Read Te B'aib'ara Te Tua-Kaua 32 Bible Online

Te Tua-Kaua 32 - Te B'aib'ara bible

Te Tua-Kaua 32

¹Ongora n te b'ai ae N na taekinna, Aonnaaba ma karawa,

²N na reireiningkami Iteraera. A na riki au taeka b'a kaanga te maatim ni karau ae b'aka i aon aroka aika uarereke, ke kaanga te aoi i aon taian uteute.

³Kam na kaai n neboa aran te UEA ae Atuami ae kamimii ma ngai.

⁴Bon te b'a ae korakora te UEA, [130] ao e aki roko n te karaoa te kaairua. E kona n onimakinaki n taai nako b'a boni Ngaia are E kona ni uota te motikitaeka ae eti.

⁵Ma ngkami kam kewetaia ao kam karaoi m'akuri ni baabakanikawai ao kam aki kakaonimaki nakoina, ao kam aki tau n riki b'a ana Aomata kam bon kamamaaeingkami ao bon akea manenami n riki b'a natina.

⁶Bon te UEA tamami, Iteraera, are E boni karikingkami, ma kam kabooa mwiin karikami ni m'akuri ni baba.

⁷Kam na iangoi roro ake ngkoa. Titirakiniia ami karo ke ami kara. Ao ane a na tuangkami

⁸b'a E anga te aba te UEA ae Moan te M'aaka nakoia botannaomata ni kabane ao E anga nako ia botannaomata anera n tatabemaniia nako ake a tia n tantani,

⁹ma E kaawakina Iteraera te UEA. [131]

¹⁰Iteraera, E kuneingkami te UEA n te aba are e rereua are korakora iai te ang ae tangim'aaka. E riki te UEA b'a nonomi are kaawakiningkami kaanga ai aron kaawakinakin kanoani matana.

¹¹Kaanga ai aron te ikare te UEA ae reireina natina ni kiba, ma n tatauraoi ni kiba rikaaki n rawea natina mai akuuna.

¹²Iteraera, E kairingkami te UEA, ao akea buokami mairouia atuaia aika ianena,

¹³E buokingkami n taua te aba. Ao a rangi ni m'aiti taian uita n ami katawanang. A maiu taian oriwa i aon taabo aika kiriatiibu, ao a kuneaki aia karewe manibeeru i buakon taiani b'a.

¹⁴A karekei taian miriki ma taiani b'ata ami nanai ni kao ao ami nanai n tiibu, ao kam rinerinea kanami te iriko maiu ao a reke kanami iriko aika rangi n raraoi mairouia ami tiibu ma ami kooti ake a am'am'arake n uteuten Batian. Te naani kabanea n tamaroa ami uita ao kam mooi n te wain ae te kabanea n raoiroi.

¹⁵Iteraera, ngke kam a marikarika, ao kam a kakaitaraa te UEA are ami Tia Karikib'ai; kam rawa nakon te B'a ae Korakora,[132] are bon ti Ngaia ami tabo n rawei maiumi.

¹⁶Kam kamaraka nanon te UEA ao kam kaunna ngke kam taromauriia bouananti aika bati n ribaaki ao atuaia ianena.

¹⁷Kam angakarea nakoia taimonio, ao bouananti aika akea bonganaia [133] aika aki kona ni buokingkami, atua aika boou aika tuai man taromauriaki irouia ami bakatibu

¹⁸Kam rairaki nako mairoun te Atua, ae ami Tia Karikib'ai, kam m'aninga taekan te B'a ae Korakora,[134] are bon oini maiumi.

¹⁹Bon natin te UEA ngkoa ngkami, ma kam kaunna. Ngaia are, E a aki kubaringkami

²⁰ao E taku, Kam aki kakaonimaki, ao bon akea onimakinakimi. Ma ngaia are, N na aki kaekaa ami tataro; N nangi bon ti mamataku naba ma n taratarai b'aai aika na riki nakoimi.

²¹Kam taromauri bouananti aika akea bonganaia, kam kamaraka nanou ao kam kaunai. Ao ngkai N nang kanakoa nakoimi te botannaomata ae akea bonganaia ae akea manenaia b'a a na kamaraki nanomi, ma ni kauningkami.

²²Au Aomata, N na ikeikena te ai are e na kab'akaingkami nako abaia maate. E na tiring arokan ami nne n aroka ma ni kabuoki rikaaki aan taiani maunga.

²³N na karokoi taian kabuanib'ai aika bati aika a na ewari ngkami n aron te kainikatebe.

²⁴Kam na oreaki n te baki ao taian aoraki ae kamaamate, ao n aia boitin maan aika kawakawa aika aki manana ao aia boitin taian naeta.

²⁵Ti te bo aroia aika ikawai ma ataei a na mate i nanon kawain te kaawa ao a na maaku i nanon aia auti.

²⁶I tangiria ni kamaenakoingkami b'a e aonga n aki ataaki b'a kam boni maeka ngkoa ikanne.

