Read Te B'aib'ara Tekaria 10 Bible Online

Tekaria 10 - Te B'aib'ara bible

Tekaria 10

¹Boni Ngai ae te UEA are I kanakoi nangin te buaka ao maatim ni karau b'a a aonga ni kariki uaa taian tawaana. Ma ngaia are, ngkana a kainanoa te karau taian uita kam na riai n tataro nako iu.

²Kam aki konaa n onimakini taian bouananti ma taani kaiwa, ke ni mwiokoa te kaantaninga ae kam karekea mairouia taan tabunea ma taani kab'ara mii. Ma kam a tia ni katai baikai ni kabane, ao kam a riki ngkai b'a kaanga taian tiibu aika akea te tia kaawakiniia.

³I rangi n un Ngai ae te UEA ae Moan te M'aaka iroumi ngkami aika taani kairiiri ao N na katuaaingkami. I tararuaia Au aomata, ae te botannaomata ae Iuta, ao N na bita te nanai n tiibu aei nakon te taanga ni buaka aika toka i aoia aoti.

⁴A na nako taani kairiiri man te nanai aei aika a korakora n ai aron atiibun te koona ao biinin te autinrianna ao b'aini buaka.

⁵A na ira te buaka, ao a na kaai naba ni kamanatuaia aia kairiribai kaanga te bokaboka. A na buaka, i bukina ngkai N na tei n aia itera Ngai ae te UEA. Ao a na kamanatua aia taanga ni buaka aia kairiribai ake taani buaka mai aoia aoti.

⁶N na kakorakoraa te abanuea are Iuta ao Iteraera.[37] Ao N na kaota te akoi i bukina b'a bon te UEA Ngai ae Atuaia. N na kaekai aia tataro ma ni kaokiia nakon mwengaia. Ao e na taraa n ae I tuai man katinanikuia.

⁷E na riki Iteraera[38] b'a kaanga baronga ni buaka aika a karaoa aia bootaki ni kukurei n te wain. Ngkana a noora aei natiia, a na bon rangi ni kukurei naba ibuku Ngai ae te UEA.

⁸N na anga te kanikina nakoia b'a a na roko n ikotaki i bukina ngkai I a tia ni kamaiuia. Ao a na m'aiti aia koraki nakon are mai m'aaina.

⁹E ngae ngke I kamaaenakoia Au aomata nakon aaba aika a raroa nako, a na aki m'aninga taekau. A na manga oki natiia ngkana a ikawai

¹⁰N na kaokiia nakon mwengaia mai Aikubita ao Aturia, ao N na katekatekaia ni karokoa Kireata ma Reb'anon, ni karokoa e onrake te aba irouia.

¹¹A na ri nanon marawan taiani kangaanga Au aomata, ma N na katoki korakoran taian nao ma ni kam'autakatakaa m'akoron te Naire are e rangi n nano. E na kab'akaaki kakatongan Aturia are e rangi ni korakora, ao e na mauna nako korakoran Aikubita.

¹²N na kakorakoraia Au aomata i bukina ngkai bon te UEA Ngai, ao a na irai. Bon aei Au taeka Ngai ae te UEA!