Read Te B'aib'ara M'akuri 19 Bible Online

M'akuri 19 - Te B'aib'ara bible

M'akuri 19

¹Ngke e mena Aboro i Korinto, ao B'auro e ri nukan aaba ake i eta, [40] ao e roko i Ebeto; ao e kuneia Kristian tabem'aang iai.

²Ao e taku nakoia, “Kam anganaki te Tamnei are Raoiroi ngke kam moa n onimaki ke kam aki?” Ao ngaiia a taku nakoina, “Ti tuai n ongo taekan te Tamnei are Raoiroi, b'a iai ke akea.”

³E a manga titirakiniia riki ao e kaangai, “Te aeka ni b'abetito ra are kam b'abetitoaki iai?” Ao a kaangai, “Ana b'abetito Ioane.”

⁴Ao e taku B'auro, “Ana b'abetito Ioane bon te b'abetito i bukin rairan te nano; ao e tuangiia aomata aika Iteraera b'a a na onimakina Teuare nangi roko i mwina, are Iesu.”

⁵Ngke a ongo aei, ao a b'abetitoaki n aran te UEA are Iesu.

⁶Ao ngke e katokaa baina B'auro i aoia, ao E roko te Tamnei are Raoiroi i aoia; ao a taetae n taetaen aaba aika bati, ao a taetae ni burabeti.

⁷Tao tengauni ma uoman m'aitiia aomata akekei ni kabaneia.

⁸I nanon tenua nam'akaina ao e aki toki B'auro n rin ni m'aneabaia I-Iutaia, n taetae iai n aki mamaku, n tataekina uean te Atua b'a a aonga n anaaki nanoia aomata iai.

⁹Ma ngke a matoatoa nanoia tem'angina n rawa ni kan ira nanona, ma ni kabuakaka i mataia aomata ana kaantaninga te UEA i bukin te kawai are a riai n toua, ao e nako mai rouia. E kairiia nako reirei ni kaokoroia, ao e reirei n te bong ae koraki [41] n ana ru n reirei Turano.

¹⁰E kakaraoa aei i nanon uoua te ririki, n te aro are a bane n ongo ana taeka te UEA aomata ake a maeka i Atia, ake I-Iutaia ma I-Erene.

¹¹Ao E karaoi m'akuri aika kamimii te Atua, aika a aki nonoraki aroia ni baini B'auro,

¹²n te aro are ngkana a anaaki kunnikai [42] ma kaoanimaono ake a bo ma kunna ao a kakaki i aoia aoraki, ao a kona ni kamaiuaki iai man aorakiia, ao a oti nako naba tamnei aika bubuaka mai rouia.

¹³Iai I-Iutaia tabem'aang aika nanakonako ni kanakoia naba tamnei aika bubuaka n aia tabunea. A kabongana aran te UEA are Iesu nakoia aomata ake iai i rouia tamnei aika bubuaka, ao a kaangai, “Ti tuangngkami iroun Iesu are e tataekinna B'auro!”

¹⁴Itimani m'aitiia te koraki aika karaoa te baei, aika natin te I-Iutaia ae aia mataniwi ibonga ae arana Tikeua.

¹⁵Ma e kaekaia te tamnei are buakaka ni kaangai, “I ata Iesu, ao I ata naba B'auro; ma antai ngkami?”

¹⁶A ewekaki ngkanne iroun te aomata are iai i rouna te tamnei are buakaka, ao e konai aoia b'a e korakora nakoia. Ma ngaia are, a biri nako mai nanon te auti arei ma kunnikaia aika raeuaki, ao a ikoaki.

¹⁷E a ataaki te baei irouia I-Iutaia ma I-Erene ni kabaneia ake a maeka i Ebeto, ao a rangi ni maku; ao e neboaki aran te UEA are Iesu.

¹⁸A m'aiti naba aomata i buakoia ake a tia n onimaki aika roko ni kaoti aroia, ma ni karakin aia m'akuri nako aika bubuaka.

¹⁹A bati aia koraki taan tabunea ake a uoti aia boki n tabunea ao a boti ni kabuoki i mataia aomata ni kabaneia; ao ngke a wareki m'aitini booia, ao a noria b'a ngaia nimabwi te nga te maibiibi n tirewa. [43]

²⁰Ao e buta nako ana taeka te UEA n te aro anne, ao a bati riki aomata ake a onimaki.

²¹Ngke a tia n riki baikekei, ao e moti i nanoni B'auro [44] b'a e na ri nuukani M'aketonia ma Akaia n nako Ierutarem, ao e kaangai, I mwin rokou i Ierutarem, ao e riai b'a N na nora naba Rom.

