Read Te B'aib'ara Mataio 27 Bible Online

Mataio 27 - Te B'aib'ara bible

Mataio 27

¹Ngke e a tib'a ingabong, ao ibonga ake mataniwi ma aia unimm'aane aomata a iangoa aron Iesu b'a a na kamatea.

²Ao a kabaea, ao a kairia nako, ao a angani Birato are te tia tau-taeka.

³Ao Iuta, are kam'anea Iesu, ngke e noria b'a E kabuakakaki Iesu ao b'a E na kamateaki, ao e rotaki n te nanokawaki i bukin te baere e a tia ni karaoia. E uoti m'ane ake tirewa ake tenibwi ao e kaoki nakoia ibonga ake mataniwi ma unimm'aane;

⁴ao e taku, “I a tia ni bure ngke I kam'anea te aomata ae akea ana bure.” Ao a taku, “Tera ara b'ai iai? Ai bon am b'ai anne!”

⁵Ao Iuta e karenako m'aane ake tirewa ake tenibwi nako aontano i nanon te ruu are tabu n te um'antabu, ao e kitana ikekei; ao e nako ni kabaea roroana.

⁶Ao ibonga ake mataniwi a anai m'ane ake tirewa, ao a taku, “E aki riai i aan te tua b'a a na katukaki m'aane aikai n te um'antabu, i bukina ngkai m'aane aika booni maiun te aomata.”

⁷Ngke e a reke aia iango iai, ao a kamanena ni kaboa iai aban te tia karao-b'aata,[97] b'a nneia iruwa n taunaki.

⁸Ma are e a atoatongaki te aba arei b'a “te Aba n Raraa” ni karokoa te bong aei.

⁹E a kakoroaki ngkanne bukin are e a tia n taekinna te burabeti are Ieremia, ngke e kangai, “Ao a anai m'aane aika tirewa aika tenibwi, b'a boon temanna te aomata i buakoia te botannaomata ae Iteraera.

¹⁰Ao a kamanena ni kaboa iai aban te tia karao-b'aata, n ai aron ana taeka te Uea nako iu.”

¹¹E tei Iesu i matan te tia tau-taeka; ao e titirakina Iesu, ni kangai, “Aia Uea I-Iutaia Ngkoe?” E taku Iesu, “Ngaia ane ko taku!”

¹²Ma ngke a tabeki aia taeka ni bukibuki ibonga ake mataniwi ma unimm'aane, ao akea ana kaeka Iesu ae anga.

¹³E taku ngkanne Birato nako Ina, “Ko aki ongo aia taeka aika bati ae a bukiniko iai?”

¹⁴Ma akea ana kaeka ae E anga naba teutana; ma ngaia are e rangi ni mimi i Rouna Birato.

¹⁵E tataneiai te tia tau-taeka ni katoa tain te Toa are te Riao ni kainaomata te bure temanna are a tangiria.

¹⁶N te tai anne ao iai te bure temanna ae bati n atoatongaki ae arana B'arab'a.[98]

¹⁷Ao ngke a botaki aomata aika bati, ao e taku Birato nako ia, “Antai ae kam tangiria b'a N na kainaomata i bukimi, B'arab'a ke Iesu are atongaki b'a te Kristo?”

¹⁸B'a e ataia n ae a tia aomata ake a kakannato, ake aia aomata I-Iutaia n anga Iesu nako nanoni baina i bukina b'a a bakantang.

¹⁹Ngke e tekateka Birato n ana tabo are e momotiki taeka iai, ao e kanakoa ana rongorongo buuna nako ina, ae kangai, “Akea te bae kam na karaoia nakon te aomata ane raoiroi anne, b'a I miia ngke e tairiki ao I aki rau iai.”

²⁰A kairoroia aomata ibonga ake mataniwi ma unimm'aane b'a a na bubuti B'arab'a, ao a na tua b'a E na kamateaki Iesu.

²¹E a manga titirakiniia naba aomata te tia tau-taeka, ao e taku, “Antai i rouia uaake uoman aikai ae kam tangiria b'a N na kainaomata i bukimi?” Ao a kangai, “B'arab'a!”

