Read Te B'aib'ara Ab'akuka 2 Bible Online

Ab'akuka 2 - Te B'aib'ara bible

Ab'akuka 2

¹N na tam'arakea au taua n taratara, ao n na tataninga b'a n na nora te b'ai ae E nang tuangai te UEA, kaekaan ngurengureu.

²Ao E kaekaai te UEA ao E kaangai, “Koroi ni kaotai raoi i aon baaba ni koroboki baika N na kaoti nakoim, b'a a aonga ni kai warekaki.

³Korobokiia b'a a tuai n roko tain taeka aikai, ma ana bon waekoa ni koro nanoia, ao baika I tuangko ana bane ni koro bukiia. E taraa ni kiriaria, ma tataninga b'a ana bon roko baikai, ao ana bon aki taonaki taiia.

⁴Ao aio te rongorongo, “Ana bon aki tiku ni maiu aika a buakaka, ma aika a raoiroi ana bon maiu i bukin aia kakaonimaki nakon te Atua.”

⁵Te kaub'ai bon te tia m'am'anaa te aba. Aomata aika a m'angai-n-rang a kamoamoa ao akea aia motirawa. A bon aki kona n rauaki nanoia n ai aron te mate (rua-ni-mate). Ao bon anne bukina are a buakani man taui aaba teuana i mwin teuana.

⁶Aomata ake a taenikai, a b'ainingareia ake a konaia man kakanikoia. A taku nakon B'aburon, “Ko anai baika tiaki am b'ai ma ae E nang oroiko te Atua. Ai ti maanra ngkoe n aia kaub'ai man anaaki am m'ane mai rouia aomata?

⁷N te tai ae ko aki kantaningaia, ngkoe ae ko a tia ni konaia tabem'aang, ana manga kaoka aei nakoim ake ko karaoa aei nakoia. Ana roko am kairiribai ao ko na ruru ni maaku. Ao ana kurib'aiko.

⁸Ko a tia ni kurib'aia aomatan botannaomata aika a bati, ma ngkai uaake nikira ni maiu ana manga kurib'aiko i bukin am tiritiri, ao am iowawa nakoia aomatan aaba ma kaawa nako.

⁹Ko na b'aka. Ko kab'aib'aia am utu man baika ko karekei n te iowawa. Ko a tia ni kataia ni kamanoa man te kabuanib'ai, ao te kangaanga.

¹⁰Ma am babaire a karika te mamaa i aoia am utu, ao kamaunakiia botannaomata iroum, ko bon urua oin maium iai.

¹¹Ana takaarua naba atiibun taian oo ni kabuakakako, ao kain te auti ana taekina naba ae tii te arona.

¹²Ko na b'aka, b'a ko aana am kaawa ni m'akuri aika bure, ao ko kateia n te tiritiri.

¹³Botannaomata ake a b'aka iroum, a kabanei aia tai ni m'akuri iroum ao b'aai ni kabane aika a katei, ana bane ni buee n te ai. E na karaoi baikai te UEA ae E m'aaka.

¹⁴Ao e na onrake te aonnaba n ataakin mimitongin te UEA n ai aron taari ae e kaona marawa.

¹⁵Ko na b'aka. Ko a tia ni kamamaaia, ao ni kakeaia kaain rarikim, ao ni karaoia b'a ana tatatata ni koro ni manging.

¹⁶E na manga okiriko te mamaa n onea mwin te karineaki. Ko na mooi man tatatata. E na kamoiko te UEA ni bon oin m'angkon oream, ao karineam e na onikaki nakon te b'ainrang.

¹⁷Ko a tia ni koroi ao ni kab'akai buakonikain Reb'anon, ao ngkai, ko na manga koreaki ni kab'akaaki. Ko tiring manna, ao ana aki karauko maan. Aio te b'ai ae e na riki nakoim i bukin am tiritiri, ao i bukin naba iowawaam nakoia aomatan te aonnaba ma kaawa nako.

¹⁸Tera manen te bouannanti? Ti te b'ai ae e bon karikia te aomata, ao e anga taeka aika akea nanoia, aika keewe. Bon tii ana karaob'ai te aomata, e bon aki kona n taetae.

¹⁹Ko na b'aka b'a ko kaangai nakon te m'akoro ni kai, “Uti!” ke nakon te m'akoro n atibu, “teirake!” E kona ni kaoti b'aai te bouannanti nakoim? E tii kabiraki aona n te tirewa ma te koora ma bon akea te maiu i nanona.

²⁰E mena te UEA i nanon ana Tembora are e tabu, ke a bane kaain aonnaba ni kainab'aabu i matana.