Read Te B'aib'ara Te Tua-Kaua 4 Bible Online

Te Tua-Kaua 4 - Te B'aib'ara bible

Te Tua-Kaua 4

¹Iteraera, kam na ongora n taian tua, ao taian reirei aikai. Ngkana kam ongotaeka nako iai, ao kam na maiu, ao ane kam na rin n te aba are e anganingkami te UEA b'a abami. Bon te Atua Ngaia are a taromauriia ami bakatibu,

²ao ngkai E a manga riki b'a Atuami. I taekin nakoimi tuua ni kabane ake E tuangai, ma ngaia are, kam na aki karakai ke ni kanakoi b'aai tabeua man tuua akanne.

³Kam bon noora aron tiringaia ni kabane ake a taromauria Baara Beora.

⁴Ma kam bane ni maiu n te bong aei ngkami ake kam kakaonimaki nakon te UEA ae Atuami.

⁵Bon akea te botannaomata teuana ae raoiroi riki ana tua nakon tuua aika E a tia n tuangai te UEA ae Atuau b'a N na anganingkami. Ngkana kam kakaonimaki nakon tuua aikai ngkana kam rin n te aba, ao kam bon kaotingkami iai nakoia botannaomata tabeua b'a kam wanawana. Ao n te koaua, ao aomata ake a ongo ami tua a na bon kaangai, A bon rangi ni wanawana te botannaomata arei, ao tera te b'ai ae karakai arora nakoia botannaomata tabeua? E raka arora i bukina b'a iai Atuara ae memena i rarikira n taai nako ma ni kaekai ara tataro nako.

⁹Kam na rangi n taratara raoi b'a kam na aki m'aninga b'aai ake E a tia ni karaoi te UEA nakoimi. Kam na teimatoa ni bon kakauringingkami i bon iroumi, ao tuangiia natimi ma tibumi naba.

¹⁰Kam uringa te tai are kam tei iai i matan te UEA n te Maunga are Tinai? [28] Ao E taku te UEA, Kairiia mai Iteraera nako ikai. I tangiria n taetae nakoia b'a a aonga n ongotaeka nako Iu i nanon aia tai ni maiu, ao a na manga reireiniia aia ataei b'a a na ongotaeka naba i Rou.

¹¹E katobibiaki te Maunga are Tinai [29] n te nang ae matenten ae roro, ao e birirake te ai nako karawa. Ao kam nako oin te Maunga,

¹²ao E taetae te UEA nakoimi man te ai. Ao kam bon ongo b'anaana, ao kam atai baike E taekin, ma kam aki nooria.

¹³Ao E taetae te UEA nakoimi ni karaoa te boraraoi ma ngkami, ao E tuangngkami b'a kam na kakaonimaki nakon Tuua ake Tebwina. Ao i mwiina, E koroi Tuua aikai te UEA i aon atiibu aika raababa aika uoua.

¹⁴E anganai te tua ma reirei aikai te UEA b'a kam na ongotaeka nako iai n te aba are kam na taua i maeaon te Karaanga are te Ioretan.

¹⁵Ao ngke e taetae te UEA nakoim man te ai, ao bon akea rab'atana. Ma ngaia are, kam na taratara raoi

¹⁶b'a kam na aki taromauriia bouananti. Tai karaoi bouananti aika a na taromauriaki, aika kaanga tamneia m'aane, ke aine,

¹⁷maan, ke mannikiba,

¹⁸ke taiani beru, ke taian ika.

¹⁹Ao ngkana kam noora nam'akaina ke taian itoi, ao kam na aki bobaraaki n taromauriia. E bon katikuia te UEA ikekei b'a aonga n taromauriaki irouia botannaomata tabeua.

²⁰Ma bon ana Aomata te UEA ngkami, i bukina b'a E kairiingkami i nanon taiani kakatai aika kabuebue, ao E kamaiungkami mai Aikubita.

²¹Ao E un te UEA nako iu i bukin ami taeka, [30] ao E tuangai b'a E na aki kariaiakai n ri nanon te Karaanga are te Ioretan nakon te aba are E a tia n anganingkami.

²²Ma ngaia are, N na tiku n iteran te Ioretan aei, ma ngkami kam na ri nanon te Ioretan n taua te aba.

²³Kam na ururinga te boraraoi n taai nako are E karaoia te UEA ae Atuami ma ngkami, ao kam na aki karaoa te bouananti ni katotongi tamnein b'aai tabeua.

²⁴E na un te UEA ngkana kam taromauri atua tabeman, ao E kona n riki b'a te ai n tiring b'aai ni kabane ake i m'aain kawaina.

²⁵Ao ane kam na waekoa n ri nanon te Karaanga are te Ioretan ma n tekateka n te aba. Ao n ririki aika na roko, ao a na riki natimi, ao a na manga karikiia tibumi. Ao i mwiin ririki aika bati, ao ane kam na m'aninganako, ao kam na karaoi bouananti, e ngae ngke E ribaai te UEA ae Atuami. Ma ngaia are, I anganingkami te kauring n te bong aei, ao I wetea te aonnaba ma karawa b'a taani kakoaua. Ngkana kam karaoa te bouananti, ao E na un te UEA, ao a na aki ananau maiumi, i bukina b'a E na tiringingkami.

