Read Te B'aib'ara Ruka 2 Bible Online

Ruka 2 - Te B'aib'ara bible

Ruka 2

¹Ni boong akekei, ao e nako te kaetieti mairoun te uea ae kakannato are Kaitaraa Aukitito b'a e na karaoaki te wareaomata i aon aban nako te tautaeka n Room.

²Aei te moa ni wareaomata n ana tai n tautaeka Kurenio i Turia.

³Ao a bane n nako aomata nakon oin aia kaawa nako b'a a na koreaki araia iai.

⁴E nako naba Ioteb'a mai Kariraia, man te kawa are Natareta, nako Iutaia nakon ana kawa Tawita are arana Betereem, b'a ngaia kaain ana utu Tawita.

⁵E nako ma Nei Maria are ana kabae are e bikoukou b'a a na koroi araia.

⁶Ao ngke a mena i Betereem, ao e roko ana tai ni bung Nei Maria.

⁷E bungiia ana moa n nati te mm'aane ao e niria n te kunnikai ae te ninira, ao e kawenea ni nneni kanaia maan n am'arake b'a akea aia ruu n te auti n iruwa.

⁸Iai taani kawakin tiibu n te aba arei ake a mena i tinanikun te kawa. A tantani i rarikiia aia tiibu e bong.

⁹E kaoti ana anera te Uea nako ia, ao e oota nako mimitongin te Atua ni katobibiia, ao a taonaki n te maaku.

¹⁰Ao e taku te anera nako ia, “Tai maaku; b'a noria, iai irou te rongorongo ae raoiroi are e na karika te kim'areirei irouia aomata ni kabaneia;

¹¹b'a e a bungiaki nako imi n te bong aei n ana kawa Tawita, te tia Kamaiu are te Kristo are te Uea.

¹²Ao aio te kanikina nako imi: ane kam na nora te merimeri ae niraki n te kunnikai ae te ninira, ae e wene i nanoni nneni kanaia maan n am'arake.”

¹³Ao a karina naba ni kaoti i rarikin te anera kaaini karawa aika rangi ni m'aiti. A kamoamoa te Atua, ao a kangai,

¹⁴“E na neboaki te Atua ike moan te rietaata! Ao e na mena te rau i aon te aba irouia aomata ake E kukurei i rouia te Atua.”

¹⁵Ngke a nako anera mai rouia nako karawa, ao a i taetae i rouia taani kawakin tiibu ni kangai, “Ti na nako Betereem b'a ti na nora te baere riki, are E taekinna nako ira te Uea.”

¹⁶Ao a kawaekoaia ngke a nako, ao a kunea Nei Maria ma Ioteb'a, ao te merimeri b'a e wene ni nneni kanaia maan n am'arake.

¹⁷Ngke a nora te teei ao a kaongoia aomata nako rongorongon te teei aei n ai aron are a tia n tuangaki;

¹⁸ao ake a ongo, a mimi n te baere a taekinna taani kawakin tiibu nako ia.

¹⁹Ma Nei Maria, e kawakin taekani baikai ni kabane i nanona, ao e aki toki n iaiangoi.

²⁰Ao a oki taani kawakin tiibu. A kamoamoa te Atua ao a neboia i bukini baike a tia n ongo ma n nori, n ai aron taekaia ake a tia n tuangaki.

²¹Ngke e a koro wanua te bong, ngke e a roko ana tai te teei ni kaitiakaki, ao e a aranaki b'a Iesu, are te ara are e anga te anera i m'ain rikin Iesu i nanon te biroto.

²²Ngke e a roko te tai are a riai iai Ioteb'a ma Nei Maria ni karaoa te anga karea i bukini kaitiakaia n ai aron taekana n ana tua Moote, ao a uota Iesu nako Ierutarem b'a a na kaotia i matan te Atua.

²³n ai aron are koreaki n ana tua te Uea are e kangai, “B'a naati mm'aane ake moa n nati a na atongaki b'a ana b'ai te Uea.” [1]

²⁴Ao b'a a na anga te karea n ai aron taekana n ana tua te Uea, are e kangai: Uoman te taobe ke uoman te bitin aika ataei. [2]

²⁵N te tai anne ao iai te aomata temanna i Ierutarem ae arana Timeon. Teuaei e b'aina te maiu ae raoiroi i matan te Atua ao e kakaonimaki; e kaantaninga te tai are na buokaki iai Iteraera man rawawatana, ao e mena i rouna te Tamnei are Raoiroi.