²²E taku Birato nako ia, “Ao tera ngkanne ae N na karaoia nakon Iesu are atongaki b'a Kristo?” A bane n taku, “E na kamateaki n te kaibangaki!”

²³Ao ngaia e taku, “Ao? B'a tera ae buakaka ae E karaoia?” Ao a kanenei riki b'anaaia n takarua ni kangai, “E na kamateaki n te kaibangaki!”

²⁴Ngke e noria Birato b'a akea riki te bae e kona ni karaoia, ao b'a e a moanna n riki te kiriwe, ao e anaa te ran, ao e teboki iai baina i mataia aomata, ao e taku, “N na aki bukinaki ni maten te aomata aei;[99] kam na bukinaki iai!”

²⁵Ao a bane ni kaeka aomata ni kangai, “E na mena i aora, ao i aoia ara kariki, te bukinaki i bukini matena!”

²⁶E a kainaomataki ngkanne B'arab'a irouni Birato n aron are a tangiria aomata. Ao ngke E a tia ni kataereaki Iesu, ao e anga b'a E na kamateaki n te kaibangaki.

²⁷Ao E kairaki Iesu irouia ana tautia mataniwin te tautaeka nako nanon te Beritoriam, ao a baneakinna tautia ake a mena ikekei.

²⁸Ao a buuti kunnikaina, ao a kaki te ninira ae ura-roo i aona.

²⁹A karaoa te m'ae ni kaai aika kateketeke, ao a katokaa i aon atuna; ao a kaki te kai i baina ae angaataina; a katorobubua ngkanne i matana, ao a kakanikoa ni kangai, “Ko na mauri aia Uea I-Iutaia!”

³⁰Ao a bawareia, ao a anaa te kai ao a orea atuna iai.

³¹Ao ngke a tia ni kakanikoa, ao a buuta te ninira mai aona, ao a manga karini kunnikaina i aona, ao a kairia nako b'a a na kamatea n te kaibangaki.

³²Ngke a toua kawaia n oti nako, ao a bo ma te I-Kurene temanna, ae arana Timon; ao a kairoroa tautia b'a e na uota te kai are E na tauraki iai Iesu.

³³Ao ngke a roko n te tabo ae arana Korokota[100] ae nanona, te “Tabo n Tab'anou”.

³⁴Ao a angan Iesu te wain, ae renganaki ma te b'ai ae mao. Ma ngke E katongnga teutana, ao E aki kan nimma.

³⁵Ao ngke a tia n taura Iesu n te kaibangaki, ao a tib'ai kunnikaina i marenaia n te aro ni kaiwa.

³⁶A tekateka ngkanne ikekei, ao a tantani i rarikina.

³⁷A kaki i etan atuna te koroboki ae taekani bukinana, ae kangai, “Iesu Teuaei Ae Aia Uea I-Iutaia.”

³⁸Ao a tauraki ma Ngaia uoman taani kam'arua, temanna i angaataina ao temanna i angamaingina.

³⁹Ao aomata ake a rikekei a taetae n iowawa nako Ina, ao a kaenaena

⁴⁰ao a kangai, “Ngkoe are Ko na urua te um'antabu ni manga kateia i nanon tenibong, Ko na kamaiuko! Ngkana Natin te Atua Ngkoe, ao Ko na ruo man te kaibangaki!”

⁴¹Ao ai aroia naba ibonga ake mataniwi, ma taani koroboki, ma unimm'aane a kakanikoa Iesu ni kangai,

⁴²“E kamaiuia tem'angina, ma E aki kona te kamaiua. Ngkana aia Uea Iteraera, ao ke E ruo man te kaibangaki ngkai, ao ti na onimakinna.

⁴³E onimakina te Atua; ke E kamaiua te Atua ngkai ngkana E tangiria, b'a E kangai ana taeka, Natin te Atua Ngai.”

⁴⁴Ao a taetae naba n iowawa nako Ina taani kam'arua ake a tauraki ma Ngaia.

⁴⁵Ngke e a tawanou, ao e roo aon te aba ni kabane ni karokoa te aoa tenua n te tanimaeaontaai.

