Read Te B'aib'ara Tekaria 7 Bible Online

Tekaria 7 - Te B'aib'ara bible

Tekaria 7

¹Ni kaauan bongin Kitirewi, n te karuaiwa n nam'akaina n ana kaaua n ririki n uea Taraiati i aon Botia,[26] ao E taetae te UEA nako iu.

²E riki i mwiina ngke a tia kaain Betaera ni kanakoa Tiaretera ma Rekem-Mereka ma ana m'aane b'a a na buubutiia te ibonga i nanon ana Tembora te UEA ao te burabeti b'a a na tataro i bukiia.

³Ma ngaia are, a tataro, “Tao ti na tanginiwenei ma n aki mamatam i nanon te kanimaua n nam'akaina,[27] n aron are ti karaoia n ririki aika a b'aka nako?”

⁴Ao bon anne te tai are E tuangai iai te UEA ae Moan te M'aaka b'a N na kaangai nakoia aomata ni kabane n te aba arei, n reitaki ma ibonga:

⁵I nanon itibwi te ririki ao kam a tia n aki mamatam i nanon te kanimaua ao te kaitiua n nam'akaina n te ririki. Ma kam bon karaoia raoi i buku?

⁶Ao ngkana kam am'arake ma ni mooi, tiaki bon i bukin kakukureiami?

⁷Bon ti te bo naba au rongorongo n te bong aei ma are I tuangiia burabeti ake mai m'aaina[28] b'a a na taetae nakon Ierutarem ma kaawana nako ngkana e maiu raoi, ao ngkana e bane Iuta, n reitaki ma te Rereua are i Maiaki ao te aba are e tabukibuki, n onrake irouia aomata.

⁸Ma ngaia are, I a manga tuangkami riki Ngai ae te UEA ae Moan te M'aaka ni kaangai,

⁹“Kakoaua raoi b'a e na karaoaki raoi te eti ao b'aina te akoi ao te nanoanga i marenami nako!

¹⁰Kam na aki karaoa ae e aki raoiroi nakoia aine aika a mate buuia ke ataei aika a akea aia karo ke iruwa ke temanna ae e maiu ni kainano, ao katoka iangoan m'akuri n iowawa temanna nakon temanna.

¹¹Ma aomata nako aika a ongo irouia burabeti aikai, a bon taningabono ma n rawa ma n aki ongotaeka irou.

¹²Ma a tannako mani b'aai nako ao ni kamatoatoai nanoia kanga atiibu. MA a bon aki kan ongo ni baike ake a tuangaki irouia burabeti ake mai m'aaina b'a a na kab'arab'araa. Ma ngaia are, E a maraki nanou

¹³ao I a kaangai, “Kam aki tabe ngkami aika aomata ngkana I weteingkami, ao ngkai N na aki kan ongo ngkana kam weteai.”

¹⁴Ao bon anne bukina ngkai I roko ma te ukeuke n anti ao I kamaaenikuniia nakon aia botannaomata nako ianena, ma ni kiitana abaia ae e tangiraki n akea kaaina ao n urubekebeke.