Read Te B'aib'ara Mareko 14 Bible Online

Mareko 14 - Te B'aib'ara bible

Mareko 14

¹Ai uoua te bong ngkai i m'ain tain te Toa are te Riao ao te Berena are aki Karikaki. A ukoukora aroni kam'anean Iesu ibonga ake a kakannato ma taani koroboki, b'a a na taua ni kamatea.

²A taku, “Ti na aki karaoia n tain te Toa, b'a a kawa ni kiriwe aomata.”

³Ao ngke E mena Iesu i Betania, n ana auti Timon are te rebera, ngke E rarikiriki n am'arake, ao e roko te aine temanna ma uotana te b'atoro ae karaoaki man te atibu ae te arab'ata,[44] ao kanoana te kabira ae rangi ni boiarara ae te naro[45] ni koaua, ae e rangi ni m'aiti boona. E urua nnen te kabira anne, ao e kab'aroa te b'a i aon atuun Iesu.

⁴Ma iai aomata tabem'aang ake a un ao a i taetae i rouia ni kangai, “E aera ngkai e bakataeaki te kabira aei n te aro aei?

⁵B'a te kabira aei, e kona ni kaboaki nako n te boo ae raka i aon tenibubua te tenari, ao a kona n anganaki akana aki kaub'ai!” Ao a kaoti aroia n riba neierei.

⁶Ma E taku Iesu, “Tai kumeia! Kam aera ngkai kam tabareia? E a tia ni karaoa ae raoiroi nako Iu.

⁷B'a a bon aki toki ni mena i rarikimi aomata aika aki kaub'ai, ao ngkana kam kani karaoa ae raoiroi nako ia ao kam kona; ma N na aki mena i roumi n taai nako.

⁸E a tia ni karaoa are e kona neiei: e a tia ni kaboiarara rab'atau ni katauraoia i m'ain taunakiu.

⁹E koaua ae I a tuangngkami, b'a n taabo nako ike e tataekinaki iai te euangkerio i aonnaba, ao te b'ai ae e a tia ni karaoia neiei, e na taekinaki naba b'a kanuringana.”

¹⁰Ao Iuta Itekariota, are temanna i buakoia uake tengauni ma uoman, e nako ni kawariia ibonga ake mataniwi b'a e na kam'anea Iesu nako ia.

¹¹Ngke a ongo, ao a kukurei; ao a kab'aka aia taeka b'a a na anganna te m'ane. Ma ngaia are e a kakaea te anga are e na kam'anea iai Iesu.

¹²Ao ni moani bongin te Toa are te Berena are aki Karikaki, ngke a tiring tiibu aika ataei b'a aia karea. Ao a taku ana reirei nako Ina, “E ngaa te tabo ae Ko tangiria b'a ti na nako iai ni katauraoia b'a Ko na kana iai te am'arake are te Riao?”

¹³E kanakoia uoman ana reirei, ao E taku nako ia, “Kam na nako n te kawa, ao ane e na bo ma ngkami iai te aomata ae uota te kaatibu n ran; kam na iria,

¹⁴ao te tabo ane e rin iai, ao kam na kangai nakon te aomata are ana b'ai te auti, E taku te Tia Reirei, ‘E nga te ruu n iruwa ae Ngai ma au reirei ti na kana iai te am'arake are te Riao?’

¹⁵Ao ane na kaota nako imi te ruu ae buubura ae mena i eta ae e tauraoi ao e bobonga b'ain nanona; anne nnemi ni katauraoi i bukira.”

¹⁶A nako ana reirei nakon te kawa, ao a kunea te ruu n ai aron are E tuangiia Iesu, ao a katauraoa am'araken te Riao.

¹⁷Ngke e a tairiki, ao E roko ma ana reirei ake tengauni ma uoman.

¹⁸Ao ngke a rarikiriki n am'arake, ao E taku Iesu, “E koaua ae I a tuangngkami b'a ane na kam'aneai temanna i roumi: temanna ae am'arake ma Ngai.”

¹⁹A moanna n nanokawaki, ao a taku, temanna i mwin temanna nako Ina, “Ngai?”

²⁰E kaekaia Iesu ao E taku, “Temanna i buakomi ngkami aika tengauni ma uoman, ae teuae kateboa ana berena ma Ngai n te boora.

²¹Ane E na mate Natin te Aomata n ai aron taekana n te B'aib'ara; ma e na reke kain te aomata ae kam'aneaki Natin te Aomata i rouna! E raoiroi riki iroun te aomata anne ngke e aki bungiaki.”

