Read Te B'aib'ara Ruka 23 Bible Online

Ruka 23 - Te B'aib'ara bible

Ruka 23

¹Ao a bane ngkanne n tei rake te koraki ao a kaira Iesu nakoni Birato.

²Ao a bukinna ni kangai, “E reke i roura Teuaei ngke E tabe n anaa nanon ara botannaomata aei ni kab'aoua, ao E tukiira b'a ti na aki kab'akai ara taekiti nakoni Kaitara, ao E taku b'a Ngaia bon te Kristo ae te uea.”

³Ao e titirakinna Birato, ni kangai, “Aia Uea I-Iutaia Ngkoe?” Ao Ngaia E kaeka, ni kangai, “Ngaia ane ko taku.”

⁴Ao e taku Birato nakoia aia mataniwi ibonga ao nakoia aomata, “Akea te b'ai ae buakaka ae I kunea iroun te Aomata aei.”

⁵Ma a kakorakorai b'anaaia ni kangai, “E kakiriwei nanoia aomata n ana reirei i aon Iutaia ni kabuta, ni moa mai Kariraia ni karokoa naba te tabo aei.”

⁶Ngke e ongo aei Birato, ao e titiraki ni kangai, “Tao te I-Kariraia te Aomata arei?”

⁷Ao ngke e a ataia b'a E mena n te aba are reke i aan ana tautaeka Erote, ao e kanakoa nakon Erote, are e mena i Ierutarem n te tai anne.

⁸Ngke e nora Iesu Erote, ao e rangi ni kukurei b'a e a kaman ingainga nanona ni kan noria, i bukin ae e a kaman tia n ongo taekana, ao iai ana kaantaninga b'a e kan noria ni karaoa te m'akuri ae kamimii.

⁹Ao e kabatiai ana titiraki nakon Iesu, ma akea ana kaeka ae E anga.

¹⁰Ao a kakorakorai b'anaaia aia mataniwi ibonga ma taani koroboki, ake a tei ikekei, ni kabuakaka.

¹¹Ao Erote ma ana tautia, a kaota te aro n aki karinerine nako Ina, ao a kakanikoa; ao ngkanne a katokaa i aona te kunnikai ae tamaroa, ao a manga kaokia nakoni Birato.

¹²A riki n i raorao Erote ma Birato n te bong naba arei, b'a a i kairiribai rimoa.

¹³Ao Birato, e weteia ni botiia aia mataniwi ibonga ma kaain te Tanirim ma aomata,

¹⁴ao e taku nako ia, “Kam a uota mai nako iu te Aomata aei, b'a kanga temanna ae kakiriwei nanoia aomata; ao noria, I a tia n kekera arona i matami, ao I aki kunea buren te Aomata aei ni baike kam bukinna iai;

¹⁵ao akea naba ae e kunea Erote, b'a ngaia ae e kanakomaia ni kaokia nako ira. Ao noria, akea te b'ai ae E a tia ni karaoia, ae e riai b'a E na kamateaki iai.

¹⁶Ma ngaia ae N na kataerea ao N na kainaomata.”

¹⁷E riai irouni Birato ni katoa tain te Toa are te Riao b'a e na kainaomata temanna te bure n ai aron are a tangiria I-Iutaia. [43]

¹⁸Ao a bane n takaarua ni kangai, “Kamatea Teuaei! Ao ti tangira B'arab'a b'a e na kainaomataki!”

¹⁹B'arab'a bon te aomata ae e a tia ni karinaki n te karabuuti i bukini bukinana n te kiriwe are e a tia n riki n te kawa, ao i bukin tiringan te aomata i rouna.

²⁰Iai nanoni Birato ni kani kainaomata Iesu, ma ngaia are e a manga taetae riki nako ia;

²¹ma a takaarua ni kangai, “Kamatea n te kaibangaki! Kamatea n te kaibangaki!”

²²Ao e taku nako ia te katenua n tai, “B'a tera te buakaka are E a tia ni karaoia? I aki kunea te bure ae e riai matena iai; ma ngaia ae N na kataerea ao N na kainaomata.”

²³Ma a kakorakorai b'anaaia n takaarua n tuanga Birato b'a E na kamatea Iesu n te kaibangaki. Ao a tokanikai b'anaaia.

²⁴Ao e karaoa ana baire Birato b'a e na iraki nanoia aomata.

²⁵E kainaomata te aomata are a tangiria are e a tia ni kainaki i nanon te karabuuti i bukin te kiriwe ma kamatean te aomata; ao e anga Iesu b'a E na kamateaki n ai aron are a tangiria I-Iutaia.

²⁶Ao ngke a kairia nako, ao a kaitibo ma te aomata ae arana Timon ae te I-Kurene, ae nako man te nukamotu, ao a taua ma te matoa, ao a katokaa i aona te kaibangaki b'a e na uotia n ri mwin Iesu.

²⁷A iria aomata aika bati, ao iai naba aine i buakoia ake a tang ma ni b'aeb'aeti i bukina.