⁴⁶Ao ngke tao te aoa tenua, ao E takarua Iesu n te b'ana ae korakora, ni kangai, “Eri, Eri, ram'a tab'aketani?”[101] ae nanona, “Atuau, Atuau, E aera ngkai Ko kitanai?”

⁴⁷Ao aomata tabem'aang ake a teitei n ua kaan ma ikekei, ngke a ongo, ao a taku, “E wetea Eria Teuaei!”

⁴⁸Ao temanna i buakoia e biri ngkekei naba n anaa te tib'anti, ao e katibua n te wain ae kamangingi, ao e kaki i tabon te kai, ao e anganna b'a E na moi iai.

⁴⁹Ma a taku ake raona, “Tataninga, b'a ti na mataku b'a tao e na nako mai Eria ni kamaiua.”[102]

⁵⁰Ao E a manga takarua naba Iesu n te b'ana ae korakora, ao E anga tamneina.[103]

⁵¹Ao noria, e raeuaki nakoni m'akoro aika uoua te kunnikai are rokin te ruu are tabu n te um'antabu, mai eta nako nano; ao e m'aeiei aon te aba, ao a tabwenaua taiani b'a;

⁵²a kaukaki nneia maate, ao a m'aiti aomata aika raoiroi ake a tia ni matu[104] aika manga kamaiuaki.

⁵³A oti nako mani nneia maate i mwini manga-utin Iesu, ao a nako n te kawa are tabu,[105] ao a kaoti nakoia aomata aika bati.

⁵⁴Ngke e nora m'aeiein te aba ma baike a riki mataniwin te taanga ni buaka are tebubua kaaina, ao a noria naba raona ake a tantani i rarikin Iesu, ao a taonaki n te maaku ae korakora; ao a taku, “Bon te koaua b'a Natin te Atua Teuaei!”

⁵⁵A m'aiti naba ikekei aine aika mataku mai kiraroa; ao aine akekei a ira Iesu mai Kariraia ni buokia.

⁵⁶I buakoia aine akekei bon Nei Maria are te I-M'aketara, ma Nei Maria are tinan Iakobo ma Ioteb'a, ao ai te aine are tinaia mm'aane ake natin Tebetaio.

⁵⁷Ngke e a tairiki, ao e roko temanna te aomata ae kaub'ai mai Arimataia; aran teuaei Ioteb'a, ao bon temanna naba ngaia ana reirei Iesu.

⁵⁸E nako ni Birato, ao e butiia rab'atan Iesu. E tua ngkanne Birato b'a e na anganaki Ioteb'a rab'atan Iesu.

⁵⁹Ao Ioteb'a e anaa rab'atan Iesu, ao e niria n te kunnikai ae itiaki,

⁶⁰ao e kawenea n ana nne ni mate ae boou, ae e ekea i nanon te b'a; ao e karabinoa te atibu ae rangi ni buubura ni kaki i matan te nne ni mate, ao e nako.

⁶¹A tekateka ikekei Nei Maria are te I-M'aketara ma Nei Maria are temanna, ni kaitaraa te nne ni mate.

⁶²N te bong are i mwina, are bongin te Taabati,[106] ao a botaki ma Birato ibonga ake mataniwi ma B'aritaio,

⁶³ao a taku, “Teuae karineaki, ti uringa ana taeka te tia bureburea-te-aba arei, ngke E kangai n ana tai ni maiu: I mwin tenibong, ao N na manga uti.

⁶⁴Ma ngaia ae ko na tua b'a e na tararuaki raoi te nne ni mate ni karokoa te katenibong, b'a a kawa n roko ana reirei n iraea, ma ni kangai nakoia aomata: E a manga uti mai buakoia maate; ao ane na buakaka riki te aro ni bureburea te aba aei nakon are mai m'aina.”

⁶⁵E taku Birato nako ia, “Kaira te tautia, ao kam na nako n taraia b'a e teiakinaki raoi rarikin te nne ni mate n aron ae kam kona.”

⁶⁶Ao a nako, ao a kamatoa te nne ni mate arei, ao a kaki te kanikina i aona ni kaotia iai b'a akea ae na kam'akura te atibu; ao a katikuia tautia ikekei b'a a na tantani i rarikin te nne ni mate.