Read Te B'aib'ara M'akuri 27 Bible Online

M'akuri 27 - Te B'aib'ara bible

M'akuri 27

¹Ngke e a tia te baire b'a ti na borau nako Itare, ao a anga B'auro ma buure tem'angina nakon aia mataniwi tautia ae Iurio arana, ae mataniwiia te taanga ni buaka ae tebubua kaaina ae ana taanga ni buaka Aukitito.

²Ao ti toka ni kaibuken Areramuteno tewaana, ae nangi borau nakon taabo n rooro i Atia, ao ti borau; ao raora Arititareko ae te I-M'aketonia mai Tetaronike.

³N te bong are i mwina ao ti roko i Titon. E nano n akoi Iurio nakoni B'auro, b'a e kariaia nakona nakoia raoraona i bukini buokana n te bae e kainanoia.

⁴Ao ngke ti borau mai Titon, ao e tutuki te ang; ma ngaia are ti a ieie ngkanne ri rarikini Kubero n iterana are e aki kare mai iai te ang.

⁵Ao ngke ti a tia n ri nanoni marawani Kirikia ma Bamburia, ao ti roko i Mura ae kawan Rukia.

⁶E reke iai taekan te kaibuke tewaana mai Arekanria are e nangi borau nako Itare irouni mataniwin te taanga ni buaka are tebubua kaaina, ao e katokaira iai.

⁷Ti ieie ni karaurau i nanoni boong aika bati, ma ni kuri n aki roko ni kaani ma te kaawa ae Keniro, i bukina b'a e tukiira te ang; ma ngaia are ti a borau ngkanne ri rarikini Kirete n iterana are e aki kare mai iai te ang, n ri rarikin te kekee are Taremone.

⁸Ti biri ri rarikina ma te kangaanga, ao ti roko n te tabo teuana ae arana Naamo aika Raraoi, [62] are kaani ma te kaawa are Ratea.

⁹Ngke ti a maan n tiku iai, ao e a aki raoiroi te m'ananga b'a e nangi reke te kabuanib'ai iai i bukina b'a e a b'aka nako te Bong n Aki-mamatam, ao e anga ana taeka B'auro n i buobuoki ni kangai,

¹⁰“Mm'aane, I ata te borau aei b'a e na kamamate, ao e na kabuanib'ai, tiaki ti nakon te kaibuke ma kanoana, ma nakoni maiura naba.”

¹¹Ma mataniwin te taanga ni buaka are tebubua kaaina e aki kan ongo n ana taeka B'auro; e ongo riki iroun te kaaben ao te aomata are ana b'ai te kaibuke.

¹²Ma i bukina ngke e aki raoiroi te ne n roro arei n tain te aumeaang, ao a bati i buakoia ake a taku b'a a riai ni borau mai iai, ngkana tao a kona n roko i Boinike, b'a a na kabanea iai tain te aumeaang; Boinike bon te ne n roro teuana i Kirete ae tara maiaki-maeao ao meaang-maeao. [63]

¹³Ngke e wai ni karaurau te angi maiaki, ao a taku b'a e na koro bukin aia iango, ma ngaia are a taeka te atinro ao a borau n ri rarikini Kirete ni kaani ma mataniwin te aba.

¹⁴Ma e aki maan ao e a kare naba te ang ae baibati, ae arana te “I-Meaangmainiku” mai aon te aba.

¹⁵E bo te kaibuke iai ao e a aki kona ni buti ni kaitaraa te ang. Ngke akea te bae ti kona ni karaoia, ao e a uotaki nako te kaibuke n te ang.

¹⁶Ti buti ri rarikin te aba teuana ae arana Kerauta, [64] n iterana are e aki kare mai iai te ang, ao ti kuri n aki kona n irakea iai ien te boti.

¹⁷Ngke a tia n irakea ien te boti, ao a anai roobu ni m'anea rab'atan te kaibuke iai ni kabaea; a maku b'a a rawa ni koro n te kaora ae ab'ab'aki are Tureti, [65] ma ngaia are a tuka aia ie, [66] ao a ukaki nako.

¹⁸Ngke ti a bon taonaki n te buaka ae korakora, ao a moanna ngkanne n tetewe nako kanoan te kaibuke n te bong are i mwina;

¹⁹ao n te katenibong ao a tetewe nako b'ain nako te kaibuke n oini baiia.

²⁰Ngke e aki kakaoti taai, ao a aki kakaoti naba itoi i nanoni boong aika bati, ao ngke e aki kerikaki matoatoani karen te ang, ao ai bon akea ara kaantaninga teutana b'a ti na kamaiuaki.