²⁶Ao E a tia te Tamnei are Raoiroi ni kaotia nako ina b'a e na aki mate i m'ain ae e tia n nora ana Kristo te Uea.

²⁷Ngke e kairaki ana iango Timeon iroun te Tamnei are Raoiroi, ao e nako n te um'antabu; ao ngke a rin ana karo te teei are Iesu b'a a na karaoa i bukina kanoan te tua n ai aron are e tataneiai te aba iai,

²⁸ao e anaa te teei Timeon ni b'ab'akoia, ao e katituaraoa te Atua ni kangai,

²⁹“Te Uea, kariaia ngkai b'a e na nako am toro ma te rau, b'a ko a tia ni kawakina am berita n ai aron am taeka;

³⁰B'a a tia matau n nora am kamaiu nako ia aomata,

³¹Ae Ko katauraoia b'a a na noria aomata nako.

³²Ae te oota are na kaota nanom nakoia botannaomata ake Tientaire ao e na uota karineaia am aomata ake Iteraera.”

³³Ao a mimi tamana ma tinana ni baike a taekinaki i bukina;

³⁴ao e taetae Timeon ni kakab'aiaia ao e taku nakon Nei Maria are tinana, “Noria, e na riki te teei aei b'a b'aini kamaunaia ao kamaiuaia aika bati i buakoia Iteraera, ao te kanikina are a na taetae n ekianako aomata aika bati.

³⁵ao ngkoe ane ko na rotaki naba n te rawawata, b'a a bane ni kaotaki aia iango aika raba.”

³⁶Ao iai te burabeti ae Nei Anna, are natini B'anuera ae kaain te baronga are Atera; e a kara, ao e a tia n tekateka ma buuna i nanon itiua te ririki ma ngke a moa n iein.

³⁷E a tia ni mate buuna, ao ai wanibwi ma aua ana ririki ni maiu. [3]

³⁸E nako neiei n tei i rarikin Ioteb'a ma Nei Maria n te aua naba arei, ao e katituaraoa te Atua, ao e tataekina aron te teei nakoia aomata ni kabaneia ake a kantaninga kamaiuaia Iteraera.

³⁹Ngke a tia ni karaoi b'aai ni kabane ake a kaeti ma taekan ana tua te Uea, ao a oki nako Kariraia, nakon aia kawa are Natareta.

⁴⁰Ao E rikirake te teei n ikawai ao ni marurung rab'atana; E on n te wanawana, ao E memena i aona ana kakab'aia te Atua.

⁴¹Ni katoa ririki ao a aki toki ana karo n naanako Ierutarem ni kaea te Toa are te Riao.

⁴²Ao ngke tebwi ma uoua ana ririki Iesu, ao a nako Ierutarem ni kaea te Toa n ai aron are a tataneiai iai;

⁴³ao ngke e a bane bongin te Toa, ngke a oki, ao E tiku te teei are Iesu i mwiia i Ierutarem, ao a aki ataia ana karo.

⁴⁴A taku b'a E mena i buakoia raoia ni m'ananga, ma ngaia are a nakonako teuana aia bong ni kakaaea i buakoia aia utu ma raoia nako;

⁴⁵ao ngke a aki noria, ao a manga okira Ierutarem ni kakaaea iai.

⁴⁶Ao i mwin tenibong ao a noria n te um'antabu b'a E tekateka i buakoia taan reirei.

⁴⁷E ongora i rouia, ao E titirakiniia; ao ake a ongo i Rouna a mimi n rabakauna ma ana kaeka titiraki.

⁴⁸Ngke a noria ana karo, ao a mimi. E taku tinana nako Ina, “Natiu, e aera ngkai Ko karaoa aei nako ira? Noria, I a bora ma tamam ni kakaaeko.”

⁴⁹Ao Ngaia E kangai nako ia, “E aera b'a kam na kakaaeai? Kam aki ataia ae I riai ni mena n ana auti Tamau?”

⁵⁰Ma a aki ata nanon te baere E taekinna nako ia.

⁵¹Ao E airi ma ngaiia ao a roko i Natareta, ao E ongeaba nako ia; e tau mwini baikai ni kabane tinana i nanona.

⁵²E rikirake rab'atan Iesu ma rabakauna, ao ai arona naba ma taatangirana iroun te Atua ao irouia aomata.