Read Te B'aib'ara Tekaria 13 Bible Online

Tekaria 13 - Te B'aib'ara bible

Tekaria 13

¹E na reke te koburake n ran, ike a na teboki iai aia bure ma aia kaairua ana kariki Tawita ao kaain Ierutarem.

²E taku te UEA ae Moan te M'aaka: N na kamaunai ni kabane taian bouannanti mai aon te aba ngkana e roko te tai arei, ao e na m'aninga te aba taekaia n aki toki. N na bon kamaunaiia naba aia burabeti nako ma tamnei aika a kam'araa akana a tautaekaniia.

³Ngkana arona b'a a manga kaoti burabeti aikai, a na kauringaki irouia aia karo b'a a na mate i bukin tataekinan taiani kewe n arau-aran te UEA. Ma ngkana a aki katoka aia taeka burabeti aikai, ao a na riai n tiringaki irouia aia karo n te kabaang.

⁴A na mamaa burabeti aikai ni mii ake a atong b'a taian kaotioti, ao a na aki keweia aomata ni kunnikaiia kaanga te burabeti ni koaua.

⁵Ma a nang taetae ni kaangai, “Bon tiaki te burabeti ngai. Bon te tia ununiki ngkoa ngai man taai aika a nako ni karokoa ngkai.”[44]

⁶Ao ngkana iai mai buakoia ae e titiraki b'a e aera ngkai a ikoaki,[45] ao a na kaeka ni kaangai, “E riki ngkoa n aia auti raoraora ake tabeman.”

⁷E taku te UEA ae Moan te M'aaka: Uti, Au kabaang! Buakana au tia kaawakin tiibu ao raoraou. Orea te tia kaawakin tiibu ni kab'akaa! Kamaaenakoia tiibu aika uarereke, ao N na uruaniia.

⁸A na mate man te aba uoua te katenim'akoro, ao a na maiu te katenim'akoro.

⁹Ao i mwiina, N na kaitiakia ma ni karaoia b'a a na kataaki, kaanga te koora ma te tirewa ngkana a kaitiakaki ma n tuoaki. Ane a na tataro n arau, ao N na kaekaia. N na kaangai, “Au aomata ngkami,” ao a na kaeka ni kaangai, “Bon te UEA Ngkoe ae Atuara!”