²¹Ngke e a maan te aki-mamatam, ao e tei ngkanne B'auro i buakoia, ao e taku: Mm'aane, e riai ngke kam ongo i rou b'a ti na aki borau mai Kirete, ao e na aki reke iai te uru b'ai ma te kabuanib'ai ae aron aei.

²²I tuangngkami ngkai b'a kam na kabebetei nanomi: b'a e na bon aki bua maiun temanna i buakomi, ma ti te kaibuke ae na bua.

²³B'a e tei i rarikiu ngke e bong ana anera te Atua, are ana aomata naba ngai, ao are I tataromauria

²⁴ao e kaangai, “B'auro, tai maku, e riai b'a ko na tei i matani kautun te tautaeka n Rom; ao noria, i bukin ana akoi te Atua nako im, ao a kamaiuaki iai aomata ni kabaneia ake a borau ma ngkoe.”

²⁵Ma ngaia aei, mm'aane, kam na kabebetei nanomi: b'a I onimakina te Atua b'a e na boni koro bukin are e a tia n taekinaki nako iu.

²⁶Ma ae ti na boni koro n te abam'akoro teuana.

²⁷Ngke ai te katebwi ma aua ni bong, ngke e uouotaki ara kaibuke i nanoni marawan te Mereterenian, [67] ngke tao e a nukanibong, ao a taku i nanoia kaimoa b'a a kaania te aba teuana.

²⁸A taua iabutin taari n aia b'ai ni baire, ao a kunea iai b'a uabwi te nga nanona; ao ngke a nako riki teutana ao a manga taua riki iabutina, ao a noria b'a tengauni ma nima nga.

²⁹A maka koron te kaibuke i aon rakai, ma ngaia are a kab'aka aua te atinro mai bukin te kaibuke, ao a bareka rokon te ngaina.

³⁰Ao ngke a kakaaea angaia kaimoa b'a a na biri nako man te kaibuke, ao a kab'aka te boti i taari b'a aongkoa a na kab'akai atinro mai moan te kaibuke.

³¹Ma e taku B'auro nakon aia mataniwi te taanga ni buaka are tebubua kaaina, ao nakoia tautia, “Ngkana a aki tiku uaakai n te kaibuke, ao kam aki konaaki ni kamaiuaki.”

³²Ao tautia a korea ngkanne te robu are e bae iai te boti, ao a kabetinakoa te boti.

³³Ngke e a kani ngaina, ao e butiia kaain te kaibuke ni kabaneia B'auro b'a a na am'arake, ao e kaangai, “Ai te katengauni ma abong ngkai ae kam a tia iai ni kakantaninga, ao kam tuai n am'arake naba teutana.

³⁴Ma ngaia ae I butingkami b'a kam na am'arake, b'a ngaia maiumi; b'a bon akea temanna i buakomi ae e na bua maiuna.”

³⁵Ngke e a tia n atongi taeka aikai B'auro, ao e anaa teutana te am'arake ao e tataro ni katituaraoa te Atua i mataia ni kabaneia; e anaa ngkanne teutana mai iai, ao e kanna.

³⁶Ngke a bane n reke raun nanoia, ao a am'arake naba.

³⁷M'aitiia ara koraki ni kabaneia i aon te kaibuke bon uabubua itingauni ma onoman. [68]

³⁸Ngke a nuai, ao a kabebetea te kaibuke n tewea nako te uita [69] i tari.

³⁹Ngke e a ngaina, ao a aki kinaa te aba; ma a nora te m'anoku teuana ae iai bikena, ao a iango b'a a na kakoroa te kaibuke iai, ngkana a kona.

⁴⁰Ma ngaia are, a kab'arai mwin atinro ni katiku i tari, ao a kab'arai naba kabaeani bweena; ao a irakea iena ake mai moa nakon te ang, ao a ie rake.

⁴¹A roko n te tabo teuana ae a kaitibo tari iai, ao a kakoroa te kaibuke iai; e koro moana n aki kona ni kakam'akuri, ao e uruaki bukina ni korakoran naao.

⁴²E a tia aia iango tautia b'a a na kamateia buure b'a e kaawa n ua nako temanna i rouia, ao e reke inaomatana.

⁴³Ma iai nanon teuare te mataniwi n te taanga ni buaka are tebubua kaaina ni kani kamaiua B'auro, ma ngaia are e tuka aia iango tautia, ao e tua b'a a na ewe nako moa ake a kona n uaua, ao a na ua rake nakon te aba;

⁴⁴ao ake nikiraia, a na toka tem'angina i aon raai, ao tem'angina i aoni b'ain nako te kaibuke. Ao a bane ni kamaiuaki n te aro arei b'a a roko n te aba.