²⁷Bon ti tabeman mai buakomi aika a na maiu, ao E na kanakoingkami te UEA man te aba, ao E na kamaenakoingkami i buakoia botannaomata.

²⁸Ao ikanne, ike kam na rairaki iai n taromauria iai taian atua aika karaoaki man te kai ao te atiibu, ao bon tiaki oini b'ai baikai b'a bon ti taian bouananti aika a aki noraaba ke ni kakauongo, ke n aroboi.

²⁹Ane kam na motikia mai nanomi n te tai teuana b'a kam na taromauria te UEA i bukin ami kangaanga. Ao ngkana kam okirikaaki ma n ongotaeka raoi i Rouna, ao E na manga bon riki naba b'a Atuami.

³¹E na nanoangaingkami te UEA ae Atuami, E na bon aki tiringingkami ke ni kitaningkami. E na bon uringa ana Berita, ao E na bon kaawakina ana Boraraoi are E a tia ni karaoia ma ami bakatibu.

³²Kam bon noora aron te UEA ae Atuami ni buaka i bukimi ma ni kaota m'aakana ae korakora, ma ni karaoi taiani kakai aika ab'ab'aki ma ni kakamaaku ngke E kaotinakoingkami mai Aikubita. Kam a riki b'a A na aomata, ao kam ongo b'anaana ngke E taetae nakoimi mai buakon te ai man te Maunga are Tinai. Ao kam boni maiu naba. E a tia n riki te aekaki aei man te tai are E karika iai te aomata te UEA ni karokoa te tai aei? E ngae ngkana kam nakea, ke kam titirakina antai, ma kam na bon karekea naba te kaeka ae ti te bo. Bon akea te atua ae a tia n ongo te aba taekana b'a e kataia ni karaoi b'aai aika ai aron are a tia te UEA ae Atuami ni karaoi.

³⁵E tangiria te UEA b'a kam na ataia ae bon ti Ngaia te Atua ni koaua, ao E tangiringkami b'a kam na ongotaeka i Rouna. Ao bon anne bukina ngke E kaota nakoimi Ana kakai aika korakora, ao te ai ae uram'aaka i aon te aba, ao anne naba bukina ae kam ongo iai b'anaana man te ai ao mai karawa.

³⁷E tangiriia ami bakatibu te UEA, ao E a tia ni baaireia b'a kam na riki b'a ana Aomata. Ma ngaia are, E kamanenaa m'aakana ae korakora ni kaotinakoingkami mai Aikubita.

³⁸Ao ngkai kam a kaaitaraia botannaomata aika raka riki korakoraia nakoimi, ma E a kaman kanakoia aomata te UEA mai abaia ma n anganingkami.

³⁹Ma ngaia are, kam na uringnga b'a bon ti te Atua ni koaua te UEA, i eta i karawa, ke i nano i aonnaba.

⁴⁰I kab'arab'arai ana Tua ma ana Reirei. Ao ngkana kam ongotaeka nako iai, ao a na ab'ab'aki maiuia kanoami, ao a na teimatoa ni maekana te aba are anganingkami te UEA.

⁴¹Ao e taku Moote, Kaain Iteraera, kam na kaokoroi kaawa ake tenua ake i mainikun te Karaanga are te Ioretan b'a taiani kaawa ni kamauri, ake: Betera are n aaba ake a rietaata n te rereua are abaia te baronga are Reuben; Ramota are i Kireata, are abaia te baronga are Kata; ao Koran are i Batian, are abaia te baronga are Manate. Ngkana arona b'a ko tiringa kaain rarikim n tiaki nanom, ao ko bon tuai man unun ma te aomata anne, ao ko kona ngkanne ni birinakon teuana mai buakon kaawa akanne, ma ni kamanoko iai. [31]

⁴⁴A tia n roko Iteraera mai Aikubita ao a kateimaeka i mainikun te Karaanga are te Ioretan i rarikin Beta Beora, ngke e anga tuua ma reirei aikai Moote. A b'ainaki ngkoa aaba ake i rarikiia n te tabo are a kateimaeka iai iroun te uea are Taion are maeka i Etibon. Ma e kataenikaiaki uean Batian are Oka

⁴⁷irouia Moote ma Iteraera, ao a taui abaia. A tia uean Amora aika uoman aikai n tautaekani aaba ake i mainikun te Karaanga are te Ioretan

⁴⁸ni moa man te kaawa are Aroera i mataniwiin te Karaanga are te Arenon, i meangin te Maunga are Oman. [32]

⁴⁹A reke naba i nanon abaia mainikun M'aruan te Karaanga are te Ioretan ni karokoa Taari are Mate are i maiaki [33] ni karaabeen te Maunga are Bitika.