Read Te B'aib'ara Mareko 12 Bible Online

Mareko 12 - Te B'aib'ara bible

Mareko 12

¹Ao E taetae Iesu nako ia n taeka ni kabotau: “Iai te aomata temanna ae karaoa ana onaroka ao e uniki kureebe iai. E katea oona ni katobibia, ao e kena nnen te b'ai ni karao wain, ao e katea te tabo n taratara i bukiia taan teiakina te onaroka. E anganako ngkanne te onaroka arei nakoia taan ribana b'a a na m'akuriia, ao ngaia e nako n te aba teuana.

²Ngke e a roko bongin te tai, ao teuarei, e kanakoa temanna ana toro nakoia taani m'akuri n te onaroka b'a e na anaa mai rouia tib'angana man are a tia ni boboti.

³A taua te toro taani m'akuri akekei ao a batiboia, ao a kaokia nako ma akea uotana.

⁴E a manga kanakoa riki temanna te toro teuare ana b'ai nneni kureebe; ao taani m'akuri a orea atuna ao a karaoi b'aai nako ina aika e na b'ainrang iai.

⁵E a manga kanakoa naba temanna te toro, ao a tiringnga: ao akanne aroia nakoia aika m'aiti riki ake a tia ni kanakoaki nako ia, b'a a batiboia tem'angina ao a tiringiia tem'angina.

⁶Ai ti temanna te nikira ae tuai ni kanakoaki b'a natin teuarei ae te mm'ane ae tatangiria. E a kanakoa ngkanne b'a ai te kabane, ao e taku, ‘Ane a na karinea natiu.’

⁷Ma a i taetae i rouia taani m'akuri ni nnen te kureebe ao a kangai, ‘Aei te tia b'aib'ai i mwin tamana; bane mai b'a ti na kamatea b'a ti aonga ni b'aib'ai i mwina.’

⁸A taua ao a kamatea, ao a tewea nako mani nnen te kureebe.

⁹Ao E taku Iesu, “Tera ngkanne ae e na karaoia teuare ana b'ai te onaroka? Ane e na roko ao e na tiringiia aomata akekei, ao e na kam'akuriia aomata tem'angina ni nnen te kureebe.

¹⁰Kam tuai ni wareka te taeka are n te B'aib'ara are kangai: ‘Te atibu are a ribaia taani kateitei b'a akea bonganana, e a riki b'a te atibu ae moan te kakawaki i buakon atibu nako.

¹¹E riki aei mairoun te Uea; ai kamimii ra aron taraana!’ ”

¹²Ao aia mataniwi I-Iutaia a kakaea angan tauan Iesu b'a a na kaburea, b'a a ataia ae E ekiianako n te taeka ni kabotau aei; ma a makuia aomata, ma ngaia are a kitanna ao a nako.

¹³A kanakoaki B'aritaio tem'angina ma aomata tabem'aang man te koraki ake a kaaina ana botaki Erote nakon Iesu b'a a na kam'anea n aia titiraki.

¹⁴A roko i Rouna ao a taku, “Te Tia Reirei, ti ataia b'a ti te taekina te koaua Ngkoe ao Ko aki kona ni katabea am iango n aia iango aomata. E aki anaaki nanom n taraan aroia aomata, ma Ko reirei te koaua ae kaeti ma nanon te Atua i bukiia aomata. E eti ma taekan te tua b'a ti na anga ara taekiti[39] nakon te uea n Rom, ke e aki?”

¹⁵Ti na kab'aka nako ia, ke ti na aki? Ma Iesu E a tia n ataia ae a m'am'anaia n aia taeka. E kaekaia ao E kangai, “E aera ngkai kam kataia ni kani kam'aneai? Uota mai te m'ane ae te tirewa b'a N na noria.”

¹⁶A uota teuana nako Ina; ao E titirakiniia ni kangai, “Antai tamneina ma arana aei?” A kaeka ao a taku, “Te uea n Rom.”

¹⁷E taku ngkanne Iesu, “Angan te uea n Rom b'aai akana ana b'ai te uea n Rom, ao angan te Atua b'aai akana ana b'ai te Atua.” Ao a mimi iroun Iesu.

¹⁸A roko iroun Iesu Tarukaio ake a aki kakoaua b'a a na manga uti aomata man te mate, ma ngaia are a taku nako Ina,

¹⁹“Te Tia Reirei, E korea te tua aei Moote i bukira, ae te tua ae kangai taekana: ‘Ngkana e mate te mm'aanenum'a, ao e tiku buuna i mwina ma akea natiia, ao tarin teuanne e riai b'a e na iein ma neienne b'a a aonga ni karikiia natiia ake a na atongaki b'a natin teuare mate.’

²⁰Iai ngkoa taari mm'aane aika itiman: e iein teuare te karimoa ao e mate ma akea natina.

²¹E iein te kauoman ma neierei ma akea naba natiia; ao e mate teuarei, ao e riki ae ai aron naba aei nakon te kateniman ao nakoia ake nikiraia;

²²ao a mate uake itiman, ma akea naba natiia. E mate n te kabane te aine arei.

