Read Te B'aib'ara Mareko 1 Bible Online

Mareko 1 - Te B'aib'ara bible

Mareko 1

¹Moan euangkerion Iesu Kristo are Natin te Atua,[1]

²n ai aron are e koreaki iroun Itaia are te burabeti, ni kangai: “Noria, I kanakoa au tia ua rongorongo ri moam b'a e na katauraoa kawaim;

³B'anaan temanna ae takarua n te rereua ni kangai, ‘Katauraoa kawain te Uea; ao kaeti kawaina nako.’ ”

⁴E kaoti[2] Ioane are te tia B'abetito n te rereua ao e tataekina aron te b'abetito are kaeti ma te rairannano i bukini kab'arani buure.

⁵Ao a bane ni kawaria aomata nako ake a maeka i Iutaia, ma i Ierutarem, ao a b'abetitoaki i rouna n te karaanga are te Ioretan, ngke a kaoti aia bure.

⁶E kunnikaia Ioane ni buraen te kamero, ao e b'aina te roo ae te kau b'a kabaean nuukana; ao e kakangii maan aika rokati[3] ma aia karewe manibeeru.

⁷Ao e reirei ni kangai, “Iai Temanna ae na roko n ri mwiu ae E korakora riki nako iu, ae I aki tau b'a N na baraaki ni kab'arai kabaean ana kauniwae.

⁸I b'abetitoingkami n te ran, ma Ngaia ane E na b'abetitoingkami n te Tamnei are Raoiroi.”

⁹Ni boong akekei ao E roko Iesu mai Kariraia mani kawana are Natareta; ao E b'abetitoaki iroun Ioane n te karaanga are te Ioretan.

¹⁰Ao n te tai naba are E aerake iai man te ran, ao E nora karawa b'a e uki, ao te Tamnei are Raoiroi b'a E ruonna n ai aron te taobe;

¹¹ao e roko te b'anaa mai karawa, ae kangai, “Boni Ngkoe Natiu ae Ko tangiraki i Rou, I kakatonga i Roum.”

¹²Ao E waekoa ni kanakoaki iroun te Tamnei are Raoiroi nakon te rereua,

¹³ao E tiku ikekei n te maan ae abwi te bong ni kaririaki iai iroun Tatan; ao akea raona b'a ti maan aika aki manana; ao a akoia anera.

¹⁴I mwin te tai are e a tia n tauaki iai Ioane ma ni kainaki i nanon te karabuuti, ao E roko Iesu i Kariraia ao E tataekina ana euangkerio te Atua.

¹⁵Ao E taku, “E a koro raoi te tai, ao e a kaan Uean te Atua! Rairi nanomi ao onimakina te euangkerio!”

¹⁶Ao ngke E nakonako ri rarikin namani Kariraia, ao E nora Timon ma Anterea are tarina ngke a kab'akaa te karaun n te nama-b'a taan akawa ngaiia.

¹⁷E taku Iesu nako ia, “Mai ri mwiu, ao N na karaoingkami b'a kam na riki b'a taan akawaia aomata.”

¹⁸A aki tab'ara; a kitana aia karaun ao a nako n iria.

¹⁹Ao ngke E toutoua nako riki kawaina, ao E nora Iakobo are natin Tebetaio. Ma Ioane are tarina, ngke a mena n te booti b'a a bonobonoti karaun.

²⁰E weteia naba, ao ngaiia a kitana tamaia are Tebetaio n te booti ma raona ake a kaboaki kam'akuraia, ao a iria.

²¹A roko i Kaberenaum, ao E rin Iesu ni m'aneabaia I-Iutaia n te Taabati,[4] ao E reirei.

²²Ao a mimi aomata n ana reirei: b'a E reireiia n ai aron ae m'aaka, ao tiaki n ai aroia taani koroboki.

²³N te tai aei, ao bon iai temanna ae taniaki iroun te anti ae buakaka. Ao e takarua ni kangai,

²⁴“Tera am b'ai i roura, Iesu, ae te I-Natareta? Ko nako mai b'a Ko na uruira? I kinako b'a Teuare Moan te Raoiroi Ngkoe, are mairoun te Atua.”

²⁵Ao E takuia Iesu ni kangai, “Tai karongoa, ao oti nako mai rouna!”

²⁶Ao te tamnei are kam'ara e karika te aomata arei b'a e na kaatikitiki, ao e katakaruaea n te b'anaa ae korakora, ao e oti nako mai rouna.

²⁷A bane aomata ni mimi, ao a i titiraki ni kangai, “Tera te baei? Te reirei ae boou? B'a E taetae ma te m'aaka nakoia anti aika buakaka ao a ongo i Rouna.”

²⁸Ao e buta nako rongorongona nakon taabo nako ake i rarikini Kariraia.

²⁹Ao E[5] kitana te m'aneaba arei, ao E nako n aia auti Timon ma Anterea, ao raona Iakobo ma Ioane.

³⁰E wene n aoraki n te kabuebue tinani buun Timon; ao a waekoa ni kaongoa Iesu taekana;

³¹ao E nako n taua baina, ao E kateirakea, ao e a toki naba kabuebuena; ao e touatiniia neierei.

³²Ngke e a tairiki, ngke e a bungi taai, ao aomata a uotiia ni kabane ake a aoraki ma ake a taniaki irouia taimonio nako Ina.

³³A bane kaain te kawa ni botaki i matan te mataroa.

³⁴Ao E kamaiuia aika bati aika aoraki n aeka n aoraki nako, ao E kanakoia ngke a kinaa.[6]

³⁵N te bong are i mwina, n te tai ae boni maan i m'ain otin taai, ao E uti, ao E oti nako, ao E nako n te tabo ae akea te maeka iai, ao E tataro iai.

³⁶Ao a ri mwina Timon ma uake raona ni kakaaea,

³⁷ao ngke a kunea, ao a taku nako Ina, “A bane n ukoukoriko aomata!”

³⁸Ao Ngaia E taku nako ia, “Ti na nako ni kaawa aika i m'aira, b'a N na reirei naba iai; b'a aei bukin ae I nako mai iai.”

³⁹Ao E reirei ni kabutaa aoni Kariraia i nanoni m'aneabaia nako; ao E kanakoia taimonio.

⁴⁰Ao e nako Ina te aomata ae rebera ni butiia, ao e b'aka i aoni bubuaniwaena i matana, ao e taku nako Ina, “Ko kona ni kaitiakai, ngkana nanom.”

⁴¹Ao E nanoangaia Iesu, ao E arora baina n riingnga, ao e taku nako ina, “I kani kaitiakiko! Ko na itiaki.”

⁴²Ao e rina n toki te rebera mai rouna, ao e kaitiakaki.

⁴³Ao E kamatoatoa b'anaana nako ina ngke E kanakoa.

⁴⁴Ao E taku, “Tarataraiko b'a ko na aki tuanga temanna; ma naako moa, kaotiko nakon te ibonga, ao anga baike e tua Moote b'a b'aini kaitiakam, b'a te b'ai ni kakoaua nakoia aomata.”

⁴⁵Ao e taon nako, ao e a moana naba tataekinan te baerei ni katanoata rongorongona. Ma ngaia are E aki kona n rin n te kawa Iesu, ma E a mena naba n taabo ake aki maekanaki. Ao a kawaria aomata man taabo nako.