Read Te B'aib'ara Naum 3 Bible Online

Naum 3 - Te B'aib'ara bible

Naum 3

¹Te mate tokin te kaawa ae te tia kewe, ao te tia tiritiri, ae e kaub'ai ae e na manga kurib'aiaki ma n anaaki b'aina nako!

²Kakauongo! Rebwen te kainikataere, tangin waen kaa, rebwerebwen waeia aoti, rurungaan kaanibuaka!

³A kanenei taan toka i aoia aoti, a raitiiti kabaang, a raneanea kainiwai! A kakareuataorake maate, e a bure warekan te mate ao a toubekaaki moaia!

⁴E a katuaaeaki Ninewe ae ainen mataawa ae e kakab'akab'aka, ae e on n taian tabunea aika a kamaamate, ma ni kakaririia botannaomata nako ao n tautoroniia.

⁵E taku te UEA ae Moan te M'aaka; “N na katuaaeko, Ninewe! N na taekanako karabaam ni kabebeekaniko, b'a a na noriko botannaomata nako, A na nora arom ni kamamaaeaki.

⁶N na karaoiko b'a ko na tirobaeaki. Ao ti na rabuniko n taiani maange. A na matakuakiniko aomata ma te maaku.

⁷A na bane ni kararoako ake a noriko. Ane a na kaangai, ‘E na uruaki Ninewe. Antai ae e na kan nanoangaia? Antai ae na kan kabebetea nanona?’ ”

⁸Ninewe, tao ko raoiroi riki nakon Teebe, are atuun kaawan te tautaeka n Aikubita? Iai otangana te Karaanga are te Naire are e katobibia te kaawa b'a kaanga oona, n totokoia ana kairiribai.

⁹A mena naba Itiobia, [3] ao Aikubita b'a akea tokin m'aakana; e itabon ma Ribia.

¹⁰Ma e ngae n anne, ao a boni bane n uotaki nako naba kaain Teebe nakon te kataenikaiaki. A oroia ataei ni uaa mateia ni katawanangin nanon te kaawa. A kabaeaki n taurekereke taani kairiri, ma n tib'aaki nakoia taani kairiia taenikai.

¹¹Ninewe, ko na b'aka naba n ai aron te aomata ae e koro ni manging. Ko na aki kona ni birinako mairouia am kairiribai.

¹²A na riki nonom nako b'a kaanga kaai aika biiku aika a tawaa uaaia. A na ioaki biiku, ao a na b'aka uaaia nako nanon wiim!

¹³Am tautia kanga ai aroia aine, ao abam a na kona n tuukia aiana. E na urui biiti ake i aon ami mataroa nako te ai.

¹⁴Itii raan ni katauraoi i m'ain katobibiam ni buakanaki, kamatoatoai nonom nako. Kaboboa bokabokan te buriki, ao b'ain te oroburiki!

¹⁵Ma bon akea uaan aika ko karaoi, b'a ko na boni kabuokaki ni uaa matem n te ai, ke n te bonibuaka. Ko na mauna nako n ai aron taian uita aika a kanaki irouia rokati. Ko kam'aitiko n ai aroia rokati!

¹⁶Ko kabatiaia riki am tia bob'ai nakon itoini karawa! Ma a tia n nako n ai aroia rokati ake a taakin baiia ma ni kiba nako.

¹⁷Am mataniwi kaanga ai aroia te taanga n rokati ake a tikura te oo ni m'aitoron te bong, ma ngkana e oti taai ao a kibanako ao akea ae e atai mwiia.

¹⁸Te Emberoa n Aturia, a mate am mataniwi, ao a matunako am aomata aika a kakannato n aki manga uti. A uamaae nako am aomata i aon maunga, ao akea temanna ae e na kaokiia riki nakon mwengaia.

¹⁹Akea katokan rawawatam, ao a aki kona ni kamaoaki ikoakim. Ake a ongo taekan uruam a na uboi baiia ni kukurei. B'a a bane aaba nako n rootaki n am m'akuri aika a buakaka.