Read Te B'aib'ara Te Tua-Kaua 15 Bible Online

Te Tua-Kaua 15 - Te B'aib'ara bible

Te Tua-Kaua 15

¹Kam na katanoata ni katoa koron itiua te ririki ni kaangai, E taku te UEA b'a a na aki kab'araaki taian roun. Ngkana iai te m'ane ae ko rouniia iroun te Iteraera temanna, ao ko na aki manga tangira kab'araana.[73]

³E na ti b'ainaki taian tua aikai n taian roun bon i marenaia Iteraera. Ao taian iruwa a na bon kab'arai mwiin b'aai ake ko karouniia iai.

⁴Bon akea ae na kainano mai buakoia Iteraera. E na anganingkami te aba aei te UEA ae Atuami, ao E a tia ni berita b'a E na katetekeraoingkami, ngkana kam ongotaeka nakon ana Tua ma ana Reirei aika I anganingkami n te bong aei. Kam na anga ami m'ane b'a a na tangoaki irouia botannaomata aika bati, ma kam na aki tangom'ane mairouia. Kam na tautaekaniia botannaomata aika bati, ma a na aki tautaekaningkami.

⁷I mwiin anganakimi abami n tatabemani ngkami, ao ane e na bon iai naba Iteraera ae maeka n ami kaawa ae na kainano. Ngkana iai ae riki irouia anne, ao kam na aki tauti ke n nanonrang n ami m'ane.

⁸Ma kam na akoia, ao anganiia te m'aiti ae a kainanoia b'a a na tangoia.

⁹Kam na taratara raoi b'a kam na aki kaangai i nanomi, Ae a kaan te kaitiua n ririki, ao ae e na aki okirai au m'ane. E na rangi n rawaawata ami bure ngkana kam karaoa anne, ao ngkana kam rangi n nanonrang naba n aki kan anganiia aika kainano buokaia. Bon am koraki, ao ngkana ko rawa ni buokiia, ao e aki ngkoa ao a butia naba te UEA, b'a E na baairei taekami b'a kam bure iai ke kam aki. Ao ane a na tua b'a kam bure.

¹⁰Kam na riai ni kukurei n anganiia aika kainano baika a tangiria, b'a i mwiina, ane E na kakatekeraoingkami te UEA ni b'aai ni kabane aika kam karaoi.

¹¹Ane a na bon iai n taai nako tabeman Iteraera aika kainano ma n tangira buokaia. Ao bon anne bukina ngkai I mwiokoingkami b'a kam na tituaraoi nakoia.

¹²Ngkana iai iroumi ae kabooa Iteraera b'a ana toro, ao kam na kainaomataia i mwiin onoua te ririki.

¹³Ao kam na aki ti tuangiia b'a a nang nako b'a a inaomata, ma karekei aia b'ai aika a na uoti,

¹⁴anganiia taian tiibu ao kooti, ao taian uita ma taian wain aika raoiroi b'a uotaia. Kam na kam'aita anganakiia, n aron kam'aitakin anganakimi naba iroun te UEA.

¹⁵I mwiokoingkami b'a kam na ongotaeka iroun te UEA b'a kauringakimi b'a bon tooro ngkoa ngkami i Aikubita i m'aain kainaomataakimi i rouna.

¹⁶Ngkana e kaangai temanna ami toro, I tangiriko ma am utu, ao I maiu riki ngkana I tiku iroum. Ma ngaia are, I butiiko b'a ko na aki kanakoai.

¹⁷Kaira te toro anne kaaniia nakon mataroan am auti, ao karina te biti ae kakang i reben taningana ni kanimm'a nakon te mataroa. A na riki tooro akanne b'a am toro ni karokoa tokin maiuia, a aoria ngkana m'aane ke aine.

¹⁸Kam na aki ngurengure ngkana kam kainaomata te toro. B'a kam a tia ni kabanea onoua te ririki ni kam'akuria n iteran boon te aomata ae kabooaki.[74]

¹⁹Ngkana te karimoa te m'aane natin te kao ke te tiibu ke te kooti, ao e na riai n anganaki te UEA. Kam na aki anaia karimoa m'aane aika kao b'a ami man ni m'akuri, ke ni koroburaea te karimoa te tiibu ae te m'aane.

²⁰Ma, kam na uoti karimoa m'aane mai buakoia man aika kawakawa aikai nakon te tabo are E a tia n rineia te UEA ae Atuami b'a taabo n taromauri. Kam na kareaniia ma ami utu nakon te UEA, ma ni kanna b'a m'akoron te am'arake are tabu.

²¹Ma ngkana e m'auku, ke e matakii, ke iai toabuakan b'ain rab'atana teuana, ao kam na aki kareanna nakon te UEA ae Atuami.

²²Kam kona n tiringnga ma ni kabooa nako n te tabo are kam maeka iai, ma ni kanna n aron kanakin irikon te ria ke te katere n aron are kam tiringnga ake konami ni kaeman. A kona naba ni kanna aomata akana a kam'araa ao a aki tau nakon te taromauri.

²³Ma kam na bon aki kana raraan te man, katinakoa raraana nako aon tano.