Read Te B'aib'ara Tekaria 11 Bible Online

Tekaria 11 - Te B'aib'ara bible

Tekaria 11

¹Reb'anon, kauki am mataroa! Kariaia b'a e na rin te ai b'a e na urui am kai aika tiira.

²Kam na tang, ngkami aika arokan Batian aika taian oke! E a tia ni koreaki ni kab'akaaki te buakonikai are e rangi ni matenten.

³Ongora! A tang taan kaawakin tiibu. E a tia n uruanaki aia tabo n uteute aika a mimitong. Ongora! A bekorara taian raian. A na aki manga konaa ni manga nooraki buakonikain te M'arua are Ioretan.

⁴E taku te UEA ae Atuau nako iu: Kaawakiniia tiibu aikai i bukin te tiringaki!

⁵A na bon aki katuaaeaki aomata akana a kabooi ma n tiringiia, ao ane a na kaangai tabem'aang, “E na neboaki te UEA! I a kaub'ai.” A na bon aki nanoangaaki naba irouia taani kaawakin tiibu ake a kaawakiniia.

⁶Kaawakiniia tiibu aikai, b'a N na aki manga nanoangaiia kaain te aonnaba aei. N na kauniia aomata ma kaain rarikiia ao N na karikiia b'a ana toro te uea. A na karokoa te kabuanib'ai nakon te aonnaba, ao bon akea te m'akuri ni kamaiu teuana ae N na karaoia nakoia.

⁷Ma ngaia are, I riki b'a te tia kaawakiniia tiibu i bukiia tiibu aika a reke n te kabuanib'ai irouia taan kabonakoi tiibu.[39] Ao I aran taiani kai aika uakai ake I kamanenai ngkoa i bukin kaawakin taian tiibu: e arana teuana b'a “Nanoanga” ao teuana b'a “Katiteuanaki.”

⁸E aki koro teuana te nam'akaina, I aki konaa n taotaona nanou irouia taani kaawakin tiibu aika teniman aika a ribaai, ao I karaoi taekaia.

⁹Ao i mwiina I taku, “I rawa n riki b'a ami tia kawakin tiibu. Ke a mate tiibu akana i aoni kawaia ni mate, ma akana i aoni kawaia ni kamateaki, ke a kamateaki. Ao i mwiin anne, ke a kaniia i bon irouia akana a maiu.”

¹⁰N te bong naba anne, I otea te kai are e aranaki b'a “Nanoanga” ni kaotia b'a E a tia te UEA ni kamaunaa Ana boraraoi ma aomata nako.

¹¹Taan kabonakoi tiibu ake a nooraki a bon ataia naba b'a bon te rongorongo mairoun te UEA aei.

¹²I tuangiia ni kaangai, “Kab'aka boou, ngkana kam taku b'a e riai; b'a kam kaawa ni m'aninga.” Ma ngaia are, a anganai boou, tao ti tenibwi te m'akoro n tirewa.

¹³Ao i mwiina, e taku te UEA, “Karenakoa te m'ane nakon nnen te kaub'ai.”[40] Ma ngaia are, I kanakoa te m'ane nakon nnen te kaub'ai n ana Tembora te UEA.

¹⁴Ao i mwiina, I otea te kai are e aranaki b'a “Katiteuanaki” ao I kaaki te kabae are i marenan Iuta ma Iteraera.

¹⁵I mwiina, e a manga taku te UEA nako iu, “Ko na manga karaoa aron te tia kaawakin tiibu riki-n te tai aei te tia kawakin tiibu ae akea manenana.

¹⁶N na manga kariaia b'a e na tautaeka te aomata ae akea manenana n te aba aei-temanna ae e aki tabe ma uamaenakoia tiibu ke kakaaeaia aika a uarereke ke kamaiuaia aika a aoraki ke kaam'arakeaia aika a marurung. E na ti kana te tiibu ae e marikarika, n aki katuka teutana b'a ti riina.”

¹⁷Taani kaawakin tiibu aika a akea manenami, aika kam kakeaia tiibu! Au kaantaninga b'a e na kam'aukua anganibaimi te kabaang ma ni kamataki matami.