Read Te B'aib'ara Mareko 6 Bible Online

Mareko 6 - Te B'aib'ara bible

Mareko 6

¹Ao Iesu, E kitana te tabo arei, ao E nako n abana; ao a iria ana reirei.

²Ao ngke e roko te Taabati,[15] ao E moanna n reirei i nanoni m'aneabaia I-Iutaia; a m'aiti aomata ake a mena ikekei, ao ngke a ongora i Rouna ao a bane ni mimi. A taku, “A reke maia baikai iroun Teuaei? Ao te rabakau ra ae E anganaki? B'a a karaoaki baika kamimii aika ai aron aikai ni baina!

³Tiaki te kabenta Teuaei, are Natin Nei Maria, ao are tarin Iakobo, ma Iote, ma Iuta, ma Timon? Ao tiaki a mena m'anena i roura ikai?” Ao a kaoti mataia n ribaia.

⁴E taku Iesu nako ia, “Iai karinean te burabeti n taabo nako, ma akea n oin abana ao irouia ana bu, ao i nanoni mwengana.”

⁵Akea m'akuri aika kamimii ake E kona ni karaoi ikekei, ma E ti katokai baina i aoia tem'angina aika aoraki ni kamaiuia.

⁶Ao E mimi n aia onimaki. Ao E nako ni kaawa ake a mena ikekei n reireiia aomata.

⁷E weteia uake tengauni ma uoman Iesu, ao E kanakoia ni kakauomaniia. E anganiia te m'aaka i aoia tamnei aika kam'ara,

⁸ao E tuangiia ni kangai, “Tai uota te b'ai teuana i aoni kawaimi b'a ti te oko: akea te kariki ae na uotaki, ao akea naba te buua ke te m'ane i nanoni nneia aika a na uotaki.

⁹A na karin aia kau ni wae, ao a na aki b'ain uoua aia kabaraki!”

¹⁰Ao E a manga taku riki nako ia, “N te tabo are kam rin iai, ao tiku n te auti anne ni karokoa kam kitana te tabo anne.

¹¹Ao ngkana kam kawara te kawa teuana ma a aki butim'aingkami kaaina ao a aki kan ongora i roumi, kitanna ao taei bubun aontano mai waemi b'a te b'ai ni kakoaua nako ia b'a a aki mutiakiningkami.”

¹²Ao uakekei a nako ao a reireiia aomata b'a a na rairi nanoia.

¹³ A kanakoia taimonio aika bati; ao aomata aika m'aiti aika aoraki a kabiraki i rouia n te b'a, ao a kamaiuaki.

¹⁴Ao te uea are Erote, e ongo taekan Iesu; b'a e a rangi n atoatongaki arana. A[16] taku tem'angina, “E a maiu Ioane are te tia b'abetito mai buakoia maate, ma ngaia ae e a reke i rouna te m'aaka ni karaoi m'akuri aika kamimii.”

¹⁵Ma a taku tem'angina, “Bon Eria.” Ao tem'angina, a taku, “Bon te burabeti, n ai aron temanna mai buakoia burabeti ake rimoa.”

¹⁶Ma ngke e ongo taekana Erote, ao e taku, “Bon Ioane, are I a tia ni korea roroana, ma e a manga maiu!”

¹⁷B'a teuae Erote, e a tia n anga m'akana b'a e na tauaki Ioane b'a te bure; ao e tua b'a e na kabaeaki, ao e na kakaki i nanon te karabuuti. E karaoa aei Erote i bukin Eroria, b'a e a tia n iein ma ngaia, ao neiei boni buun tarina are Biribo.

¹⁸B'a e kangai Ioane nakon Erote, “E aki riai i aan te tua b'a ko na iein ma buun tarim!”

¹⁹Ao Eroria, e nanobuaka ao e kani kamatea Ioane. Ma e aki kona,

²⁰b'a Erote, e maaka Ioane, n ataakina i rouna b'a te aomata ngaia ae raoiroi ae tabu; ao e kawakinna raoi. E kan ongongora i rouna, e boni ngae ngke e kakakiriweaki nanona ni katoa te tai are e ongora iai i rouna.

²¹E reke ana tai Eroria: e reke n ana tai Erote ngke e kauringa ana bongi ni bung, ngke e karaoa te am'arake ae ab'ab'aki i bukiia ake a kakannato n te tautaeka, ao i bukiia mataniwi n taanga ni buaka, ma aomata ake a kakannato i Kariraia.

²²Ao ngke e rin ni b'ab'atere natin Eroria te aine, ao e kakukureia nanon Erote ma iruwa; ao e taku te uea nakon te teeinaine, “Tuangai te b'ai ane ko tangiria, ao N na anganiko.”

²³Ao e taetae n tuea nako ina ni kangai, “Ane ko tuangai, ao N na anganiko, e aoria ngkana iteran ueau!”

²⁴Ao e oti nako ao e taku nakon tinana, “Tera ae N na tuangnga?” Ao e kaekaa tinana, ni kangai, “Atuun Ioane are te tia b'abetito.”

²⁵Ao neierei, e kawaekoa n rin nakon te uea, ao e tuangnga ni kangai, “I tangiriko b'a ko na anganai ngkainaba atuun Ioane are te tia b'abetito i aon te raurau!”

²⁶E rangi n nanokawaki te uea; ma i bukin ana taeka ni bau are e a tia n atongnga i mataia ana iruwa, ao e aki kan urua ana taeka ni bau nakon neierei.

