Read Te B'aib'ara Te Tua-Kaua 29 Bible Online

Te Tua-Kaua 29 - Te B'aib'ara bible

Te Tua-Kaua 29

¹Ma ngaia are, e a kabanea ana taetae Moote i bukin tuangakiia aomata te b'ai ae a riai ni karaoia i bukin kaawakinan te boraraoi ma te UEA are E karaoia nakoia i Moaaba, are bon raon are E a tia ni karaoia te UEA n te Maunga are Tinai. [124]

²Ao e wetea te botannaomata are Iteraera Moote ao e taetae nakoia ni kaangai: Ngke kam mena ngkoa i Aikubita, ao kam noora te UEA ni karaoi taiani kakai are a karika te kangaanga nakon te uea ma ana aobitia, ao kaain abana ni kabane.

⁴Ao e bon tuangkami naba ni kaangai, I kairingkami i nanon 40 te ririki i nanon te rereua, ao a na aki uruaki ami kunnikai ao ami kauniwae, ao I anganingkami naba kanami ae raka.[125] I karaoi baikai b'a kam aonga n ataia b'a bon Atuami Ngai. Kam ti kona n atai nanon baika kam a tia n noori ao baika kam a tia n ongo ngkana E bitii nanomi te UEA.

⁷Ngke ti moan kateimaeka n rianna ngkoa ikai, ao a buakaniira uean Etibon are Taion ao uean Batian are Oka, ma ti konaia.

⁸Ao ti taua abaia ao ti tib'aia i aoia baronga ake Reuben, Kaata, ao Manate mainiku.

⁹Kaain Iteraera, E a tia te UEA ni karaoa te boraraoi ma ngkami, ao ngkana kam kaawakina tib'angami, ao kam na tetekeraoi ni b'aai ni kabane akana kam karaoi.

¹⁰Kam a bane n tei i matan te UEA, ngkami aika taani kairiiri, taian aobitia, ami rorobuaka nako,

¹¹ateiaine, ataei, ao I-Abatera ake a uraki aia ao a uraki ran i bukimi.

¹²Kam bane n roko n te tabo n taromauri aei ni kaota nanomi b'a kam na kaawakina tib'angami n te boraraoi ma te UEA ae Atuami.

¹³E berita te UEA n te boraraoi aei, b'a kam na riki b'a ana Aomata, ao E na riki b'a Atuami. E moan karaoa te boraraoi aei ma ami bakatibu ake Aberaam, Itaaka, ao Iakob'a, ao ngkai E a manga karaoa naba te berita aei nakoimi, ma tiaki ti nakoimi ma bon nakoia naba kanoami.

¹⁶Ngke ti maeka i Aikubita, kam nooriia kaain Aikubita n taromauriia taian bouananti aika karaoaki man te kai, te atiibu, te tirewa, ao te koora, aika ribaaki. Ao i mwiina, ngke ti a manga m'ananga i buakoia botannaomata ake tabeua, ao kam noori aomata iai b'a a taromauri bouananti tabeua aika ribaaki.

¹⁸Ma ngaia are, kam riai ni kakoaua raoi b'a a bon kakaonimaki kaain ami baronga nako nakon te UEA ma n aki tataromauri bouanantin botannaomata tabeua. Ngkana iai mai roumi ae taromauri taian bouananti, ao kam na riki b'a kaanga wakaan te aroka ae rangi ni mao, ma ni kamaamate uaana.

¹⁹E ngae ngkana bon Iteraera ngkoe ae ko atai ni kabane kanoan te boraraoi ma te UEA, ma E na bon aki naba kakab'aiako ngkana ko kakaitaraa. Ko na taku i nanom b'a ko kona ni karaoia ao akea tuaam, ma ko na karika te kangaanga nakoia Iteraera ni kabane b'a a na katuaaeaki naba ma ngkoe. [126]

²⁰Ao E na rangi n un te UEA, ao E na aki kab'arai ami bure, ma E nang kaokoroingkami mai buakoia baronga ake tabeua. Ao i mwiina, E na kamateingkami ni kab'aka i aomi taian taeka ni kamaraia ni kabane ake n Ana Boki n Tua te Atua, ao ane e na mauna nako taekami n aki manga uringaki ni karokoa tokin aonnaba.

²²Ao E na orea abami n taian aoraki ma kabuanib'ai. Ao a na noora abami kanoami ao I-ianena ake n aaba tabeua,

²³b'a e a riki b'a te rereua ae rangi ni kabuebue ae taari aona ni kabane, ao te bubu ae m'auteretere, ao akea te aroka ae e kona ni unikaki iai, akea te aroka ae kona ni bwebwee iai, ao bon akea naba te aroka ae e kona ni maiu iai. A na riki abami b'a kaanga aron maten aaba ake i rarikin kaawa ake a buubura ake Tootom, Komora, Atema, ao Teboiim i mwiin unin te UEA irouia ao E kamaunaia. [127]

²⁴Ao ane a na titiraki aomatan botannaomata tabeua ni kaangai, E aera ngkai E kamaunaa te aba aei te UEA? Tera ae E a rangi n un iai?

²⁵Ao a na anganaki te kaeka ae kaangai: A tataromauria te UEA ara bakatibu ngkoa, ma i mwiina, ngke E a tia te UEA ni kaotinakoia mai Aikubita ma ni karaoa te boraraoi ma ngaiia, ao a manga aki ira nanon te boraraoi

²⁶ma ni manga taromauriia bouananti tabeman aika bon akea buokaia mairouia. Ao E a tia te UEA n ribaia Iteraera b'a a na taromauriia taian atua aikai.

²⁷Ma ngaia are, E a rangi n un, ao E a katuaaea te aba ni kab'akai taiani kamaraia ni kabane i aona, ake a koreaki n Ana Boki n Tua te Atua. Ao i mwiina, E kouta Iteraera mai oina, ao e karenakoa nakon abaia I-ianena, ike a mena iai ni karokoa te bong aei.

²⁹E a tia ni kaota ana Tua te UEA ae Atuara nakoira, ao ti na riai n ongotaeka iai n taai nako ma kanoara, ma bon iai naba b'aai aika E tuai kaoti nakoira.