Read Te B'aib'ara Tekaria 1 Bible Online

Tekaria 1 - Te B'aib'ara bible

Tekaria 1

¹Bon te burabeti are Tekaria Ngai, are natin Berekia ao tibun Ito te mm'aane. N te kawanua nam'akaina n ana kauoua n ririki Taraiati n uea i aon Botia, [1]

²Iteraera, I rangi n un Ngai ae te UEA ae Moan te M'aaka irouia ami bakatibu.

³Ma ngkana kam okirai, ao N na rairaki ni buokingkami.

⁴Kam na aki taningabono n aroia ami bakatibu. A kauringaki irouia burabeti ake mai m'aaina[2] b'a a na kaaki aia m'akuri aika a buakaka ma n okirai, ma a bon aki kan tabe.

⁵A anga ami bakatibu ngkai? A a bon aki maiu naba burabeti n aki toki.

⁶Ma a koro bukin au taeka nakoia ami bakatibu ake taekinaki irouia burabeti. Ma ngaia are, a okirai ao a taku, “Te UEA ae Moan te M'aaka, ko a tia ni katuaaira i bukin ara bure nako, n aron are Ko a tia ni baaireia.”

⁷Ni kauabwiin bongin Tebata, [3] are bon te katebwi ma teuana n nam'akaina n te ririki naba anne, [4]

⁸ao E taetae te UEA nako iu n te mii n te tairiki teuana: n te m'arua teuana ae e mena i buakon taian aroka aika motere.[5] I a noora temanna te m'aane ae e toka i aon te aoti ae e uraura, ma taan toka i aoia aoti i akuuna aika a toka i aon taian aoti aika a uraura, buraun ao aika a mainaina.

⁹Ao e mena naba ikekei te anera are e na kab'arab'arai b'aai ni kabane nako iu, ao I titiraki ni kaangai, “Teuae ko karineaki, antai taan toka i aoia aoti aikai?” Ao E taku te anera arei, “N na taekinna nakoim.”

¹⁰Ao e boni kaekaai naba ni kaangai te m'aane are e mena i buakon taian aroka ake taian motere akekei, “Aikai aomata aika E kanakoia te UEA b'a a na kakaaea b'a tera te b'ai ae e riki i aon te aonnaba.”

¹¹Ao i mwiina a taetae taan toka i aoia aoti nakon Ana anera te UEA, are e tei i aan kaai ake taian motere, ao a taku, “Ti a tia n nako nakon taabo nako ao I a tia ni kunea b'a e rau te aonnaba ae e b'anin.”

¹²Ao e taku te anera i bukin arei, “Te UEA ae Moan te M'aaka, Ko a tia n un iroun Ierutarem ma Iuta i nanon itibwi te ririki. N ningai te tai ae Ko na nanoangaiia iai?

¹³Ao e akoi mani karaunano Ana kaeka te UEA.

¹⁴Ma ngaia are, e tuangai te anera b'a N na katanoata: I rangi n kakaawakina Ierutarem Ngai ae te UEA ae Moan te M'aaka.

¹⁵N taai aika a nako I un ma botannaomata, ma ngkai E a rangi ni maraki nanou b'a a tia ni karaoi riki b'aai aika a buakaka nakon are mai m'aaina i bukin Ierutarem ao bon akea teuana tabetaben nanoia iai.

¹⁶Ai ngaia are, N na nanoangaa Ierutarem. E na manga moan kateaki te kaawa ae e b'anin, ao e na manga kateaki au Tembora.

¹⁷I bon berita naba b'a e na manga teetekeraoi au kaawa nako-e na manga riki Ierutarem b'a au kaawa ae e rineaki, ao N na anga te rau nakoia aomata aika kaain Tion.

¹⁸I mwiina, I noori koron te man aika aai.[6]

¹⁹E bon mena ikekei te anera are e kanakoaki b'a e na kab'arab'ara, ma ngaia are, I titirakinna ni kaangai, “Tera nanon baikai?” Ao e taku ana kaeka, “Taian koroniman aikai bon taian botannaomata aika a kamaaenakoia kaain Iuta, Iteraera, ao Ierutarem, ma n anaa inaomataia.”

²⁰Ao i mwiina, e manga kaota nako iu aman taan karaobiti te UEA, ao I titiraki ni kaangai, “Tera ae a nang karaoia?”

²¹Ao E kaeka ni kaangai, “A nang kakamakui ma n kamanatuai taian koro ni man aikai.”