Read Te B'aib'ara Mataio 5 Bible Online

Mataio 5 - Te B'aib'ara bible

Mataio 5

¹Ngke E noriia aomata aika rangi ni m'aiti Iesu, ao E ararake n te maunga, ao E tekateka, ao a nako Ina ana reirei;

²ao E moanna n reireiia, ni kangai:

³A a kab'aia akana nanorinano, b'a aia b'ai Uean te Atua.

⁴A a kab'aia akana nanokawaki, b'a a na kabebeteaki nanoia.

⁵A a kab'aia akana a nimamamanei b'a a na abana te aba.

⁶A a kab'aia akana b'aruua te raoiroi mani kani mooi iai b'a a na ngae.

⁷A a kab'aia akana nanoanga, b'a a na nanoangaaki.

⁸A a kab'aia akana itiaki nanoia, b'a a na nora te Atua!

⁹A a kab'aia taan raoi, b'a a na atongaki b'a natin te Atua.

¹⁰ A kab'aia akana b'ainikirinaki i bukini karaoan nanon te Atua, b'a aia b'ai Uean te Atua.

¹¹“Kam a kab'aia ngkana a taetaebuakaingkami aomata, ma ni b'ainikiriningkami, ma n atonga te taetae ae kewe ae buakaka b'a taekami i bukin ae au aomata ngkami.

¹²B'a a b'ainikiriniia burabeti ake a maiu i m'aimi n te aro naba aei. Kam na kukurei, ao kim'areirei, b'a a bati b'aai n tituaraoi ae E katauraoi te Atua i bukimi.

¹³Ai aron taoron te aonnaba ngkami; ma ngkana e mauna taorona, ao e na taoronaki n tera? Akea te b'ai ae e na bongana nako iai, ma ti te teweaki nako, ao ikanne are e a kona n reke ae e toutouaki iai irouia aomata.

¹⁴Ai aron ootan te aonnaba ngkami. E aki kona n raba te kawa ae kateaki i aon te maunga.

¹⁵Ao a aki kaura te taura aomata ni kaki i aan te b'aketi, ma a kaki i aoni nena; ao e nako ootana nakoia aomata ni kabaneia ake n te auti.

¹⁶Ao ai aromi naba, kam na kaoti ami oota i mataia aomata, b'a a na noori ami m'akuri aika raraoi, ao a na neboa Tamami are i karawa iai.

¹⁷Tai taku i nanomi b'a I roko b'a N na urui tuua ake e anga Moote, ma aia taeka n reirei burabeti. I aki roko b'a N na urui, ma I roko b'a N na kakoroi bukiia.

¹⁸B'a e koaua ae I a tuangngkami, b'a ngkai e tuai ni mauna karawa ma aonnaba, ao e na bon aki mauna manin taekan te Tua ae te kabanea n uarereke, ke aron taekana ae te kabanea ni kimototo, i m'ain rikini b'aai nako ake a taekinaki n te Tua b'a a na riki.

¹⁹Ma ngaia aei, b'a ane kamamaraaea m'aakan te Tua teuana ae maraurau riki i buakon tuua aikai, ao e reireiia aomata b'a e a toki manenana, ao e na atongaki b'a moan te mangori n Uean te Atua; ma ane tou mwin tuua aikai n reireiia aomata iai, ao e na atongaki b'a e kakannato n Uean te Atua.

²⁰B'a I taku nako imi b'a ngkami kam aki kakororaoa riki nanon te Atua nakon are a karaoia taani koroboki ma B'aritaio, ao kam aki kona n rin n Uean te Atua.

²¹Kam ongo b'a e atongaki nakoia ami bakatibu, Ko na tai kamateia aomata; b'a ane kamatea te aomata ao e na kateaki n te kabowi b'a e na baireaki taekana;

²²ao Ngai I taku nako imi, b'a ane un nakon tarina,[8] ao e na kateaki n te kabowi b'a e na baireaki taekana; ao ane kangai nakon tarina, Akea warem; ao e na tei i matan te Tanirim b'a e na baireaki taekana iai; ao ane atonga tarina b'a akea uaana ao e na motikaki taekana b'a e na teweaki nako n te ai are i moone.

²³Ma ngaia aei, ngkana ko nang anga am karea nakon te Atua n te baonikarea, ao ngkana ko uringa tarim iai b'a e un i roum i bukin te b'ai ae ko a tia ni karaoia,

²⁴ao ko na kitana am karea iai i rarikin te baonikarea ao naako; karekea moa te raoi ma tarim, ao rimwi ko na oki n anga am karea.

