ni kaawakin; baika ko na kaawakin N na bon urui n te buaka.

¹⁵Ko na unika te uita, ma ko na bon aki taiia uaana. Ko na ongira te b'aa man te oriwa, ma ko na bon aki kamanenaa. Ko na karaoa te wain, ma ko na bon aki mooi iai.

¹⁶E na riki aei nakoim i bukina ngke ko katotoong ana m'akuri te uea are Omri, ma natina naba are te uea are Aaba. Ko reitanako aia m'akuri, ma ngaia are, N na uruko, ao a na bane ni kakeaa manenam aomata nako. Bon akea temanna ae e na karineko.[3]