Read Te B'aib'ara Te Tua-Kaua 11 Bible Online

Te Tua-Kaua 11 - Te B'aib'ara bible

Te Tua-Kaua 11

¹Bon Atuami te UEA, ma ngaia are, kam riai n tangiria n taai nako ma n ongotaeka nakon ana Tua ao Ana reirei.

²Kam na uringa arona ngke E boaingkami, ao E aki boaiia ami ataei. Boni ngkami ake kam noora te UEA ngke E kamanenaa m'akana

³ni karaoi taiani kakai i Aikubita, ma ni karaoi b'aai aika kakamaaku nakon te uea ma ana Aomata ni kabane.

⁴Ao ngke a kakioingkami kaain Aikubita n aia kaanibuaka, ao kam noora te UEA ngke E kab'ab'aia n Taari are Uraura, ao a bon teimatoa naba ni maraki ni konaakiia arei.

⁵Kam noori baika E karaoi te UEA i bukimi ngke kam mena n te rereua, ni karokoa te tai are kam roko iai ikai.

⁶Ao kam noora naba aron te UEA ngke E kauka te tano i nuukan ara tabo are ti kateimaeka iai i aan ana autinrianna Ratan, ao Abiram, [56] ake a kab'autaki ma aia utu, aia man aika kawakawa, ao aia autinrianna.

⁷Kam bon noori ni matami korakoran m'aakan te UEA ni karaoi baikai ni kabane.

⁸Ae kam nang ri nanon te Karaanga are te Ioretan n te tai ae aki maan, ao ngkana kam ongotaeka nakon taian tua ma reirei aika I anganingkami n te bong aei, ao kam na bon anganaki te korakora i bukin tauan te aba

⁹are E a tia ni berita iai te UEA nakoia ami bakatibu, ma kanoaia. E rawata iai te miriki ao ana karewe te manibeeru, ao kam na maeka ikekei ma ni kukurei iai n te tai ae maan.

¹⁰Bon te aba ae e raoiroi riki nakon are kam maeka iai i Aikubita, ike kam m'akuri korakora iai, e ngae ngkana kam ti teboki aroka.[57]

¹¹Ma a tetebokaki taian tabuki ma maunga ake n te aba ni berita n te karau mai karawa,[58]

¹²i bukina b'a E teimatoa te UEA n taratara aon te aba aei, ao ma ni kakawakinna i nanon te ririki ae b'anin.

¹³E mwiokoingkami te UEA ae Atuami b'a kam na tangiria ma ni m'akuri i bukina ma nanomi ao tamneimi ni kabane. Ngkana kam ongotaeka nakoina,

¹⁴ao E na karokoa te karau ni bon tain te karau, [59] ma ngaia are, a na reke kanami, ma ami wain, ao b'aan te oriwa aika m'aiti, ao a na m'aiti naba taiani uteute i bukiia ami nanai ni man.

¹⁶Ma kam na tarataraingkami man te kariri b'a e na aki katannakoingkami mairoun te UEA. Ao ngkana kam taromauriia atua riki tabeman,

¹⁷ao ane na un te UEA, ao E na aki karokoa te karau. Ao ane a na akea te b'ai ae na riki n ami katawanang, ao kam na maunanako man te aba ae e raoiroi ae a tia n anganingkami te UEA.

¹⁸Kamatenikunai tuua aikai, ao iangoi n taai nako. Koroi taekaia ao kabaei i aoni baimi ao i aon naba ram'ami b'a kam aonga n teimatoa n ongotaeka nakon iai.

¹⁹Reireiniia ami ataei iai. Taetaekinna nakoia ni katoa tai--ngkana tao kam nakonako i aon te kawai ke ngkana kam nang matu i aon kiemi n te tairiki, ke ngkana kam uti n te ingabong.

²⁰Koroi i aon kain mataroan ami auti, ao i aon mataroan naba te kawai n rin.

²¹Ao ane e na anaanau iai maiuia kanoami n te aba are E a tia n anga te UEA nakoia ami bakatibu. A na maiu ikekei ami utu ni karokoa tokin aonnaba.

²²Kam na tangira te UEA ae Atuami ao ongotaeka n ana Tua ma ana Reirei aika I anganingkami n te bong aei. Ngkana kam maiuna nanon te UEA,

²³ao E na buokingkami ngkana kam taua te aba. E ngae ngkana iai taian botannaomata aika korakora riki nakoimi, ma E na kanakoia te UEA ngkana kam buakaniia.

²⁴Kam na taui aaba n taabo nako ike kam nako iai, ni moa man Rereuan Maiaki, ni karokoa Maungan Reb'anon, ao man te Karaanga are Iuberetiti ni karokoa Taari are te Mereterenian.

²⁵Bon akea ae na kona ni kaaitaraingkami. E na karaoia aomata ni kabane te UEA b'a a na maakuingkami, n aron are E a tia ni berita iai.

²⁶Kam na rinea nanomi—Kam tangiria b'a E na kakab'aiaingkami te UEA, ke kam tangiria b'a E na katekebuakaingkami?

²⁷I anganingkami ana Tua n te bong aei, ao ngkana kam ongotaeka nakoina, ao E na kakab'aiaingkami.

²⁸Ma ngkana kam aki ongotaeka nakoina ma n taromauri taian atua aikai aika akea te b'ai ae a kona ni karaoia i bukimi, ao E na katekebuakaingkami te UEA.

²⁹Ngkana E tia te UEA ae Atuami ni buokingkami n taua te aba, ao kam na karaoa te bootaki ike kam na katanoata iai Ana kakab'aia te UEA man te Maunga are Keritim, ao Ana kamaraia man te maunga are Eeb'ara.

³⁰Kam bon ataia b'a a mena maunga aika uoua aikai i maeaon te Karaanga are te Ioretan n te aba are e mena irouia kaain Kanaan ake a maeka ni M'aruan te Karaanga are te Ioretan. A mena maunga aikanne i maeaon te kawai i rarikin arokan More are tabu n iteran Kirekara are teuana.

³¹Kam na ri nanon te Karaanga are te Ioretan n te tai ae aki maan ma n taua te aba are a tia n anganingkami te UEA. Ao ngkana kam a tekateka raoi ikekei,

³²ao kam na kakaonimaki n ongotaeka nakon ana Tua ma ana Reirei aika I anganingkami n te bong aei.