Read Te B'aib'ara M'akuri 14 Bible Online

M'akuri 14 - Te B'aib'ara bible

M'akuri 14

¹Ngke a mena B'auro ma B'arenaba i Ikonio, ao a nako ni m'aneabaia I-Iutaia, ao a taetae n te aro are a onimaki iai I-Iutaia ma I-Erene aika rangi ni bati.

²Ma I-Iutaia ake a aki onimaki a kakiriwei nanoia aomata ake tiaki I-Iutaia, ao a kananobuakaiia nakoia taari akekei.

³Ma ngaia are, a kamaniia B'auro ma B'arenaba ni maeka i Ikonio, n tataekina taekan te UEA ma te ninikoria. Ngke a karaoa aei, ao a anganaki iroun te UEA te kona ni karaoi kanikina ma m'akuri ni kamimii b'a ana b'ai ni kakoaua i bukin aia taeka are a taekinna i bukin ana akoi b'a e koaua.

⁴E a riki te iraraaure irouia kaain te kaawa arei: a tei tem'angina i bukiia I-Iutaia, ao tem'angina a tei i bukiia taan tuatua.

⁵A reke nanoia I-Iutaia ma ake tiaki I-Iutaia ma aia tia tautaeka nako b'a a na b'ainikirina B'auro ma B'arenaba ma ni karebanaia.

⁶Ngke a ataia ao a biri nako nakoni kawan Rukaonia, are Rutetera ma Rerebe, ao nakoni kaawa nako ake a kaani ma ngaiia,

⁷ao a tataekina te euangkerio iai.

⁸E tekateka te aomata temanna i Rutetera, ae a mamara waena; e m'auku mai nanoni biroton tinana, ao e tuai man nakonako.

⁹E ongora irouni B'auro ngke e taetae; ao B'auro e katokai matana n taraia, ao e ataia b'a iai i rouna te onimaki are e konaaki ni kamaiuaki iai

¹⁰ma ngaia are e kanenea b'anaana ao e kaangai, “Tei rake kaetiko i aoni waem!” Ao ngaia e ewe rake, ao e nakonako.

¹¹Ngke a nora te baere e karaoia B'auro aomata, ao a kanene b'anaaia n taetae n taetaen Rukaonia ao a kaangai, “A ruo nako ira anti aika ai aroia aomata!”

¹²A arana B'arenaba b'a Tiuti, ao B'auro b'a Eremiti ngkai ngaia are b'aina te kakarabakau.

¹³E roko ngkanne ana ibonga Tiuti ma uotana kaue, ma kao mm'aane aika e kairiia nakoni mataroani kawai n rin nakon um'antabun Tiuti, are e tei ni kaan ma te kaawa i tinanikuna. E kan anga karea ma aomata.

¹⁴Ngke a ongo taan tuatua ake B'arenaba ma B'auro taekani baike a nang karaoi aomata, ao a raei kunnikaia, ao a biribiri i buakoia aomata n tatakarua,

¹⁵ni kaangai, “Mm'aane, Kam aera ngkai kam karaoi baikai? Bon aomata naba ngaira aika ai aromi! Ao ti tuangngkami te rongorongo ae e raoiroi, b'a kam na rairaki mani baika akea bonganaia nakon te Atua are maiu, are karaoa karawa ma aonnaba, ma marawa, ma b'aai ni kabane ake a mena i nanoia.

¹⁶I nanon rooro ake rimoa, ao E aki tutukiia botannaomata nako mani karaoani baike a tangiri;

¹⁷ma e boni ngae n anne, ao E a tia ni kaotiota arona n Atua ni baika raraoi ake E karaoi: b'a E anganingkami te karau mai karawa ma boong ake a uaa iai kai n am'arake; E anganingkami kanami, ao E kaon nanomi n te kim'areirei.”

¹⁸A boni ngae n tabeki taeka aika ai aron akekei taan tuatua, ma a kuri n aki konaia aomata n tukiia b'a a na aki anga karea.

¹⁹Iai I-Iutaia tabem'aang aika roko mai Antioka, ao mai Ikonio n anai nanoia aomata. A karebanaa B'auro, ao a uakinna nako tinanikun te kaawa, b'a a taku b'a e a mate.

²⁰Ma ngke a tei reirei n otab'aninia, ao e teirake, ao e nako n te kaawa; ao ngke e a ingabong, ao e nako ma B'arenaba nako Rerebe.

²¹Ngke a tia B'auro ma B'arenaba n taekina te euangkerio i Rerebe, ma ni karikiia aomata aika bati iai b'a taan onimakina Iesu, ao a oki nako Rutetera, ao Ikonio, ao Antioka,

²²ni kakorakorai nanoia taan onimaki, ao ni buokiia b'a a na botum'aka n onimaki, ao a kaangai, “Ti riai n ri nanon rawawata aika bati b'a ti aonga n rin n Uean te Atua.”

²³A rineia tem'angina n te ekaretia teuana b'a unimm'aanen te ekaretia anne, ao a karaoa aron aei i nanon ekaretia nako; ao ni katoa te tai are a tia ni karaoa iai aei, ao a aki mamatam, ao a tataro i bukiia b'a a na kawakinaki iroun te UEA, are a onimakinna.

²⁴A m'ananga ngkanne B'auro ma B'arenaba n ri nuukani Bitiria, ao a roko i Bamburia.

²⁵Ao ngke a tia n taekina ana taeka te Atua i Bereke, ao a wairio nako Ataria;

²⁶ao a borau mai iai nako Antioka, ike a tia ni mwiokoaki iai rimoa nako nanoni bain te Atua, b'a a na kairaki n ana akoi i bukin te m'akuri are a tia ngkai ni karaoia.

²⁷Ao ngke a roko i Antioka, ao a botiia kaain te ekaretia, ao a karakini b'aai ni kabane ake E karaoi te Atua i rouia, ma arona ngke E kauka mataroan te onimaki nakoia aomata aika tiaki I-Iutaia.

²⁸Ao a tiku ni maan irouia ake a onimakina Iesu.