²²Ngke a am'arake, ao E anaa te berena Iesu, ao E tataro ni katituaraoi, ao E urua ni kam'akorokoroa, ao E anganiia, ao E kangai, “Anaia, rab'atau te baei.”

²³Ao E anaa te m'angko, ao ngke E a tia n tataro ni katituaraoi, ao E anganiia, ao a bane ni moi ni kanoana.

²⁴Ao E taku nako ia, “Raraau te baei, ae raraan te boraraoi,[46] ae kawawaeaki i bukiia aika bati.

²⁵E koaua ae I a tuangngkami b'a N na aki manga moi n ranin uaan te kureebe ni karokoa te bong arei, are N na nima iai te wain ae boou n Uean te Atua.”

²⁶Ngke a tia n anene, ao a oti nako nakon te maunga are Oriweta.

²⁷E taku Iesu nako ia, “Ane e na moanna ni bua onimakinakiu i roumi, b'a e koreaki ae kangai: ‘N na tiringa te tia kaawakintiibu, ao ane a na bane n uamaae tiibu.’

²⁸Ma ngkana I a manga uti, ao I a ri moami nako Kariraia.”

²⁹E taku Betero nako Ina, “Ngkana arona b'a e a bua onimakinam irouia uaakai, ma e na bon aki bua mai rou.”

³⁰E taku Iesu nakon Betero, “E koaua ae I a tuangko b'a n te tairiki naba aei, ao ane ko na katenua kakeaau i m'aini kauouan tangin te moa.”

³¹E kaekaa Betero ma te b'anaa n ninikoria, ao e kangai, “Ngkana N na boni mate ma Ngkoe, ao N na bon aki kakeako!” Ao a bane n atongi taeka naba akanne.

³²Ao a nako n te tabo ae arana Ketetem'ane, ao E taku Iesu nakoia ana reirei, “Kam na tekateka ikai i nanon au tai n tataro.”

³³E kaira Betero ma Iakobo ma Ioane b'a raona, ao E a moanna n taonaki n te nako n nano ae korakora ma te rawawata ae bati.

³⁴Ao E taku nako ia, “E taonaki maiu n te rawawata ae moan te bati, n te aro ae kaanga N nangi mate iai; kam na tiku ikai, ao kamarurungngkami n tantani.”

³⁵Ngke E nako riki teutana ao E b'aka i aontano, ao E tataro b'a ngkana e konaaki, ao E na aki rin i nanon te aoa are E na karawawataaki iai.

³⁶Ao E taku n ana tataro, “Aaba, Tamau, a konaaki b'aai ni kabane i Roum; Ko na uota nako te m'angko ni karawawata aei mai Rou; ma tiaki nanou ae na iraki, ma e na iraki nanom.”

³⁷Ao E oki, ao E noriia b'a a matu; ao E taku nakoni Betero, “Timon, ko matu? Ko aki kona ni kamarurungko n tantani i nanon teuana te aoa?

³⁸Kam na kamarurungngkami n tantani ao tataro b'a kam na aki b'aka n tain te kariri: e konamaki te tamnei, ma e mamara te rab'ata.”

³⁹Ao E a manga nako riki n tataro, ao E atongi taeka naba ake E a tia ni m'anewei n ana tataro.

⁴⁰Ngke E a manga oki, ao E noriia b'a a manga matu naba, b'a a kuri n aki ure mataia; ao a aki ataia b'a tera aia kaeka nako Ina.

⁴¹Ao E oki te katenua n tai ao E taku nako ia, “Ae kam boni matu naba, ma n iri nanomi ni motirawa? E a tau! E a roko te tai! E a kam'aneaki Natin te Aomata nakoia taani bure.

⁴²Tei rake, ti na nako; noria, e a roko teuare nang kam'aneai!”

⁴³Ngke E tabe n taetae Iesu, ao akea b'a e a roko naba Iuta, are temanna i buakoia uake tengauni ma uoman, ao raona te koraki ae bati ake a uoti kabaang ma kaai n oro; aikai te koraki ake a kanakoaki mairouia ibonga ake mataniwi, ao mairouia taani koroboki ma unimm'aane.

⁴⁴Ao teuare nang kam'anea Iesu, e a tia n angania aomata te kanikina, ngke e kangai, “Ane N na kiitinna ao boni Ngaia; kam na taua, ao kairia nako n tararuaia raoi.”

⁴⁵Ngke e roko Iuta, ao e a nako naba ni kawara Iesu ao e taku, “Te Tia Reirei!” Ao e kiitinna.

⁴⁶Ma ngaia are a rawea Iesu ao a taua.

⁴⁷Ma iai temanna i buakoia ake a teitei are e buuta ana kabaang, ao e orea iai ana toro mataniwiia ibonga, ni korea taningana ni kab'akaa.

