Read Te B'aib'ara M'akuri 2 Bible Online

M'akuri 2 - Te B'aib'ara bible

M'akuri 2

¹Ngke e roko te bong are Bentekota, ao a bane ni botaki ake a onimakina Iesu n te tabo ae ti teuana.

²Ao e rina n roko te neaa mai karawa, ae kanga ai aroni karongoaan ukin te ang ae baibati, ao e kaona nanon te auti are a tekateka iai.

³Ao a noori baika ai aron te ai aika ura, aika ai aron taraan te newe; a uamaae nako baikai n tatabeua nakoia, ao a tiku i aoia n tatabemaniia nako.

⁴A bane ni kaonaki n te Tamnei are Raoiroi, ao a taetae n taetaen aaba tabeua, n ai aron are E anganiia te Tamnei b'a a na taetae iai.

⁵Iai i Ierutarem I-Iutaia aika rangi n taua te Aro n Iutaia; a roko man aaba nako i aonnaba.

⁶Ngke a ongo b'anaaia taan onimaki, [4] ao a ikotaki aia koraki aika bati ma te mimi, b'a a bane n oota n te baere a taekinna taan onimaki, b'a a taetae n aia taetae nako.

⁷A bon rangi ni mimi i rouia, ma ngaia are a kaangai, Noria, tiaki I-Kariraia uaakai ni kabaneia aika taetae?

⁸Ao e aera ngkai ti bane n ongo n taetaen abara nako ake ti bungiaki iai?

⁹Ngaira aika I-Baretia, ma I-Miria, ma I-Eram, ma aomata aika maeka i Metobotamia, i Iutaia, i Kabatokia ao i Bonto ma Atia,

¹⁰ao i Berukia, Bamburia ma Aikubita, ao i aban Ribua ake i rarikini Kurene; ao iai naba i buakora aika roko n iruwa mai Rom,

¹¹aika I-Iutaia ma aomata aika tiaki I-Iutaia aika a tia n riki b'a kaain te Aro n Iutaia, ma I-Kirete, ma I-Arabia; ti bane n ongo i rouia ngkai a taekin ana m'akuri te Atua aika kamimii n ara taetae nako.

¹²Ao a bane ni mimi ma ni minotaki aia iango, ao a i titiraki i rouia ni kaangai, “Tera nanon te baei?”

¹³Ma a taetae ni kakaniko tem'angina ao a kaangai, “A koro ni manging n te wain!”

¹⁴Ao e teirake Betero ma uake tengauni ma temanna, ao e kanenea b'anaana n taetae nakoia aomata ni kaangai: Mm'aane aika I-Iutaia, ao ngkami ni kabaneingkami aika kam maeka i Ierutarem, e na ataaki aei iroumi, ao kam na ongora n au taeka!

¹⁵B'a a aki manging uaakai n ai aron are kam taku, b'a ai tib'a te aoa ruaiwa n te ingabong aei.

¹⁶Ma aio te taeka are atongaki ngkoa iroun te burabeti are Ioera, are kaangai,

¹⁷“E taku te Atua, Ao ni boong aika kabanea ni boong, N na nurakina Tamneiu i aoia aomata ni kabaneia. A na taetae ni burabeti natimi aika mm'aane ma aine; ao a na noori baika ai aroni kanoani mii ami rorobuaka n ataei, ao a na miakini mii ami unimm'aane.

¹⁸ao N na nurakina naba Tamneiu i aoia tooro aika mm'aane ma aine, ni boongi naba akekei, ao a na taetae ni burabeti.

¹⁹N na kaoti baika kamimii i eta i karawa, ao kanikina i nano i aon te aba, n ai aroni baikai: te raraa ma te ai, ma bubu n ai aika matenten.

²⁰E na riki n roo taai, ao e na turubaka n uraura nam'akaina, i m'ain rokon ana bong te UEA are kakannato are kakamaaku.

²¹Ao e na kamaiuaki ane m'anewea aran te UEA.

²²Mm'aane aika Iteraera, kam na ongo taeka aikai: Iesu are te I-Natareta are e kaotaki arona i buakomi b'a iai nakoana mairoun te Atua, are e kateretereaki raoi n taiani m'akuri aika kamimii, ma baika kamimii, ma kanikina, ake E karaoi te Atua i rouna i buakomi, n ai aron are kam bon ataia;

²³E a kaman tia ni baireia te Atua, ao E a kaman ataia naba, ae E na tauaki Iesu nakoimi, ao kam kamatea, b'a kam anga nako nanoni baiia aomata aika riri aon te tua, b'a a na tauria n te kaibangaki;

²⁴ma E a manga kamaiua te Atua ao E kainaomata man te mate: b'a E aki konaaki n tauaki Iesu ni m'aakan te mate.

