Read Te B'aib'ara Mataio 19 Bible Online

Mataio 19 - Te B'aib'ara bible

Mataio 19

¹Ngke E a tia Iesu n atongi taeka aikai ao E kitana Kariraia, ao E nako n aaba ake i Iutaia ake n iteran te Ioretan are te iterana;

²ao a iria aomata aika rangi ni m'aiti, ao E kamaiuia ake a aoraki.

³Ao a nako Ina B'aritaio tabem'aang, ao a kani kam'anea n aia titiraki ae kangai, “Iai riaina i aan te tua b'a e na raure te mm'aane ma buuna n aron are e bon taku?”

⁴Ao E kaekaia Iesu ni kangai, “Tiaki kam a tia ni wareka taekan Teuare karaoia aomata ni moani karikan aonnaba, b'a E karaoia b'a te mm'aane ao te aine,

⁵ao E kangai, Ni bukina aei, ao e na kitana tamana ma tinana te mm'aane ao e na katiteuanaki ma buuna, ao a na riki n ti te irikona naka uoman.[57]

⁶Ma ngaia ae ai tiaki uoman ngaiia ma ai ti te irikona. Ma ngaia aei, b'a akana E reitiia te Atua, ao akea te aomata ae na kona ni karaureiia.”

⁷A taku B'aritaio nako Ina, “E aera ngkanne ngke e tua Moote b'a te mm'aane are kan raure ma buuna, ao e riai n angani buuna te beb'a n raure, ao e na kanakoa?”

⁸E taku nako ia, “E kariaingkami Moote b'a kam na raure ma buumi i bukini matoatoan nanomi, ma tiaki aei arona mani moan rikin aonnaba.

⁹Ao I taku nako imi, b'a ane raure ma buuna ao e aki wene ni bure neierei,[58] ao ngkana e a manga iein teuarei ma te aine temanna, ao e wene ni bure iai.”[59]

¹⁰A taku nako Ina ana reirei, “Ngkana aei aron te mm'aane ma buuna, ao e a raoiroi riki te aki iein.”

¹¹Ao E taku Iesu nako ia, “Anne te aro ae kona ni karaoaki, ma tiaki irouia aomata nako, b'a ti ake E a tia te Atua ni kataua i bukiia.

¹²B'a iai aomata ake aki kona n iein i bukina b'a bon rikiia mai nanoni biroton tinaia; ao iai tabem'aang ake a karaoaki[60] irouia aomata b'a a na aki kona n iein; ao tem'angina a kataua te aki iein i bukin Uean te Atua. Ane kona ni butim'aea te koaua aei, ao ke e taua.”

¹³Iai aomata ake a nikiria ataei iroun Iesu b'a E na kaki baina i aoia, ao E na tataro i bukiia. A takuia aomata akekei ana reirei Iesu;

¹⁴ma E taku Iesu, “Kanakomaia ataei nako Iu, ao tai tukiia; b'a Uean te Atua bon aia b'ai aomata aika ai aroia ataei aikai.”

¹⁵Ao E kaki baina i aoia, ao E nako.

¹⁶Ao noria, e roko te aomata temanna iroun Iesu, ao e taku, “Te Tia Reirei, tera ae raoiroi ae N na karaoia, b'a e aonga n reke iai i rou te maiu are aki toki?”

¹⁷Ao E taku Iesu nako ina, “Ko aera ngkai ko titirakinai b'a tera ae raoiroi? Bon ti Temanna ae raoiroi. Ngkana ko kan rin n te maiu are akea tokina, ao ko na tou mwin taian tua.”[61]

¹⁸E taku nakon Iesu, “Aika tuua ra?” Ao E taku Iesu, “Ko na tai kamateia aomata, Ko na tai wene ni bure,[62] Ko na tai ira, Ko na tai anga am kaotioti ae kairua b'a taekan temanna,

¹⁹Ko na karinea tamam ma tinam, ao, Ko na tangira ane maeka n ua kaani ma ngkoe n ai aron tangiram i bon i roum.”

²⁰E taku te rorobuaka n ataei arei nako Ina, “I a tia n tou mwin tuua akanne; tera riki ae I riai ni karaoia?”

²¹E taku Iesu nako ina, “Ngkana ko kan riki ni moan te raoiroi, ao ko na nako ni kabo nako am b'ai akana iai i roum, ao booia, anganiia akana akea aia b'ai, ao ane na reke i roum iai am b'ai i karawa. Ao nako mai, irirai.”

²²Ngke e ongo taeka aikai te rorobuaka arei, ao e nako ma rawawatan nanona, b'a a bati ana b'ai.

²³Ao E taku Iesu nakoia ana reirei, “E koaua ae I a tuangngkami, b'a e na rangi ni kanganga rinin ane kaub'ai n Uean te Atua!

²⁴Ao I a manga taku nako imi, b'a e kai rin nako riki te kamero ni b'angab'angan te neiran nakon ane kaub'ai, ngkana e kan rin n Uean te Atua.”

²⁵Ngke a ongo aei ana reirei, ao a rangi ni mimi, ao a taku, “Antai ngkanne ae na kona ni kamaiuaki?”

²⁶Ao E tarataraia Iesu ao E taku nako ia, “A aki kona ni kamaiuia aomata i bon i rouia, ma a konaki b'aai nako iroun te Atua.”

²⁷E kaeka ngkanne Betero ao e taku, “Noria, ti a tia ni kitani b'aai ni kabane, ao ti iririko; tera ngkanne ae ti na karekea b'a ara b'ai?”

²⁸E taku Iesu nako ia: E koaua ae I a tuangngkami, b'a ngkana E tekateka Natin te Aomata i aon ana kaintokanuea are tamaroa, n te aonnaba ae boou[63] ao ngkami, aika kam irirai, ane kam na tekateka naba i aoni kaintokanuea aika tebwi ma uoua, n tautaekaniia aia baronga Iteraera ake tengauni ma ua baronga.

²⁹Ao ane e a tia ni kitana mwengana, ke tarina, ke m'anena, ke tamana, ke tinana, ke natina, ke abana i buku, ao e na karekei kaka tebubua riki[64] m'aitini baike e a tia ni kitan, ao e na reke i rouna te maiu are aki toki.

³⁰Ma a m'aiti aika mena i moa aika a na riki ni kabane, ao aika mena n te kabane aika na riki ni mena i moa.