⁴⁸E taku Iesu nako ia, “Kam nako mai ma kabaang ao kaai n oro, b'a kam na tauai b'a kaanga te tia kam'arua Ngai?

⁴⁹ I katoa te bong ae koraki ma ngkami n reirei i nanon te um'antabu, ao kam aki tauai. Ma e riki aei b'a e na kakoroaki bukin are e taekinaki n te B'aib'ara.”

⁵⁰Ao a bane ana reirei ni kitanna, ao a biri nako.

⁵¹Iai te rorobuaka n ataei temanna are irira Iesu, ao e ti b'ainna n te kunnikai ae e nira rab'atana iai. A taua;

⁵²ma e katuka nirana, ao e biri nako n akea karabaana.

⁵³Ao a kaira Iesu nakoni mataniwiia ibonga; ao a bane ni botaki ma ngaia ibonga ake a kakannato ma unimm'aane ma taani koroboki.

⁵⁴Ao Betero, e irira Iesu ni kakararoa, ao e rin i nanon te tabo ae e aki bono aona ae otab'aniniaki n ana auti mataniwiia ibonga; ao e tekateka ma bureitiman ni kaabuea n te ai.

⁵⁵Ao ibonga ake a kakannato ma kaain te Tanirim ni kabanea, a ukoukora bukinan Iesu b'a a na kamatea; ma akea ae reke i rouia.

⁵⁶B'a a m'aiti aomata ake a bukinna, ma a aki boraoi aia kaotioti.

⁵⁷A tei rake tabem'aang ni bukinna, ao a taku,

⁵⁸“Ti ongo ana taeka ngke E kangai, ‘N na urua te um'antabu aei, ae karaoaki irouia aomata, ao I a manga katea teuana i nanon tenibong, ae te um'antabu ae aki karaoaki irouia aomata.’ ”

⁵⁹Ao a aki boraoi naba aia taeka iai.

⁶⁰Ao e tei rake mataniwiia ibonga i buakoia, ao e titirakina Iesu ni kangai, “Akea am kaeka ae Ko na taekinna? Tera ae a taekinna te koraki aei b'a b'aini kabuakakaam?”

⁶¹Ma E kainab'aabu, ao akea ana kaeka ae E anga. E a manga titirakinna naba mataniwiia ibonga, ao e taku, “Te Kristo Ngkoe are Natin Teuare Kakaraoiroaki?”

⁶²E kaeka Iesu, ao E taku, “Boni Ngai; ao ane kam na nora Natin te Aomata b'a E na tekateka i angaatain Teuare m'aaka, ao b'a E na nako mai n nangini karawa.”

⁶³E raeuai kunnikaina mataniwiia ibonga, ao e taku, “E aera b'a ti na tangiriia riki taani kakoaua?

⁶⁴Kam a tia n ongo ana taeka ni bakanatua aei! Tera ami moti?” A bane ni motika taekana b'a e riai kamateana.

⁶⁵Iai tabem'aang ake a bawareia, ao a rabuna ubuna, ao a oreia ni baiia, ao a taku nako Ina, “Kaotia b'a antai ae oroiko!” Ao bureitiman a oreia n aki akaaka.

⁶⁶Ngke e tiku i nano Betero n te tabo are otab'aniniaki n auti, are te tabo are akea rabunan aona, ao e roko te ataeinaine ae te tia m'akuri iroun mataniwiia ibonga;

⁶⁷ngke e nora Betero b'a e kaabuea, ao e tarataraia, ao e taku, “Ngkoe naba raon Iesu are te I-Natareta.”

⁶⁸Ma e kakewea ana taeka neierei, ao e taku, “I aki ata nanon te b'ai ane ko taekinna, ao I aki oota naba iai.” Ao e oti nako nakon te tabo n oti nako are mai tinaniku.[47]

⁶⁹Ao e noria te ataeinaine ikekei, ao e a manga taku nakoia naake a teitei, “Teuaei bon temanna naba i buakoia.”

⁷⁰E a manga kakewei naba taeka akekei Betero. E aki rangi ni maan i mwina, ao uaake a teitei a taku nakoni Betero, “Bon te koaua b'a raoia uakekei ngkoe, b'a te I-Kariraia ngkoe.”

⁷¹Ao e karereanti, ma n tuea, ao e kangai, “I aki kinaa te aomata ane kam atongnga.”

⁷²Ao e a manga tangi naba te moa. Ao Betero, e uring ana taeka Iesu ngke E kangai nako ina, “Ane ko na katenua kakeaau ngkana e tuai ni kauoua tangina te moa.” Ao ngke e uringnga, ao e tang.