Read Te B'aib'ara Tekaria 8 Bible Online

Tekaria 8 - Te B'aib'ara bible

Tekaria 8

¹E taku te UEA ae Moan te M'aaka nako iu:

²I rangi n tangira Tion n te aro are I a un irouia ana kairiribai.

³N na okira Ierutarem ma ni maeka ikekei i aon te Maunga are Tion. Ao ane e na ataaki iai b'a te kaawa ae e kakaonimaki, ao e na ataaki Tion b'a te maunga ae e tabu.

⁴A na manga tekateka ni katobibia Ierutarem unim'aane ma okoia,

⁵ngke a tabe n takaakaro ataeinim'aane ma ataeinaine i nanon kawain nako te kaawa.

⁶E na taraa ni kangaanga aei irouia au aomata aika a tiku, ma e a aki kangaanga irou, Ngai ae te UEA ae Moan te M'aaka.

⁷N na kamaiuia aika a anaaki nakon aaba ake i mainiku ao i maeao,

⁸ao N na uotiia ni kamaekaia i Ierutarem. A na riki b'a au aomata, ao N na riki b'a Atuaia, ae E kakaonimaki ni karaoa te eti.

⁹Bon te UEA Ngai ae Moan te M'aaka! Ma ngaia are, kam na aki b'arannano. Kam na iangoi au rongorongo ake a taekin au burabeti ngke e moan kaweneaki aan te Tembora.

¹⁰I m'aain rokon te tai anne, bon akea aomata ao akea maan aika a anganaki kaniwangaia i bukin aia m'akuri, ao bon akea temanna ae e rau n te tabo teuana, i bukina ngke I kaaitaraia n tatabemaniia nako.

¹¹Au aomata, ti tabeman mairoumi aika a tiku, ao I berita b'a N na aki katuaaia n aron are I karaoia rimoa.

¹²Ma n onea mwiin anne, N na kakoauaa b'a a na unikaki uita ma te rau ao ami nne n aroka ni kureebe a na kariki uaa, ao a na maiu raoi ami tawaana ao e na b'aka te aoi mai karawa.

¹³Kaain Iuta ma Iteraera, kam a tia n riki b'a b'ai ni kamaraia nakoia botannaomata nako, ma N na kamaiungkami ma ni kairingkami b'a te b'ai ni kakab'aia nakoia. Ma ngaia are, kam na aki maaku ke ni kabuai nanomi.

¹⁴Ngkana a kaunai ami bakatibu, I iangoia b'a N na katuaaia n taiani kabuanib'ai, ao I aki manga bita nanou.

¹⁵Ngkai kam aki manga riai ni maaku. I a tia ni iangoia b'a N na akoa Ierutarem ma Iuta.

¹⁶Ma kam riai n b'ab'aina te koaua i marenami n tatabemaningkami nako, ao kam na anga te babaaire ae e eti n te kabowi are e na karekea te rau.

¹⁷Kam na bon aki naba iangoi iango aika buakaka i marenami n tatabemaningkami ke n taekina te kewe ngkana kam berita. I ribaai baikai Ngai ae te UEA.

¹⁸E tuangai te UEA ae Moan te M'aaka b'a N na kaangai:

¹⁹Kaain Iuta, I tangiria Ngai ae te UEA b'a ngkana kam aki mamatam are aron ami taromauri, ao kam na riai ni karaoia b'a te tai ni bootaki ni kukurei. E aoria ngkana te kaaua n nam'akaina, ke te kanimaua n nam'akaina, te kaitiua n nam'akaina ke te katebwina, ma kam na riai ni karaoa te toa ae e kakukurei. Ma ngaia are, kam na tangira te koaua ao maeka i nanon te rau.

²⁰I tuangkami b'a ae a na roko ikai aomata mani kaawa ao taabo nako.

²¹Kaain te kaawa teuana ana manga nakon te kaawa are teuana ao a na kaangai, “Ti nang nako ni butiia te UEA ae Moan te M'aaka b'a e akoira. Nakomai iriira.”

²²A na roko aomata man botannaomata aika a korakora nako Ierutarem n taromauriai ma ni butiai b'a N na akoia.

²³Ane a na taua bain te I-Iutaia tengaun aomata man botannaomata aika a kakaokoro aia taetae ao a na kaangai, “Ti na iriko. Ti a tia n ongo b'a E tei Atuami i bukimi.” Bon aei Au taeka Ngai ae te UEA ae Moan te M'aaka!