Read Te B'aib'ara Mataio 4 Bible Online

Mataio 4 - Te B'aib'ara bible

Mataio 4

¹E kairaki rake ngkanne Iesu iroun te Tamnei are Raoiroi nakon te rereua b'a E na kaririaki iroun te riaboro;

²ao E aki mamatam angaun te ngaina ao angaun te bong, ao rimwi E baki.

³Ao E kawaria te riaboro ao e taku nako Ina, “Ngkana Natin te Atua Ngkoe, ao Ko na tua b'a a na riki ni kariki atiibu aikai.”

⁴Ao E kaeka ni kangai, “E koreaki ae kangai, ‘E aki maiu te aomata n ti te am'arake, ma e maiu n taeka nako aika oti nako mai wiin te Atua.’ ”

⁵Ao e kairia ngkanne te riaboro nako Ierutarem, ao e kateia n te tabo ae te kabanea n rietaata i taubukin te um'antabu,

⁶ao e taku nako Ina, “Ngkana Natin te Atua Ngkoe, ao Ko na ewe nako, b'a e koreaki ae kangai: ‘E na mwiokoia ana anera b'a a na tabeakiniko; ao a na tabekiko ni baiia, b'a e kawa n toki waem n te atibu.’ ”

⁷E taku Iesu nako ina, “E koreaki naba ae kangai, ‘Ko na tai kataa te UEA ae Atuam.’ ”

⁸Ao e a manga kairia te riaboro nakon te maunga ae moan te rietaata, ao e kaoti nako Ina aaba ni kabane ma tamaroaia;

⁹ao e taku nako Ina, “N na anganiko baikai ni kabane ngkana Ko katorobubua ni bobaraaki n taromauriai.”

¹⁰E taku ngkanne Iesu nako ina, “Naako akuu, Tatan! B'a e koreaki ae kangai, ‘Ko na taromauria te UEA ae Atuam, ao ko na toro i Rouna n ti Ngaia!’ ”

¹¹E kitanaki ngkanne Iesu iroun te riaboro; ao noria, a roko anera ni buokia ni baike E kainanoi.

¹²Ngke E ongo Iesu b'a e a tia n tauaki Ioane b'a te bure, ao E nako Kariraia.

¹³E kitana Natareta, ao E nako ni maeka i Kaberenaum are mena i rarikin te nama, n taabo ake abaia baronga ake Teburun ma Nabetari,

¹⁴b'a e aonga ni kakoauaki are atongaki iroun Itaia are te burabeti, ngke e kangai:

¹⁵“Aaba ake aia b'ai baronga ake Teburun ma Nabetari, ake a mena n te kawai nakon te nama, ake n tanimaeaon te Ioretan, are Kariraia, bon abaia Tientaire!

¹⁶A nora te oota ae te oota ae korakora aomata ake a tekateka n te roo; ao e kaoti te oota nakoia ake a tekateka i aban te mate ao i nuuna.”

¹⁷ Ao man te tai arei ao E moa n reirei Iesu, ao E taku, “Kam na rairi nanomi, b'a e a kan roko Uean te Atua!”

¹⁸Ngke E nakonako Iesu i rarikin namani Kariraia, ao E noriia taari mm'aane aika uoman, are Timon are arana teuana Betero, ao Anterea are tarina, ngke a kab'aka te karaun n te nama; b'a taan akawa ngaiia.

¹⁹Ao E taku nako ia, “Mai ri mwiu ao N na karaoingkami b'a taan akawaia aomata.”

²⁰A kitan naba aia karaun ao a iria.

²¹Ngke, E wakina nako riki kawaina maikekei, ao E a manga noriia taari-mm'aane aika uoman are Iakobo ma Ioane ake natin Tebetaio. A mena n aia booti ma tamaia are Tebetaio, b'a a bonobonoti raeuakin aia karaun; ao E weteia.

²²Ao a kitana naba te booti ma tamaia, ao a iria.

²³E kabuta Kariraia n reirei ni m'aneabaia I-Iutaia, ao n tataekina euangkerion Uean te Atua; ao E katoki aoraki ni kabane, ao mamara ni kabane i buakoia aomata.

²⁴E taona Turia ni kabuta rongorongon Iesu, ao a bane n uotaki nako Ina aomata aika aoraki n aekan aoraki nako ma maraki, ao akana taniaki irouia taimonio, ma akana iai aorakin aia iango, ma akana aki kona te nakonako; ao E kamaiuia.

²⁵Ao a iria aomata aika rangi ni m'aiti mai Kariraia ao Tekabori, mai Ierutarem, Iutaia, ao mai mainikun Ioretan.