²²Ao e kanakoia uoman mai buakoia raona ake a buobuokia, are Timoteo ma Erateto nako M'aketonia, ao ngaia e tiku ni kamanna i Atia.

²³I nanon taai akanne ao e riki te kiriwe ae korakora i bukin te Aro.

²⁴B'a te aomata temanna ae arana Temeterio, ae te tia karaoi b'aai man te tirewa, e kakaraoi man tirewa Tembora aika taore aika uarereke aika katotongan um'antabun Nei Aritemito[45] , ao e korakora aia m'akuri iai te koraki ake a m'akuri i rouna.

²⁵E botiia taani m'akuri aikai ma te koraki tem'angina ake ti te bo aekan naba aia m'akuri ma ngaiia ao e taku: Mm'aane, kam ataia b'a e reke kaub'aira man te m'akuri aei.

²⁶Ao kam noria, ao kam ongo, b'a tiaki ti i Ebeto ae e kairoroia ma n anai nanoia iai aomata teuare B'auro, ma e kuri ni kabuta aon Atia, n taku b'a tiaki atua baika karaoaki ni baiia aomata.

²⁷Iai ngkanne te kangaanga ae na reke nakon ara m'akuri aei, b'a e nang aki kubaraki. Ma tiaki ti ngaia, ma iai naba te kangaanga ae na reke nakon um'antabun te anti are kakannato are Nei Aritemito, b'a e nang kakeaki bonganana; ao Nei Aritemito, are taromauriaki i Atia ao i aonnaba, e nangi mauna kakannatona!

²⁸Ngke a ongo taeka akanne, ao a rangi n un, ao a takarua ni kaangai, “E kakannato Nei Aritemito, are antiia I-Ebeto!”

²⁹E buta aon te kaawa arei n te kiriwe, ao a tauaki irouia aomata Kaio ma Arititareko, aika I-M'aketonia, aika raoni B'auro ni m'am'ananga. A bane ni b'aina te nano ae ti teuana ni kanenei nakon te tabo are a bobotaki iai kaain te kaawa, ao a tauia uakekei.

³⁰E kan nako B'auro n tei n taetae i mataia aomata, ma a tukia ake a onimaki.

³¹A kanakoa naba nakoni B'auro aia rongorongo I-Atia tabem'aang, aika taan tautaeka aika raoraona, ao a tuangnga b'a e na aki kaoti n aia tabo ni bobotaki kaain te kaawa.

³²A mangao aomata: tem'angina a takaruaea te b'ai teuana, ao tem'angina te b'ai teuana, b'a a m'aiti i buakoia ake a aki ata bukin are a botaki iai.

³³Iai tabem'aang i buakoia ake a bukina Arekantero b'a ngaia are e karika te kiriwe, i bukina ngke e kanakoaki irouia I-Iutaia b'a e na tei i matan te botaki. E taotaona baina Arekantero nakoia aomata b'a e kani karaua te taetae nakoia.

³⁴Ma ngke a ataia b'a te I-Iutaia, ao a bane n takarua n te b'ana ae ti teuana, i nanon tao uoua te aoa ni kaangai, “E kakannato Nei Aritemito, are atuaia I-Ebeto!”

³⁵Ngke e a tia ni katoki karongoaaia aomata te tia koroboki n te kaawa, ao e taku, Mm'aane aika I-Ebeto, antai te aomata ae aki ata te kaawa ae Ebeto b'a ngaia te tia kawakina um'antabun Nei Aritemito are kakannato, ma te b'ai [46] are b'aka mai karawa?

³⁶A aki konaaki ni kakeweaki baikai, ma ngaia ae e riai b'a kam na rau, ao kam na karaurau n iango i m'ain ae kam karaoa te b'ai teuana.

³⁷B'a kam kairiia mai aomata aikai, aika tiaki taani kurib'ai Tembora i bukiia anti, ao a aki taetaebuaka naba Nei Aritemito.

³⁸Ma ngaia aei, b'a ngkana tao iai ana taeka Temeterio ma taani m'akuri ake raona ni kabuakaka temanna, ao bon iai boong ni kabowi ao iai naba taani moti: arei neia n i kabuakaka.

³⁹Ma ngkana iai riki te b'ai ae kam tangiria, ao e na baireaki taekana ni kabowin te kaawa n aron taekana n te tua. [47]

⁴⁰B'a ae ti a reke n te kangaanga, b'a ti nangi bukinaki b'a ngaira aika ti karika te kiriwe n te bong aei; ao akea ara taeka ae e raoiroi ae ti na anga b'a kab'arab'arani bukin te ibetutu n aomata aei.

⁴¹Ao ngke e a tia n atongi baikai, ao e kab'aranakoa te botaki arei.