²⁵B'a e a kaman taekina Iesu Tawita ngke e kaangai, ‘I tarataraa te UEA i matau n taai nako; B'a E memena i rarikiu, b'a e aonga n aki kakiriweaki au iango;

²⁶Ma ngaia ae e kim'areirei nanou, ao I taetae ma te kakatonga; ao ngai, ae te rab'ata ae mamate, N na tiku ma te kantaninga ae nene:

²⁷B'a ane Ko na aki kitana aomatau ni koaua i Eriti, Ao Ko na aki anga rab'atan am toro ae kakaonimaki b'a e na mka n te ruanimate.

²⁸Ko kaoti kawai ni kamaiu nako iu, Ao memenam irou e a karekea nako iu te kim'areirei ae bati.’

²⁹Mm'aane, taari, e riai b'a N na taekina aron Tawita are ara bakatibu nakoimi n aki wimakiki: b'a e mate ao e taunaki, ao e mena nena n taunaki i rarikira ni karokoa te bong aei.

³⁰ Bon te burabeti ngaia, ao e ata ana taeka ni bau te Atua nakoina: E kaotia iai b'a E na karika temanna i buakoia ana kariki Tawita b'a te uea ngaia, n ai aron Tawita.

³¹Ao Tawita e a kaman nora te baere E na karaoia te Atua, ma ngaia are e taekina manga-utin te Kristo: b'a E aki kaaki taekana i Eriti, ao E aki rotaki rab'atana n te mka.

³²E a manga kamaiuaki Iesu aei iroun te Atua, ao bon taani kakoaua manga-utina ngaira ni kabaneira.

³³Ngkae E neboaki i angaatain te Atua, ao ngkae E anganaki iroun te Tama te taeka n akoi i bukin te Tamnei are Raoiroi, ao E a tia n nurakina te baei, ae kam noria ma n ongo.

³⁴B'a e aki rierake Tawita nako karawa, ma e kaangai, “E taku te Uea nakon au Uea, Ko na tekateka i angaataiu,

³⁵ni karokoa karaoaia am kairiribai irou b'a neni katokani waem.”

³⁶Ma ngaia ae kam na ataia ni koaua ngkami aika Iteraera ni kabaneingkami b'a E a tia te Atua ni karika Iesu b'a te UEA ao te Kristo.

³⁷Ngke a ongo aei aomata ao a teke nanoia; ma ngaia are a taku nakoni Betero ma taan tuatua ake raona, “Taari, tera ae ti na karaoia?”

³⁸Ao e taku Betero nakoia, “Rairi nanomi, ao kam na bane ni b'abetitoaki n aran Iesu Kristo i bukini kab'araan ami bure; ao kam na anganaki te b'ai n tituaraoi are te Tamnei are Raoiroi.

³⁹B'a E a tia te Atua n anga ana taeka n akoi nakoimi, ao nakoia ami kariki, ao nakoia naba ake a mena i kiraroa, ake E weteia te UEA are Atuara nakoina.”

⁴⁰A bati riki ana taeka Betero nakoia, ao e butiia ni kaangai, “Kam na kamaiungkami man te rekenikai ane nang roko nakon te roro ae buakaka aei!”

⁴¹A b'abetitoaki ngkanne aomata ake a butim'aea ana taeka Betero, tao 3,000 m'aitiia, ao a ikotaki ma m'aitiia taan onimaki n te bong arei.

⁴²A botum'aka nakon reireiaia irouia taan tuatua, ao nakon aroia n i buokanib'ai; ao a kakaonimaki nakon iriran aia bobotaki n am'arake ma n tataro.

⁴³E karaoi m'akuri aika kamimii ma kanikina te Atua irouia taan tuatua, [5] ao a taonaki aomata n te maku.

⁴⁴A kateimatoa aroia n iraorao taan onimaki, ao a i buokanib'ai n aia b'ai nako.

⁴⁵A kabo nako abaia ma aia b'ai nako, ao a tib'atib'ai booia nakoia ake a onimaki, ni kaeti ma kain nanon temanna ma temanna.

⁴⁶A bobotaki n te Tembora ma te nano ae ti teuana ni katoa bong, ao a bobotaki n am'am'arake n aia auti nako, ao a kang kanaia ma te kukurei ao te nanoraoi,

⁴⁷ao a kamoamoa te Atua, ao a tangiraki irouia aomata. N te bong ae koraki ao a kam'aitaki riki aia koraki taan onimaki iroun te UEA irouia ake a tib'a manga kamaiuaki.