Read Te B'aib'ara Mataio 24 Bible Online

Mataio 24 - Te B'aib'ara bible

Mataio 24

¹E kitana te um'antabu Iesu, ao a roko i Rouna ana reirei ao a kangai, “Tarai taini kateitei aikai!”

²Ao E kaekaia Iesu ni kangai, “Tiaki kam nori baikai ni kabane? E koaua ae I a tuangngkami b'a ane e na bon aki tiku ikai te atibu teuana i aon te atibu teuana; a na bane ni kab'akaki.”

³Ngke E tekateka Iesu i aon te maunga are Oriweta, ao a nako Ina ana reirei ngke ti ngaiia, ao a kangai, “Ko na tuangiira b'a e na roko n ningai? Ao tera kanikinaean rokom ma tokin aonnaba?”

⁴Ao E kaekaia Iesu ni kangai: Kam na tarataraingkami b'a ane a na burebureingkami aomata.

⁵B'a a m'aiti aomata akana a na roko n arau, ao a na kangai, Bon te Kristo ngai; ao ane a na burebureia aomata aika bati.

⁶Ane kam na ongora karongoaan taiani bo ni buaka aika kaan, ma rongorongon taiani bo ni buaka aika raroa nako; kam na tarataraingkami b'a kam na aki maaku; a na riki baikai, ma tiaki nanona b'a e a roko te toki.

⁷B'a ane na tei rake te aba teuana ni buakana te aba teuana, ao te tautaeka teuana ni buakana te tautaeka teuana; ao ane a na roko roongo ma m'aeiein te aba n taabo nako.

⁸Baikai ni kabane kaanga ai aroni moani maraki ake a namakinaki n ana tai te ataei ni bungiaki.

⁹Ao ngkana a riki baikanne, ao ane a na anga ngkami b'a kam na karawawataki, ao ane a na kamateingkami; ao ane kam na ribaki irouia botannaomata ni kabaneia i bukin arau.

¹⁰Ane a na akea aia onimaki aomata aika bati, ao ane a na i kam'am'ane ao a na i kairiribai.

¹¹Ao ane a na teirake burabeti ni kewe aika bati, ao ane a na burebureia aomata aika bati.

¹²Ane a na toki aia tangira aomata i bukina ngkai e kam'aitaki te buakaka.

¹³Ma ane nanom'aka ni karokoa te toki, ao e na kamaiuaki.

¹⁴Ao ane e na tataekinaki euangkerion Uean te Atua i aonnaba ni kabuta, b'a a aonga n reke aia tai ni butim'aia aomata nako; ao ngkanne ai tib'a ana tai te toki are e na roko iai.

¹⁵Ma ngaia aei, ngkana kam nora te baere kakamaaku are e taekinna Taniera are te burabeti, b'a e tei n te tabo are tabu n te um'antabu (ke e ataia te tia wareware),

¹⁶ao akana mena i Iutaia ke a biri nako ni maunga;

¹⁷ane mena i aon taubukin ana auti ao e na aki ruo n anaa ana b'ai are mena i nanon te auti;

¹⁸ao ane mena n abana e na aki oki n anaa ana kabaraki.

¹⁹Ao ai kawara ake iai natiia aika uarereke, ao ake a kamammai natiia ni boong akanne!

²⁰Kam na tataro b'a kam na aki biri nako n tain te m'aitoro ke te Taabati.

²¹B'a n te tai anne ao e na iai te rawawata ae bati ae akea n aia arona ma ngke e moa n riki aonnaba ni karokoa ngkai; bon akea n ai arona, ao a na bon akea naba nakoni boong aika rimwi.

²²Ao ngke arona b'a a aki kakimototoaki boong akanne, ao bon akea te aomata ae na maiu; ma a kakimototoaki i bukiia ana aomata te Atua ake E a tia n rineia.

²³Ao ngkana tao e kangai temanna nako imi, “Noria, kai aei te Kristo!” Ke, “Kai arei!” Ao tai ira nanona.

²⁴B'a ane a na kaoti taiani Kristo ni kewe ma burabeti ni kewe, ao ane a na kaoti kanikina aika ab'ab'aki ma b'aai ni kamimii, b'a a na burebureia ana aomata te Atua ake E a tia n rineia, ngkana a konaiia.

²⁵Noria, I a tia n tuangngkami ngkai a tuai n roko.