²⁷Ao I maaku ngke I ongo b'anaaia kairiribai aika kaangai, Ti kataenikaia Iteraera n akea Ana buobuoki te UEA.

²⁸Kaain Iteraera, ao anne Ana taeka te UEA ake E taekin nakoimi. Ma bon akea wanawanami, kam aki kona ni kakauongo nakon taeka n reirei.

²⁹Ngke kam karaoia, ao kam na noora kawaimi are kam m'ananga nako iai.

³⁰E na kanga ti temanna aia tautia kairiribai ni kakioia teuana te nga tautian Iteraera? Ke a na kanga uoman mai buakoia ni kakioia tebwina tengaa aia taanga mai roura? E ti kona n riki aei ngkana E katoka Ana kakaawakin te UEA nakon Iteraera ma ni katokanikaia kairiribai.

³¹E ngae ngke a ataia ara kairiribai ae bon ti Atuara ae te B'a ae Korakora. [135]

³²Bon taian kureebe ara kairiribai aika nene wakaaia ni katawanangin Tootom ao Komora.[136] A kariki kureebe aika rangi ni mao ni kamaamate;

³³a rangi ni kamaamate riki aia wain nakon ana boitin te naeta.

³⁴Ma E a tia te UEA ni koroi mwiin aia bure ma ni kainna n Ana ru ni kaawakinib'ai.

³⁵A na reke kaiia ara kairiribai n te tai ae aki maan [137] ao ane a na karina ni marannako ao e na waekoa n taorimwiiaki n te kabuanib'ai ae korakora.

³⁶E na ti kona n nanoangaia te UEA ma n anganiia te motikitaeka ae eti ngkana ai ti tabeman ana Aomata, ao akea korakoraia ao a riki tabeman mai buakoia b'a buure, ao E a tib'a nanoangaia te UEA ao E a anganiia te motikitaeka ae eti.

³⁷Ma E na kaangai moa te UEA, Kam birinakoia atua riki tabeman i bukin kamaiuami; a aki kona ni buokingkami?

³⁸Kam kareana te wain nakoia ma ami karea ake kabanea n raoiroi. A aki kona ni buokingkami atua aikanne ke ni kamaiungkami?

³⁹Kam bon aki ataia? Bon ti Ngai te Atua; ao akea riki temanna; Bon Ngai ae I anaa te maiu ao I a manga kaokia. I katuaaingkami n te rawaawata. Ma N na kamaiungkami ngkai, ao bon akea ae kona ni katokai.

⁴⁰I karaoa te berita ae matoa aei: n arou ngkai I maiu n aki toki,

⁴¹N na karaoa te irantaanga nakoia kairiribai aika ribaaki. N na kakangiia au kabaang ao e na raaiti kaanga te iti.

⁴²A roko nanoia au kanoanikatebe n nimakin raraaia kairiribai; ao au kabaang e na katoong irikoia ma raraaia kairiribai. E na tiringiia buure, ma ni korei ni kanakoi atuuia aia taani kairiiri.[138]

⁴³Tuangiia taiani karawa b'a a na karaoa aia bootaki ni kukurei ao taian atua ni kabane b'a a na bobaraaki nakon te UEA, [139] i bukina b'a E na irantaangaia mairouia kairiribai aika ribaaki aika tiringiia ana Aomata. E na kab'arai ana bure Iteraera ma ni kaitiaka abaia.

⁴⁴Ao e taekin taekan te anene Moote ma Iotua b'a aonga ni bane n ongo Iteraera.

⁴⁵Ao ngke e a bane ana taetae Moote

⁴⁶ao e taku, Kam na ururinga te anene ae I a tia n reireiningkami n te bong aei. Ao e na riki b'a te b'ai n reirei nakoimi b'a kam riai ni manga reireiniia ami ataei b'a a na ongotaeka b'aai ni kabane akana m'akoro n Ana Boki n Tua te Atua.

⁴⁷Bon tiaki taeka aika akea nanoia taian tua, b'a a kona ni kananaui maiumi n te aba are kam nang anaia.

⁴⁸Ao rimwi riki n te bong anne, ao E taku te UEA nakon Moote:

⁴⁹Ko na waerake nakon Maungan Abarim ake a rinan i Moaaba ni kaaitaraa Ieriko. Ao ngkana ko roko i taberan te Maunga are Nebo, ao ane ko na noora te aba are Kanaan, are I anganiia Iteraera.

⁵⁰Ao ane ko na mate, ao ko na taunaki i taubukin te maunga, n aron maten are Aaron ngke e taunaki i aon te Maunga are Ora.

⁵¹Kam uaia n aki ongotaeka ni kakaonimaki nako iu n te Koburake n ran are i Merib'a i rarikin Kateti n te Rereua are Tin. [140] Bon te Atua Ngai, ma ko aki karaoa karineau ma onimakinau i mataia Iteraera n aron are I kantaningaia.

⁵²Ma ngaia are, N na anga te aba nakoia Iteraera, ngkoe, ko na ti nooria mai kiraroa.