²⁵Ko na bareiko n raoiakina te aomata are na uota taekam nakon te kabowi n te tai are ko mena iai ma ngaia i aoni kawaimi nakon te kabowi, b'a e kawa n anga ngkoe nakon te tia motikitaeka, ao e kawa te tia motikitaeka n anga ngkoe nakon te bureitiman, ao ko kawa ni kakiaki i nanon te karabuuti.

²⁶E koaua ae I a tuangko b'a ko na aki kona n oti nako maiai ni karokoa ko a tia ni kab'aka ni kabane te m'ane are motikaki b'a tuaam.

²⁷“Kam ongo b'a e atongaki ae kangai, ‘Ko na tai wene ni bure’

²⁸Ao Ngai I taku nako imi b'a ane tarataraa te aine n iango i nanona b'a e na wene ni botaki ma ngaia, ao e a tia ni wene ni bure ma ngaia i nanona.

²⁹ Ao ngkana e kairiko matam ane mai ataim nakon te bure, ao ko na autia, ao tewea nako mai roum; b'a e raoiroi riki ngkana akea b'ain rab'atam teuana nakon ae e teweaki nako rab'atam ni kabaneaki nako moone.

³⁰ Ao ngkana e kairiko baim ane ataim nakoni karaoan te bure, ao ko na koreia ni kaaki ao tewea nako; b'a e raoiroi riki ngkana akea b'ain rab'atam teuana nakon ae bane n nako rab'atam nako moone.

³¹ “E atongaki naba ae kangai, ‘Te mm'aane ane kanakoa buuna, ao ke e anganna te beb'a ni buu raure.’

³² Ma Ngai I taku nako imi, b'a ane kaki buuna, ngkana e tuai ni wene ni bure, ao e a karika neierei b'a te tia wene ni bure ngkana e a manga iein; ao te mm'aane are iein ma neiere kakiaki, ao e wene ni bure naba.

³³“Kam ongo naba b'a e atongaki nakoia ami bakatibu, ‘Tai urua am taeka ni bau, ma ko na karaoi b'aai ake ko taetae ni bau iai nakon te Uea b'a ko na karaoi.’

³⁴Ma Ngai I taku nako imi, Tai tuea naba teutana. Tai m'anewea arani karawa ngkana ko tuea, b'a nnen te Atua ae tautaeka iai;

³⁵ao tai m'anewea aran aonnaba, b'a nneni katokaani waena; ke aran Ierutarem b'a ana kawa te Uea are kakannato.

³⁶Ao tai tuea n atuum, b'a ko aki kona ni kamainaina ke ni karorooa te irannatu teaina.

³⁷Ma are kam na taekinna, e na ti kangai, ‘Eng’ ke ‘Tiaki,’ ma ngkana a raka am taeka i aon aikai ao a nako mairoun teuare buakaka.

³⁸Kam ongo b'a e atongaki ae kangai, “Te mata boona te mata, ao te wii boona te wii.”

³⁹ao Ngai I taku nako imi, Tai karaoa te b'ai ae buakaka nakon te aomata are karaoa ae bure nako im b'a booni mwin are e a tia ni karaoia; ma ane booa tabam ane mai ataim, ao raira tabam ane mai maingim b'a e na booia naba;

⁴⁰ao ngkana iai ane kani kateiko i matan te tia moti b'a ko aonga n anganna am kabaraki, ao ko na manga anganna naba niniram.

⁴¹Ao ane kairoroko b'a ko na iria teuana te maire, ao ko na airi ma ngaia uoua.

⁴²Ane butiko, ao ko na anganna; ao ane kan tangoa am b'ai, ao tai rawa.

⁴³“Kam ongo b'a e atongaki ae kangai, ‘Ko na tangiriia raoraom, ao riba am kairiribai.’

⁴⁴Ma Ngai I taku nako imi, Kam na tangiriia ami kairiribai, ao tataro i bukiia akana b'ainikiriningkami,

⁴⁵b'a kam aonga n riki b'a natin Tamami are i karawa iai; b'a E kaota ana taai i aoia akana buakaka ma akana babakanikawai.

⁴⁶B'a ngkana kam tangiriia akana tangiringkami, ao tera te b'ai n tituaraoi ae kam na karekea iai? Tiaki a karaoa naba aei taan anai taekiti?

⁴⁷Ao ngkana kam kamauriia ti kaain te Aro, tao a raka riki aromi iai nakoia aomata nako? Tiaki a karaoa naba aei te koraki ake a tuai n onimakina te Atua?

⁴⁸Ma ngaia ae kam na moanibaan te raoiroi, n ai aron Tamami are i karawa ngkai moanibaan te raoiroi.