²⁶Ma ngaia aei, ngkana a kangai nako imi, Noria, E mena n te rereua, ao kam na aki nako iai; ao ngkana a kangai, Noria, E mena i nanon ruu, ao tai kakoaua aia taeka!

²⁷B'a aron te iti ngkana e iti mai mainiku, ma n oota ni wairio, ao ai aron naba rokon Natin te Aomata.

²⁸Ike e mena iai te rab'ata ae mate, ao a na ikotaki naba iai taian ikare.

²⁹I mwin naba te rawawata ni boong akanne, ao e na karooaki ootan taai, ao a na akea ootana; ao nam'akaina e na aki oota, ao ane a na b'aka itoi mai karawa, ao m'aaka ake a mena i karawa a na bitaki man aroaroia.

³⁰Ao ane na kaoti kanikinaean Natin te Aomata i karawa, ao ane a na bane n tang kaain aonnaba, ao a na nora Natin te Aomata b'a E nako mai aon nangini karawa ma te m'aaka ao te mimitong ae bati;

³¹ao ane E na kanakoia ana anera n tangin te buu ae tangi m'aaka, ao a na botiia ana aomata te Atua ake E a tia n rineia man taabo nako i aonnaba.

³²Kam na karekea reireiami man te kai ae te biku. N te tai naba are e ubuubu iai m'angana ao a kaoti baana, ao kam na ataia iai b'a e a kaan taini bongin te kabuebue.

³³Ao ai aromi naba b'a ngkana kam nori baikai ao kam na ataia iai b'a E a kaan, E a tauraoi n roko.[86]

³⁴E koaua ae I a tuangngkami b'a a na bane n riki baikai i m'aini mateia aomata nako aika maiu ngkai.

³⁵A na mauna karawa ma aonnaba, ma a na aki kona ni mauna au taeka.

³⁶Ma akea ae ata rokon te bong arei, ma te aoa arei, ao a aki ataia naba anerani karawa; ao E aki ataia te Nati,[87] ma ti te Tama ae ataia.

³⁷Ao ai aron ana bongi Nooa rokon Natin te Aomata:

³⁸b'a ni boong ake i m'ain te ieka ngke a am'am'arake aomata ma ni momooi, ma n iein ni karokoa te bong are e rin iai Nooa n te kaibuke,

³⁹ao akea te bae a ataia ni karokoa e roko te ieka ao e uotiia nako ni kabaneia; ao ai arona naba ngkana E roko Natin te Aomata.

⁴⁰Ao ane a na mena uoman te mm'aane n te aba ae unikaki: e na uotaki nako temanna, ao e na katukaki temanna.

⁴¹Ane a na tabe uoman te aine ni kamantinta te buraawa n te atibu: e na uotaki nako temanna, ao e na katukaki temanna.

⁴²Ma ngaia ae kam na kamarurungngkami n tantani, b'a kam aki ata te bong are E na roko iai te Uea.

⁴³Ma kam na ata aei, b'a ngke arona b'a teuare ana auti te auti e a kaman ataia b'a n ningai te tai are e na roko iai te tia ira, ao e na bon tantani, ao e na aki angan te tia ira ana tai ni karekea kawaina n urua te auti b'a e na rin iai.

⁴⁴Ma ngaia ae kam riai naba ni b'aina te tauraoi; b'a ae E na roko Natin te Aomata n te aoa are kam aki kaantaningaia iai.

⁴⁵Antai ngkanne te toro ae kakaonimaki ae wanawana, ae kateaki iroun ana toka b'a e na teiakiniia kaain ana auti te toka anne n anganganiia kanaia n aia tai?

⁴⁶E a kab'aia te toro ae e noria ana toka ngkana e okira mwengana b'a e tabe n ana m'akuri!

⁴⁷E koaua ae I a tuangngkami b'a ane e na karika te toro arei b'a mataniwin ana b'ai nako.

⁴⁸Ma ngkana te toro ae buakaka ngaia, ao ane na kangai i nanona, E waeremwe n roko au toka;

⁴⁹ao e moana batiboaia raona nako n toro, ao e am'arake ma ni moi ma ake a roko ni manging.

⁵⁰Ane na roko ana toka te toro arei n te bong are e aki kaantaningaia te toro, ao n te aoa ae e aki ataia,

⁵¹ao e na kataerea ni karawawataa,[88] ao e na kaki i rarikiia taani m'am'ana-te-aba, n te tabo ike a na tang iai aomata ma n tenai riaia b'a kaotan ae a rotaki n te maraki ae korakora.