²⁷Ao e waetata te uea ni kanakoa te tautia temanna, ao e tua b'a e na uotaki atuun Ioane. E nako n te karabuuti te tautia, ao e korea roroan Ioane.

²⁸E uota atuuna i aon te raurau ao e angan te teeinaine, ao ngaia e a manga angan tinana.

²⁹Ngke a ongo ana reirei Ioane taekan te baerei, ao a roko, ao a uota nako rab'atana, ao a kaki i nanon te nne ni mate.

³⁰A oki nakon Iesu taan tuatua, ao a tuangnga b'aai ni kabane ake a tia ni karaoi ao ake a tia n reireiia aomata iai.

³¹A rangi ni m'aiti aomata ake a roko ao a nako n te aro are e aki reke motirawaia uakekei ao n am'arake naba. Ngaia are E taku Iesu nako ia, “Ti a nako ni kaokoroira n te tabo ae aki maekanaki b'a kam na motirawa iai teutana.”

³²A toka i aon te booti n ti ngaiia nakon te tabo ae aki maekanaki.

³³A m'aiti aomata ake a noriia n nako, ao a kinaia; ma ngaia are a m'ananga mani kaawa nako ao a biribiri n ri moa ri aon te aba, ao a roko n te tabo arei i m'ain rokon Iesu ma ana reirei.

³⁴Ngke E roko Iesu n te aba, ao E noriia aomata aika m'aiti, ao E nanoangaiia, b'a ai aroia tiibu aika akea te tia kawakiniia; ao E moanna n reireiia baika bati.

³⁵Ngke e a kani bong, ao a nako Ina ana reirei, ao a taku, “E aki maekanaki te tabo aei, ao e a b'aka nako te tai.

³⁶Kanakoia aomata b'a a na nako n abaia taan ununiki ao nakoni kaawa aika i rarikira b'a a na kaboi kanaia iai.”

³⁷Ao E kaekaia Iesu ni kaangai, “Kam na anganiia kanaia ngkami.” A titirakinna ni kangai, “Ko tangirira b'a ti na nako ni kaboi kariki n uabubua te tenari,[17] ao ti na anganiia b'a a na kanna?”

³⁸E taku nako ia, “Iraua te kariki i roumi? Naako, nori.” Ao ngke a ataia, ao a kangai, “Nimaai te kariki, ao iai naba uoman te ika.”

³⁹Ao E tuangiia ana reirei b'a a na kabaneia aomata ni katekatekaia ni kurubu nako i aon uteute aika mawaawa.

⁴⁰Ma ngaia are a tekateka aomata n aia kurubu nako: iai ae kakatebubua kaaina, ao iai a kakanimangaun.

⁴¹E anai ngkanne kariki ake nimaai ma ika ake uoman, ao E tara rake nako karawa, ao E kaitaua te Atua. E urui kariki, ao E anganiia ana reirei b'a a na tib'atib'ai ni kaki i mataia aomata; ao E tib'ai naba ika nakoia aomata ni kabaneia.

⁴²A bane n am'arake ao a ngae.

⁴³Ao ana reirei Iesu a anai tengauni ma uakora b'aene aika on n nikirani kariki ma ika.

⁴⁴M'aitiia mm'aane ake a am'arake, bon nimaua tengaa.

⁴⁵Ao ngkekei naba, iai ana m'akuri Iesu are E karaoia are e a karika iai tokaia ana reirei i aon te booti, ao a nako n ri moana nako Betetaita; ao Ngaia, E kaokiia nako aomata.

⁴⁶Ao ngke E kitaniia aomata, ao E nako n te maunga b'a E na tataro.

⁴⁷Ngke e a bong, ao e mena te booti i nukan te nama; ao Iesu, E tiku i eta n ti Ngaia.

⁴⁸E noriia ana reirei b'a a kainano ni bwenarina, b'a e kauntabaia te ang. Ma ngaia are ngke tao marenan te aoa tenua ma onoua n te karangaina, ao E kawariia n nakonako i aon te ran. Ngke E ri rarikiia b'a E nang taonnako,

⁴⁹ao a noria n nakonako i aon te ran. A taku b'a te anti, ma ngaia are a tang n takarua.

⁵⁰A bane ni maaku ngke a noria. E waekoa Iesu n taetae nako ia, ao E kangai, “Kam na karau nanomi, boni Ngai; tai maaku.”

⁵¹E toka i rarikiia n te booti, ao e b'aka te ang. A rangi ni mimi ana reirei,

⁵²i bukina b'a a aki oota b'a tera raoi nanoni kaam'arakeaia aomata ake nimangaa; e aki tau korakoran aia iango b'a a na ataia.

⁵³A ri nanon te nama ao a roko n te aba are Kennetareta, ao a rooa te booti iai.

⁵⁴Ao ngke a kitana te booti, ao a kinaa naba Iesu aomata;

⁵⁵ma ngaia are a biribiri ni kabutai taabo nako, ao a uotiia ake a aoraki i aoni nneia ni wene nakon te tabo are a ongo b'a E mena iai Iesu.

⁵⁶N taabo nako ake E roko iai Iesu, b'a kaawa ke taaun, ke n abaia taan ununiki, ao aomata a kaweneia aoraki n taabo ni m'aakete, ao a butiia Iesu b'a E na kariaia aoraki b'a a na riinga naba ti rabin ana kunnikai; ao ake a riingnga a kamaiuaki.