²³Ngkana a bane ni maiu maate n tain te manga-maiu, ao antai i rouia ae na buuna neierei? B'a a tia n iein ma ngaia uake itiman.”

²⁴E kaekaia Iesu ao E taku, “Kam a kairua ra! Ao kam ataia b'a bukin tera? I bukina b'a kam aki ata te B'aib'ara ke m'aakan te Atua.

²⁵B'a ngkana a manga uti man te mate ao a aki kona n iein ke ni kaieinaki, n ai aroia anera ake i karawa.

²⁶Ao ni kaeti ma taekaia maate ake a manga uti: kam tuai ni wareware n ana boki Moote are taekinaki iai rongorongon te kai are bue, ao e kaotaki naba iai aron te Atua ngke E kangai nakoni Moote: ‘Atuan Aberaam Ngai, ao Atuan Itaaka, ao Atuan Iakob'a.’

²⁷B'a Ngaia tiaki Atuaia akana mate, ma Atuaia akana maiu. Kam rangi ni kairua!”

²⁸E mena ikekei temanna te tia koroboki ae ongongora n aia kakauntaeka. E ataia b'a E a tia Iesu n anganiia Tarukaio te kaeka ae tamaroa, ma ngaia are e nako n Iesu ao e titirakinna ni kangai: “Te tua ra ae moanibaan te kakannato i buakon tuua nako?”

²⁹E kaeka Iesu ni kangai, “Aei ae moanibaan te kakannato: ‘Kam na ongora, Iteraera! Te Uea ae Atuara bon ti Ngaia te Uea![40]

³⁰Ko na tangira te Uea ae Atuam ma nanom ni kabanea, ao maium ni kabanea, ao wanawanam ni kabanea, ao korakoram ni kabanea.’

³¹Te kauoua n tua ae moanibaan naba te kakannato bon aei: ‘Ko na tangiriia aomata n ai aron tangiram i bon i roum.’ Akea te tua teuana ae moanibaan te kakannato riki nakoia aikai.”

³²E taku te tia koroboki temanna nakon Iesu, “Te Tia Reirei, E eti ane Ko atongnga, ao e koaua are Ko taku b'a ti temanna Ngaia, ao akea riki i rarikina b'a ti Ngaia;

³³ao tangirana ma te nano ni kabanea, ma te wanawana ni kabanea, ma te korakora ni kabanea, ao tangiraia aomata n ai aron tangiran temanna i bon i rouna, a rangi ni moamoa riki nakoni karea ni kabane ake a katauaki i bukin te kabuekaki ao nakoni karea nako.”

³⁴Ngke E tirotiroa nanon ana taeka teuarei Iesu b'a iai te wanawana iai, ao E taku nako ina, “Ko aki raroa ma Uean te Atua.” I mwin aei, ao akea temanna ae kani manga titirakina Iesu.

³⁵Ngke E tabe n reirei Iesu i nanon te um'antabu, ao E tabeka ana titiraki ni kangai, “A na kanga n taku taani koroboki b'a E na kaoti te Kristo ri nanon ana kariki Tawita?

³⁶E kairaki nanon Tawita iroun te Tamnei are Raoiroi b'a e taetae ni kangai: ‘E taku te Uea nakon au Uea: Tekateka ikai i angaataiu Ni karokoa I kakiia am kairiribai i aani waem.’

³⁷E atongnga Tawita b'a ana Uea; ao E na kanga ngkanne n atongaki te Kristo b'a kanoan ana kariki Tawita?” Ao a rangi ni bati aomata ake a kukurei n ongora i Rouna.

³⁸Ngke E reireiia, ao E taku nako ia, “Kawakiningkami mairouia taani koroboki ake a kan nanakonako ma aia kunnikai aika m'arairai, ao a tangiria b'a a na kamauraki ma te karinerine n te tabo ni m'akete;

³⁹ao a kan tatau naba taabo n tekateka aika rangi n tamaroa n taini botaki n am'arake.

⁴⁰A kurib'ai aia auti aine aika a mate buia, ao a karaoa ae a na kan taraaki n aroia ni kaananaui aia tataro. A na anganaki te kabuakakaki ae korakora riki.”

⁴¹Ngke E tekateka Iesu n ua kaan ma rarikin te tabo ni m'ane ae b'ain te um'antabu, ao E matakuakiniia aomata ngke a karin aia m'ane. A m'aiti aomata ake a kaub'ai ake a karin aia m'ane aika m'aiti.

⁴²E roko ngkanne te aine temanna ae e a tia ni mate buuna, ao e aki kaub'ai. E karin ana m'ane aika uoua, ae tao uoua te tianti m'aitini kanoaia.

⁴³E weteia ana reirei ni kabaneia ao E taku nako ia, “I tuangngkami b'a te aine arei are e mate buuna, e karina ae m'aiti riki i nanon te b'aoki nakoia uakekei.

⁴⁴B'a a anga uakekei mani kaub'aia; ma neierei, e ngae ngke e aki kaub'ai, ma e anga ni kabane ake a reke i rouna ake buokani maiuna.”