Read Te B'aib'ara Ab'akuka 3 Bible Online

Ab'akuka 3 - Te B'aib'ara bible

Ab'akuka 3

¹Aio Ana tataro te burabeti are Ab'akuka.

²Te UEA, I a tia n ongo baika Ko a tia ni karaoi, ao I onrake n te maaku. Ngkai ti maiu ao baike Ko a kaman kakaraoi. Ko na nanoanga, e ngae ngkana iai unin nanom.

³E a roko te Atua mai Etom; E roko te Atua ae E tabu mai taubukin B'aran E kabutaa karawa tamaroana ao e kabutaa aonnaba neboana irian rokona te oota ae e raneanea [1] b'a E na buokiira. Raneanean mimitongina e rabuna karawa, ao e ongo te aba neboakim n te aonnaba ni kabutaa.

⁴E roko ma raneaneana; E itinako te oota mai baina, te tabo ike e karabaa iai m'akana.

⁵E tuanga te aoraki b'a e na rimoana, ao te mate b'a e na rimwina.

⁶Ngkana E toki ni m'akuri ao e m'aeiei aon te aba; a ruru ni maaku botannaomata i matana. Maunga ake ngkoa ana maenako ao tabuki ake a teimatoa ana inako, ake tabuki ake E nakonako i aona n taai ake ngkoa.

⁷I nooria aomatan Kutian b'a a maaku. ao aomatan Miria b'a a ruru. [2]

⁸Karaanga aika a karika unim te UEA? Taari ae kakorakoraa Unim? Ko buti i aon naang; nangini buaka bon am kaa ni buaka, ngkana ko a uota te tokanikai nakoia am aomata.

⁹Ko tauraoi ni kamanena am kainikatebe. Ko tauraoi ni kanakoa am kanoanikatebe. Ao raitiitim a katabwena te tano.

¹⁰A na ruru maunga ngkana a nooriko, ao a na b'aro rikaaki raan mai karawa, ao raan ake i aan te aba, a na rurunga, ao a na tei naoia aika a rietaata.

¹¹N itin birin am kanoanikatebe, N ootan raneanean am kainiwai. ao taai ma nam'akaina a bon tei ni nneia.

¹²Ko m'ananga ri aon te aba ma te bononnano Ko toutouia botannaomata n unim

¹³Ko otinako ni kamaiuia am aomata, Ko kamaiuia am uea aika ko rineia Ko oroia rikaaki taan kairiiri aika a buakaka ao ko kamaunaia taan rimwiia.

¹⁴Ko ewara te mataniwi n te taanga ni buaka ni kanoan am kainikatebe Ngkana e roko ni kamaenakoira n ai aron rokon te ang ae korakora, ni kamoamoa n ai aroia ake a karabaia ni karawawataia aika kainano.[3]

¹⁵Ko kabukibuki taari ni waeia am aoti ao a riki ni buroburo iai raan aika a korakora.

¹⁶I bane n ongo baikai ao I riki n ruru iai; a ruru matanriau ni maaku. E keerikaaki korakoran rab'atau ma n rurubenebene waeu. N na tataninga ma te rau, n taningaa rokon te tai are E na oroia iai te Atua koraki akea a buakanira.

¹⁷E ngae ngke akea uaan te biku ao akea uaan te kureebe e ngae ngke akea uaan te Oriwa, ao akea naba uitan te tawaana e ngae ngke a bane ni mate tiibu ao akea naba kaao i nanon nneia.

¹⁸Ma e ngae n anne ao I bon kukurei naba b'a E kakaawakinai te Atua.

¹⁹E anganai korakorau te UEA. E karaoi waeu b'a ana aki marannako n ai aron waen te ria, ao E kawakinai raoi i aon te maunga.