Read Te B'aib'ara Te Tua-Kaua 13 Bible Online

Te Tua-Kaua 13 - Te B'aib'ara bible

Te Tua-Kaua 13

¹Ane na roko te burabeti [68] temanna n te bong teuana ae kona ni karaoi taian kakai ke n taekin b'aai aika a na riki ni boong aika tuai n roko. Ao ane na kaangai te burabeti, Ti nang waakina taromaurian te anti temanna--te anti ae ti tuai ataa arona.

³Kam na aki ongo iroun te burabeti ngkana e taekini taeka aikai. B'a E na taratara te UEA ae Atuami n nooringkami b'a kam tangiria ma nanomi ao tamneimi ni kabane ke kam aki.

⁴Kam na riai n ongotaeka raoi nakon te UEA. Taromauria te UEA n ti Ngaia, ao karaoa aei ma te maaku ao te ruru,

⁵i bukina b'a E kamaiungkami ngkoa man te toronaki i Aikubita. Ngkana e tuangngkami te burabeti b'a kam na aki ongotaeka nakon te UEA ae Atuami ma ni katokaa taromauriana, ao kam na ataia b'a e buakaka te burabeti anne, ao e na riai n tiringaki.

⁶Ane na manga kaangai temanna nakoimi, Ti nang taromauriia anti riki tabeman. E aoria naba ngkana raoraomi, ke tarimi, ke m'anemi, ke natimi te m'aane, ke natimi te aine, ke buumi ae kam rangi n tangiria, ma kam na bon aki ongo naba i rouna. Bon akea temanna te aomata ae kam na ongo i rouna ae taekin baikai. Ma kam na karebanaa te aomata anne ni ua matena n taian atiibu. Boni ngkami moa aika kam na moan kareia, ao i mwiina, a na kabanea te m'akuri aomata te korakina. Kam na bon aki kaota te nanokawaki. Bon akea te b'ai ae a tia ni karaoia nakoimi ke nakoia ami bakatibu antiia botannaomata tabeua. A na kataia ni katokaa taromaurian te UEA are kamaiungkami man te toronaki i Aikubita aomata akana a tuangkami b'a kam na taromauriia anti riki tabeman. Ma ngaia are, kam na tiringiia aomata akana a tuangngkami b'a kam na taromauriia anti riki tabeman.

¹¹Ao ngkana a ongo anne Iteraera ni kabane, ao ane a na maaku, ao akea riki ae e na manga karaoa te m'akuri ae buakaka aei.

¹²Ngkana E tia te UEA n anganingkami taiani kaawa ike kam na maeka iai, ao ane kam na ongo maningongoo i bukin te kaawa teuana.

¹³Ane kam na ongo aia taeka aomata aika akea manenaia n tuangiia aomata ni kabane b'a a na taromauriia anti riki tabeman, e ngae ngke bon akea te b'ai ae a tia ni karaoia anti aikai i bukiia.

¹⁴Kam na riai ni kakaea raoi etin te rongorongo, ao ngkana e boni koaua b'a a tia ni karaoa te m'akuri aika ribaaki kaain te kaawa anne i nanon abami,

¹⁵ao kam na anai ami kabaang ma n tiringiia ni kabane, ni ikotaki naba ma aia nanai ni man ni kabane.

¹⁶Booti aia b'ai ni kabane aomata ake a maeka ikekei, ao katabukirakei n taian tabo ni kabob'ai, ao bon akea teuana ae kam na anaia mai iai, ao kabuoki aia b'ariko ni b'ai akanne ma te kaawa anne ni kabane, ao kam na aki manga katea te kaawa anne. E na riki te kaawa anne b'a te karea nakon te UEA ae Atuami aika eti. Ao E na toki unin iai te UEA nakoimi, ao E na nanoangaingkami, ao E na katetekeraoingkami, n aron are E berita iai nakoia ami bakatibu.

¹⁸Ao bon anne bukina are kam riai ni karaoi iai baike E taekin te UEA ae atuami b'a a eti. I anganingkami tuua ma reirei aikai n te bong aei, ao kam na riai n ongotaeka iai.