Read Te B'aib'ara Te Tua-Kaua 5 Bible Online

Te Tua-Kaua 5 - Te B'aib'ara bible

Te Tua-Kaua 5

¹Ao e weteia ni kabane Iteraera Moote, ao e taku nakoia: N nang tuangngkami taian tua ma reirei aika kam na iri nanoia, ma ngaia are, kam na kakauongo raoi.

²E karaoa ana Boraraoi te UEA ma ara botannaomata n te Maunga are Tinai. [34]

³Bon tiaki ti te boraraoi [35] ma ara bakatibu ma bon i bukira naba, ngaira aikai n te bong aei.

⁴Ao E taetae nakoimi te UEA mai nanon te ai,

⁵ma kam maaku n te ai, ao kam rawa n tam'arakea te maunga. Ma ngaia are, I a taetae ma te UEA i bukimi, ao i mwiina, I a manga tuangngkami baike E taekin nako iu ao I kaangai:

⁶Bon te UEA Ngai ae Atuami, are E kaotinakoingkami mai Aikubita are kam toronaki iai ngkoa.

⁷Kam na aki taromauria te atua riki temanna i rarikiu

⁸Kam na aki karaoi taini bouananti aika katotongan b'aini karawa ake b'ain te aonnaba ke b'ain nanoni marawa are i aan te aba.

⁹Kam na aki bobaraaki n taromauriia taiani bouananti. Bon te Atua ngai ae Atuami, ao I tangiria b'a kam na kabanea nanomi nako Iu. Ngkana kam aki kubarai ma n taromauriia taiani bouananti, ao N na katuaaia kanoami ni karokoa te katenroro ma te kaaroro.

¹⁰Ma ngkana kam tangirai ma n ongotaeka nakon Au tua, ao N na akoia ami utu ni karokoa tengaa te roro.

¹¹Kam na aki kabonganaa arau n te aro n aki akaaka. [36] Bon te UEA ae Atuami Ngai, ao N na katuaaia aomata ni kabane akana a kabonganaa arau n aki akaaka.

¹²Kam na karinea te bong ae te Taabati[37] bon Au b'ai.

¹³Kam kona ni karaoi ami m'akuri nako i nanon onobong,

¹⁴ma bon Au b'ai te kaitiua ni bong, Ngai ae Atuami. Bon akea ae na m'akuri n te bong anne--ngkami, ami ataei, ami kao ke ami aati ke ami man tabeua, ao ami iruwa naba ake a maeka n ami kaawa. Ao kam na aki kam'akuriia naba ami toro.

¹⁵E na kauringngkami te bong ni motirawa aei arou ngke I kanakoa baiu ae m'aaka ni kamaiungkami man te toronaki i Aikubita.

¹⁶Karineia tamami ma tinami, ao e na ananau ma n tetekeraoi maiumi n te aba are I anganingkami.

¹⁷Kam na aki tiriaomata.

¹⁸Kam na aki wenenibure.

¹⁹Kam na aki kimoa.

²⁰Kam na tai uaraoia tabem'aang.

²¹Kam na tai mataiakina aia b'ai tabem'aang. Kam na aki tataana buun temanna, ke nimataaiakina aia auti, abaia, aia toro, aia kao, aia aati, ke aia b'ai riki tabeua.

²²E taetae te UEA nako ira ngkoa n te b'anaa ae korakora man te nang ae ura ngke ti bootaki i aon te maunga. E anganiira te UEA tuua aikai, ao bon ti aikai ao akea riki. Ao i mwiina, E koroi i aon atiibu aika uoua aika raababa ao E anganai.

²³Ao ngke e tiirake te ai man te maunga, ao kam ongo te b'anaa man te rotongitong, ao a kawarai taani kairiri

²⁴ao a taku: E kaota korakorana ma mimitongina ara UEA ae Atuara nako ira. E taetae nako ira mai buakon te ai, ao ti a ataia b'a ngaia a boni maiu naba aomata e ngae ngkana E taetae te Atua nakoia.

²⁵Ma ti aki kani mate n te ai are kamamate arei, ao ngkana ti teimatoa n ongo b'anaan te UEA, ao ti na mate.

²⁶Iai aika a tia n ongo b'anaan te Atua ni koaua man te ai n ai arora? Ao ngkana a tia, a kona n teimatoa ni maiu ma n tataekinna?

²⁷Moote, naako waerake ni kaaniiko ma te UEA n ongo i Rouna. Ao manga okirira n tuangiira, ao ti na karaoi b'aai ni kabane akana E taekin.

²⁸Ao E ongo b'anaami te UEA ao E taku: Moote, I ongo aia taeka aomata ake a taekin nakoim, ao I kakoauai.

²⁹Tera ngke a taromauriai n taai nako ma n ruru ni maakai, ma n ongotaeka nakon Au tua ni kabane. B'a ngkana a karaoa anne, ao a na tetekeraoi ma natiia ma ni kukurei.

³⁰Ko na tuangiia ngkai b'a a na okiri aia autinrianna,

³¹ma ngkoe ko na okirai ikai. Ao ngkana I tia n tuangko Au tua ma Au reirei, ao ko na manga taekin nakoia aomata, b'a a aonga n ongotaeka nakon tuua aikai n te aba are I anganiia.

³²Kam na riai n ongotaeka raoi nakon ana Tua te UEA.

³³Irii nanoia, b'a a na kairingkami nakon te maiu ae ab'ab'aki ma n tetekeraoi n te aba are anganingkami te UEA.