Read Te B'aib'ara Te Tua-Kaua 18 Bible Online

Te Tua-Kaua 18 - Te B'aib'ara bible

Te Tua-Kaua 18

¹A na aki reke abaia kaain te baronga are Rewi ma ibonga. Ma e na reke irouia m'akoron te karea are e anga te aba nakon te UEA

²i bukina b'a E a tia ni berita te UEA b'a E na karerekei kainanoia n te aro aei.

³Ngkana kam kareana te kaom'aane, ke te tiibu, ao a na b'aina angana, tabana ake uoua, ao birotona ibonga. [88]

⁴Ao i rarikin anne, a na reke naba tib'aia man moan m'akoron te tai are te uita, ao man ami moan tai naba n te wain ma b'aan te oriwa.[89] Ao kam na anganiia naba ami moan buraentiibu ake kam koroi man ami tiibu ni katoa ririki.

⁵Kam na anga taiani b'aintangira aikai nakoia ibonga, i bukina b'a a tia n rineaki ma kanoaia iroun te UEA mai buakoia barongan Iteraera b'a a na karaoi m'akuri aika raka n te tabo n taromauri.

⁶A kona kanoan Rewi ni kabane ni kiitana aia kaawa, ma n nakon te tabo are a tia n rineia te UEA b'a te tabo n taromauri.

⁷A na riki b'a Ana tia m'akuri ae raka te UEA ikekei [90] n aroia kanoan Rewi ni kabane ake tabeman,

⁸Tao a na kona n reke aia m'aane kanoan Rewi tabeman man kabonakoakin aia b'ai te utu teuana ma teuana, ao tao e aki reke irouia ake tabeman. Ma kanoan Rewi ni kabane ake a m'akuri n te tabo n taromauri, a na reke kanaia ae boraoi m'aitina i marenaia man te am'arake are man taiani karea ma b'aintangira ake a uotaki mairouia aomata.

⁹Ae kam a kan roko n te aba are anganingkami te UEA ae Atuami. Ao a bati n ribaaki aia m'akuri botannaomata ake a maeka ikekei iroun te UEA, ao kam na aki katotongi aia m'akuri.

¹⁰Kam na aki kareani natimi m'aane ke natimi aine. Ao kam na aki naba kataia ni karaoi taian m'akuri n tabunea, ke m'akuri ni ibonga irouia anti n tataekin kanoan boong aika tuai roko [91] ke ni kamaraiaia aomata, ke n taetae ma tamneia aika mate.

¹²E bon rangi n aki kukurei te UEA irouia aomata aika a karaoi baikai, ao bon anne bukina are E na buokingkami iai ni kamaunaia botannaomata akana n te aba arei.

¹³Kam na aki bure ni karaoa te m'akuri teuana mai buakon baika a ribaaki aikai.

¹⁴Kam na nako n ninia te aba ma n taua mairouia botannaomata ake a kakaraoi m'akuri n tabunea ao n ibonga irouia anti. E bon aki kariaia te UEA ae Atuami b'a kam na karaoi baikai.

¹⁵Ma, E na rinea temanna mai buakoia ami aomata b'a te burabeti ae ai arou, ao kam na karaoa te b'ai are taekinna te burabeti.

¹⁶Kam bubutiai ngkoa te burabeti ngke kam bootaki n te Maunga are Tinai [92] ao kam taku nakon te UEA, Taiaoka b'a Ko na aki kaongoira b'anaam, ao tai kaota nakoira te ai ae kakamaaku aei, b'a ti na mate ngkana e riki anne nakoira.

¹⁷Ao i mwiina, E taku te UEA nako iu: Moote, e eti ane a taekinna aomata.

¹⁸B'a ngkana I kan taetae nakoia aomata, ao N na rinea temanna te burabeti mai buakoia ae ai arom. N na anganna Au rongorongo nakon te burabeti b'a e na manga tuangiia raoi aomata te b'ai are I tuangnga.

¹⁹Ngkai bon te rongorongo mairou, ao e na katuaeaki te aomata ane aki ongotaeka nako iai.

²⁰Ma ngkana arona b'a I tuai taetae, ao e a manga taetae te burabeti ma ni bukinna b'a aongkoa Au rongorongo, ao kam na riai n tiringa te burabeti anne, ao te burabeti naba ae taku b'a e taekina ana rongorongo te atua temanna.

²¹Tao kam na kaangai i nanomi, Ti nang kanga n ataia b'a bon te rongorongo mairoun te UEA?

²²Kam boni kona n ataia b'a ngkana bon te rongorongo mairoun te UEA, ao e na boni koro bukina, ma ngkana e aki korobukin ana taeka te burabeti ao ngkanne kam na ataia b'a e a tia te burabeti ni kewe b'a aongkoa Ana rongorongo te UEA. Kam na aki maaku irouia burabeti aika a taekin rongorongo aika tiaki mairoun te UEA.