Read Te B'aib'ara Te Tua-Kaua 6 Bible Online

Te Tua-Kaua 6 - Te B'aib'ara bible

Te Tua-Kaua 6

¹E tuangai te UEA b'a N na anganingkami tuua ma reirei aikai, [38] ma ngaia are, kam kona n ongotaeka iai n te aba are E anganingkami. Ai ti teutana riki te tai ao kam nang ri nanon te Karaanga are te Ioretan ma n taua te aba.

²Ao ngkana kam tangiria ni kaananau maiumi ma kanoami, ao kam na taromauria te UEA ma n ongotaeka n ana Tua.

³Kakauongo raoi, Iteraera. A taromauria te UEA ami bakatibu, ao E berita b'a E na anganiira te aba aei ae bati iai te miriki ma ana karewe te manibeeru. Ongotaeka raoi i rouna, ao kam na tetekeraoi ma n riki b'a te botannaomata ae korakora.

⁴Kakauongo, Iteraera. Bon ti te Atua ni koaua te UEA ae Atuara. [39]

⁵Ma ngaia are, kam na tangira te UEA ae Atuara ma nanomi ni kabane, tamneimi ni kabane, ao korakorami ni kabane.

⁶Ururing ana Tua

⁷ao tuangiia ami ataei n taai nako. Taetaekinna n taai nako, ni mwengami ke i aon te kawai ke i aoni kiemi n te tairiki, ke ngkana kam uti n te ingabong.

⁸Koroi katotongaia ao kabaei i aon baimi ao ram'ami b'a kam aonga n uringnga.

⁹E karaoa ana Boraraoi te UEA ma ara botannaomata i aon mataroan auti ao taiani kawai n rin nakon te kaawa.

¹⁰E berita te UEA nakoia ami bakatibu ake Aberaam, Itaaka, ao Iakob'a b'a E na anganingkami te aba aei. Ngkai, E na karokoingkami ikekei ma n anganingkami ami kaawa aika buubura, ma taian kateitei iai aika tamaroa aika kam aki karaoi,

¹¹ao auti aika on ni b'aai aika tamaroa aika kam bon aki kamenaki ikekei. E na anganingkami taiani m'anib'a te UEA [40] aika kam bon aki ekei, ao taiani nne ni kureebe ma oriwa aika kam aki uniki. Ma ngkana kam a rangi n tibutaua n am'arake n te aro are kam a aki kona riki n am'arake,

¹²ao kam na aki m'aninga ae bon te UEA ae kainaomataingkami man te toronaki i Aikubita.

¹³Taromauriia, ao ongotaeka iroun te UEA ae Atuami ma te maaku ao te ruru, ao berita b'a kam na kakaonimaki nakoina.

¹⁴Tai karaoi b'aai aika rekereke ma atua ake a taromauriaki irouia botannaomata akana i rarikimi.

¹⁵Ngkana kam taromauriia atua tabeman, ao E na rangi n un te UEA iroumi, ao E na kamaunaingkami mai aon te aonnaba. E mena iroumi te UEA ae Atuami,

¹⁶ma ngaia are, kam na aki kataia ni kakoaua b'a E kona ni buokingkami n aron are kam karaoia ngkoa i Mata.[41]

¹⁷Ongotaeka n taai nako nakon tuua ake E a tia te UEA n anganingkami

¹⁸ao maiuakina te maiu are E tangiria. Ao kam na kona iai n rin n te aba ma n anaia mairouia ami kairiribai, n aron are E a tia ni berita iai nakoia ami bakatibu.

²⁰Ao ane a na titiraki natimi n te bong teuana ni kaangai, E aera te UEA ngkai E anganiira tuua ma reirei aikai?

²¹Ao kam na kaekaia ni kaangai. Bon tooro ngkoa ngaira iroun uean Aikubita, ma E kamanena m'aakana ae korakorana te UEA ni kainaomataira.

²²Ti bon nooria ngke E karaoi taiani kakai, ao b'aai aika kakamaaku nakon te uea ma ana aobitia, ao raona ni kabane.

²³E kainaomataira te UEA mai Aikubita b'a E aonga ni karokoira n te aba aei, n aron are E a tia ni berita iai nakoia ara bakatibu.

²⁴Ao bon anne bukina are E tangiria iai b'a ti na ongotaeka nakon ana Tua ma n taromauriia ma te maaku ao te ruru.

²⁵Ao ngkana ti karaoa anne, ao E na kaawakiniira ma ni buokiira b'a ti na tetekeraoi.