Read Te B'aib'ara Te Tua-Kaua 7 Bible Online

Te Tua-Kaua 7 - Te B'aib'ara bible

Te Tua-Kaua 7

¹Kaain Iteraera, E na buokingkami te UEA ae Atuami n anaa te aba mairouia kaain Eta, kaain Kirekate, kaain Amora, kaain Kanaan, kaain Beriti, kaain Iwa, ao kaain Iebuti. A m'aiti riki ma ni korakora botannaomata aika itiua aikai nakoia Iteraera, ma ngkana kam buakaniia,

²E na buokingkami te UEA ni kanakoia man te aba. Ao i mwiina kam na tiringiia n aki manga nanoangaiia teutana. Kam na aki karaoa te boraraoi n raoi ma ngaiia,

³ao kam na aki kaieiniia naba natimi aine, ao natimi m'aane ma ngaiia.

⁴B'a ngkana kam karaoa anne, ao ane a na kairiia kanoami nakon taromauriaia atua tabem'aang ma n tinanikua te UEA. Ao E na rangi n un iai, ao E na waekoa n tiringiia Iteraera.

⁵Ma ngaia are, ngkana kam kataenikaiia botannaomata aikai, kam na urui aia baonikarea are a taromauriia iai atuaia. Urui aia baangota, ao kab'akai taiani atiibu ake a tataromauri atuaia te aine are Nei Aatera, ao karenakoi aia bouananti nako nanon te ai.

⁶Iteraera, bon ana Aomata te UEA ae Atuami ngkami aika kam rineaki. A rangi ni m'aiti botannaomata n te aonnaba aei, ma E ti rinea Iteraera b'a ana Aomata aika bon Ana b'ai.

⁷Bon aomata ngkami aika taiani kabanea ni mamaara mai buakoia botannaomata,

⁸ma E a tia n rineingkami i bukina b'a E tangiringkami, ao i bukina naba b'a E a tia ni berita nakoia ami bakatibu. Ao i mwiina, E a manga kamaiungkami ni baina ae korakora mai Aikubita, are a karaoingkami b'a aia toro.

⁹Kam bon ataia b'a bon ti te Atua ni koaua te UEA ae Atuami. Ma ngaia are, kam na tangiria, ao ongotaeka nakon ana Tua, ao ane na kakaonimaki ni karaoa nanon ana Boraraoi ma ngkami ma kanoami i nanon tengaa te roro

¹⁰Ma ngkana kam a manga kaitaraa te UEA, ao E na bon waekoa n tiringingkami.

¹¹Ma ngaia are, kam na kakoaua raoi b'a kam ongotaeka nakon ana Tua ma ana Reirei aika I anganingkami n te bong aei.

¹²Ngkana kam ongotaeka raoi nakon taian tua aikai, ao E na kakaonimaki te UEA ni kaawakin Ana boraraoi are karaoia ngkoa ma ngkami, n aron are E berita iai nakoia ami bakatibu.

¹³E na tangiringkami te UEA ma ni kakab'aiaingkami n anganingkami natimi, kanami, ami wain, ao b'aan te oriwa aika m'aiti. A na kariki buniia aika bati ami kao, ao ami nanai n tiibu ana karikiia tiibu teteei aikai bati naba.

¹⁴E na kakab'aiaingkami riki te Atua nakoia botannaomata tabeua--a na rikirake ami utu, ao a na rikirake ni m'aiti ami nanai ni man.

¹⁵E na aki manga ituaki n taian aoraki ake kam taonaki iai ngkoa n tabetai i Aikubita. Kam na marurung raoi, ao E na kaorakiia ami kairiribai te UEA n taian aoraki.

¹⁶Ngkana E buokingkami te UEA ni kataenikaiia ami kairiribai, ao kam na riai n tiringiia n aki manga nanoangaiia. Ao kam na aki m'ane ni manga taromauri atuaia.

¹⁷Tao kam na kaangai, Ti na kanga n tiringiia botannaomata aikai? A korakora riki nakoira.

¹⁸Ma kam na katoka te raraoma. Kam na ti uringa te b'ai are karaoia te UEA ae Atuami nakon uean Aikubita.

¹⁹Kam bon noora korakoran m'aakan te UEA ni karaoi taiani kakai ma ni kaotinakoingkami mai Aikubita. Ao E na manga bon karaoi naba m'akuri ni kakai i bukimi ngkana kam aitara ma ami kairiribai aika kam rangi n maakuia.

²⁰Ane a na kataia ni kamaiuia tabeman ni karabaia mairoumi, ma E na kabuai aia iango te UEA, ao a na mate.[42]

²¹Ma ngaia are, kam na aki maaku ngkana kam aitara ni buaka ma ngaiia. E korakora Atuami ao E kakamaaku, ao E na buaka i bukimi.

²²Ngkana kam buakaniia botannaomata aikai, ao E na waaki te UEA ni kanakoia teutana i mwiin teutana. E na bon aki katokanikaingkami te UEA i aoia n te tai ae waekoa—b'a ngkana E karaoa anne, ao a na rangi ni karako kaain te aba are a na kona ni kanakoia taiani mannikaakang.

²³Ma ngkana kam buakaniia ami kairiribai, E na kabuai aia iango te UEA, ao e na rangi ni bebete aron tiringaia iroumi. Kam na kataenikaiia teutana i mwiin teutana ni karokoa baneia, ao e na m'aninga te aba taekaia.

²⁵Ngkana kam tia ni kataenikaia te botannaomata teuana, kam na kabuoki aia bouananti. Kam na aki m'aane n tangiri taian tirewa ma koora akana nim i aon taiani bouananti. B'a e aki kukurei iai te UEA, ni moa man te m'akoro ni biti ae nim i aon te bouananti,

²⁶ma ngaia are, kam na kamaunai. B'a ngkana kam uotirikaaki nakon ami auti, ao kam na kaai ni kamaunaaki ma ami auti. Kararoaingkami mani baika a rangi n ribaaki aikai aika bouananti.