Read Te B'aib'ara Teb'ania 1 Bible Online

Teb'ania 1 - Te B'aib'ara bible

Teb'ania 1

¹Aikai ana taeka te UEA ake E angan Teb'ania i nanon ana tai ni Uea Iotia are natin Amon are uean Iuta (Teb'ania bon ana bakatibu te uea are Etekia mairoun Amaria, Ketaria, ao Kuti)[1] [2]

²E taku te UEA, “N nang kamaunai b'aai ni kabane aika i aon te aba,

³aomata ma maan aika a kawakawa, mannikiba, ao ika. N na kamaunaia aomata aika a buakaka. N na kamaunaia aomata n aekaia nako, ao akea ae e na tiku ni maiu, bon ana taeka te UEA.”

⁴N na oroia aomatan Ierutarem, n te aba ae Iuta ni kabane, n na kamaunaia n tatabemaniia nako, aomata ake a taromauria B'aara, [3] b'a e aonga ni bon akea manga uringaia ibonga ni beekan.

⁵N na kamaunaia ake a tam'arakei taubukin aia auti man taromauriia taai, nam'akaina, ao taian itoi. N na kamaunaia naba ake a taromauriai man berita b'a ana kakaonimaki nako iu, ao a manga rairaki nakon te anti are Marekam.[4]

⁶N na kamaunaia ake a tia n oki ma a aki irai, ake a aki nako iu man rawa n taubeakinaki Irou.

⁷E a kaan ana bong ni motikitaeka te UEA, te tai are E nang karaoa iai ana m'akuri te UEA, ma ngaia are kainab'aabu i matana. E katauraoi te UEA b'a E na anga ana aomata b'a taian karea, ao E kateirakeia kairiribai b'a ana kurib'aia Iuta.

⁸“Ao n te tiritiri arei” bon ana taeka te UEA ao N na oroia b'akuaku, natiia uea ao ni kabane ake a karakaraka.

⁹N na oroia ake a taromauria anti ao ake a iraa man tiritiri i bukin karekean b'ain aia auti aia toka ni b'ai-ni-iraa.

¹⁰“Ao n te bong arei,” bon ana taeka te UEA, “Ko na ongo te tanginiwenei n te mataroa are e aranaki b'a te ika [5] i Ierutarem, ao ko na ongo te tanginiwenei n iteran te kaawa are e boou, ao te rurunga man taian tabuki.

¹¹Kam na mangoo n tang ngkana kam ongo te baei ngkami aika kam maeka n iteran te kaawa are i nano, i bukina b'a ana bane ni mate ami taan boob'ai!

¹²“N te tai arei, N na anaa te taura mani kibeea nanon Ierutarem. N na oroia ake akea raraoman nanoia, man onimakiniia i bon irouia, man taku, “Akea te b'ai ae E kona ni karaoia te Atua nakoira, ni kakab'aiara ke ni karekekaira.”

¹³Ana kurib'aiaki kaub'aia, ao ana uruakaki mwengaia, ana bon aki kona ni maeka ni mwengaia aika a karaoi, ke n nim aia wain mani nnen arokaia kureebe.”

¹⁴E a kaan ana bong te UEA, e a rangi ni kaan, ao e rangi ni waekoa! Te bong ae moan te kakamaaku n te aro are e na bon rotaki naba iai te tautia ae moan te ninikoria.

¹⁵Bongin unin te UEA, bon bongin te kanganga ma te rawaawata bongin te mauna nako ao te urubekebeke, bongin te i anroo ma te rotongitong, bongin te nubono ma te uananginang.

¹⁶E na kanoaki te bong arei n tangin taian buu ni buaka, ao karongoaia taani buaka ngkana a buakani kaawa aika a nonoaki ma taua aika a ririeta.

¹⁷E taku te UEA, “N na karokoa te kanganga nako aoia aomata, b'a aonga n nakonako ni kakaenako baaia kanga te aomata ae e mataki. A tia ni bure nako iu, ao ngkai ana waanako raraaia n ai aron te ran, ao rab'ataia ana wene n raea ni mate, ma ni buakaka i aontano.

¹⁸N te bong arei ngkana e roko unin te UEA, ao ana bon aki kamaiuaki n aia tirewa ma aia koora. E na bane ni mauna te aonnaba n uran unna. E na karokoa te toki; te toki ae e karina nakoia ake a maiu i aonnaba.