²⁸Ao E rairaki Iesu nako ia ao E taku, Natin Ierutarem aika aine, tai tang i buku! Ma kam na tang i bukimi ao i bukiia natimi.

²⁹B'a noria, ane a na roko boong ake a na kangai iai, “A a kab'aia akana kanoabo, ma biroto akana aki bung, ma mamma akana tuai ni kamammaia ataei!”

³⁰Ao ane a na kangai nakoni maunga, “Kamanatuaira!” ao nakon tabuki, “Tauniira!”

³¹B'a ngkana a karaoi baikai nako Iu, Ngai ae kanga kabotauan te kai ae maiu, ao tera ae na riki nako imi, ngkami ae kanga kabotauan te kai ae m'au?

³²Iai naba uoman, aika taani kam'arua, ake a kairaki nako b'a a na kamateaki ma Ngaia.

³³Ao ngke a roko n te tabo are aranaki b'a te “Tab'anou,” ao a tauria iai n te kaibangaki; a tauriia naba n te kaibangaki taani kam'arua akekei, temanna i rarikin Iesu man te angaatai, ao temanna i rarikina man te angamaing.

³⁴Ao E taku Iesu, “Tamau, kab'ara aia bure; b'a aki ata ae a karaoia.” Ao tautia a kakaea n te m'akuri ni kaiwa b'a antai ae na reke tib'ana ni kunnikain Iesu. [44]

³⁵ Ao a tei aomata ni mataku; ao aia mataniwi I-Iutaia a kakanikoa Iesu, ao a kangai, “E Kamaiuia aomata, ao ke E kamaiua i bon i Rouna, ngkana ana Kristo te Atua, ae rineaki i Rouna!”

³⁶A kakanikoa naba tautia, ao a nako Ina n anganna te wain ae kamangingi,

³⁷ao a kangai, “Ngkana aia Uea I-Iutaia Ngkoe, ao kamaiuko!”

³⁸Iai te koroboki i etana ae e kangai, “Aei Aia Uea I-Iutaia.”

³⁹Ao e taetae ni kamaraki nano temanna irouia taani kam'arua ake a tauraki n te kaibangaki, ao e kangai, “Tiaki bon te Kristo Ngkoe? Ko na kamaiuko ma ngaira!”

⁴⁰Ma e takuia te kam'arua are temanna, ao e kangai, “Ko aki maka te Atua, ngkai ko katuaeaki n ai arona?

⁴¹Ao ngaira, e bon riai n reke aei i roura; b'a ti karekea mwin are ti a tia ni karaoia, ao Teuaei E aki karaoa ae buakaka.”

⁴²Ao ngaia e taku, “Iesu, uringai n akoai ngkana Ko riki b'a te Uea!”

⁴³Ao E taku Iesu nako ina, “E koaua ae I a tuangko b'a n te bong aei ao ko na mena ma Ngai i B'aretaiti.” [45]

⁴⁴Tao e a tawanou, ao e roo aon te aba ni kabanea ni karokoa te aoa tenua n te tanimaeaontaai.

⁴⁵E a mauna ootana. Ao e raeuaki te kunnikai are rokin te um'antabu nakoni m'akoro aika uoua.

⁴⁶Ao E taetae ngkanne Iesu n te b'ana ae korakora, ao E kangai, “Tamau, I kaaki tamneiu i nanoni baim!” Ao ngke E tia n atonga aei, ao E mate.

⁴⁷Ao mataniwin te taanga ni buaka are tebubua kaaina, ngke e nora te baere riki, ao e karaoiroa te Atua, ni kangai, “Bon te aomata ae akea ana bure Teuaei!”

⁴⁸Ao aomata ni kabaneia ake a botaki ni mataku, ngke a nori baikekei ao a okira mwengaia n ororei b'ab'aaia n nanokawaki.

⁴⁹Ao raona ni kabaneia, ma aine ake a iria mai Kariraia, a tei i kiraroa ni mataku ni baikekei.

⁵⁰Iai temanna te aomata ae arana Ioteb'a, ae kaain te kawa n Iutaia ae Arimataia. Kaain te Tanirim ngaia, ao te aomata ae raoiroi ao e b'ab'aina te eti ni maiuna,

⁵¹ao e aki bobonnano ma kaain te Tanirim n aia babaire ao n aia m'akuri, ao e kakantaninga rokon Uean te Atua.

⁵²E nako teuaei ni kawara Birato ao e butiia rab'atan Iesu.

⁵³E karuoa ngkanne rab'atan Iesu, ao e niria n te kunnikai ae tamaroa, ao e kawenea i nanon te nne ni mate ae ekeaki i nanon te tabo ae b'aa, ao e tuai meni kaweneaki iai te mate.

⁵⁴Arei te bong are a katauraoi iai b'aai I-Iutaia i bukin te Taabati ngke e a kan roko.

⁵⁵Ao aine ake a roko ma Ngaia mai Kariraia, a rimwi ao a nora te nne ni mate ma aron rab'atan Iesu ngke e kaweneaki.

⁵⁶A oki ngkanne, ao a karaoi baika boiarara ma kabira. A motirawa n te Taabati n ai aron taekana n te tua.