Read Te B'aib'ara I-Rom 11 Bible Online

I-Rom 11 - Te B'aib'ara bible

I-Rom 11

¹E kaangai ngkanne au titiraki, E kaaki taekaia ana botannaomata te Atua? E bon aki! Bon te Iteraera naba ngai, ae kanoan Aberaam, ae kaain te baronga are Beniamin.

²E aki kaaki taekaia ana botannaomata te Atua ake E a tia n rineia ma ngkoa. Kam aki ata rongorongon Eria n te B'aib'ara, ngke e kabuakakaia Iteraera nakon te Atua? B'a e kaangai:

³“Te UEA, a kamateia am burabeti, ao a urui am baonikarea; ao ti ngai te nikira, ao a ukoukorai b'a a na anaa maiu.”

⁴Ma e kangaa ana taeka te Atua nakoina? E kaangai, “Iai au aomata aika 7,000 aika I katikuia, aika a aki taromauria B'aara.”

⁵Ao ai arona naba, b'a i bukin ana akoi te Atua ao a tiku ngkai nikiraia ake E a tia n rineia;

⁶ao ngkana tiaki i bukin ana akoi ae e riki iai aei, ma i bukin te b'ai are a karaoia ana aomata, ao nanona ngkanne b'a akea koauan ana akoi.

⁷Ao tera ngkanne ae riki? B'a te baere a ukoukoria Iteraera e aki reke i rouia ni kabaneia, ma ti irouia ake a rineaki; ao nikiraia a kamatoatoaki nanoia;

⁸n ai aron are koreaki ni kaangai: “E kananobabaia te Atua n te aro are mataia aki noraba, ao taningaia a teimatoa ni bono.”

⁹E taku Tawita, “Ke e riki aia botaki b'a te b'ai ni kam'am'ane, ma te b'ai ni kab'akab'aka; Ke e riki b'a booni mwin aia m'akuri.

¹⁰Ke a karooaki mataia! B'a a aonga n aki noraba. Ao kab'aouai nukaia i aani uotaia n taai nako b'a a na aki kona ni mwemwekaki.”

¹¹E kaangai ngkanne au titiraki, A b'aka n aki kona ni manga teirake ngke a reke waeia ao a tata nako? A bon aki! Ma e roko te maiu irouia ake tiaki I-Iutaia ngke a bure Iteraera, b'a a aonga ni kabakantangaki.

¹²Ma ngkana a bati n reke kab'aiaia aomata nako i aonnaba i bukin aia bure Iteraera, ao a bati n reke kab'aiaia aomata aika tiaki I-Iutaia i bukin aroia Iteraera n tibanako ma nanon te Atua, ao ai batiraa riki te kab'aia ae e na reke i rouia ngkana a bane kaain te botannaomata ae Iteraera n rin i nanon te kamaiuaki!

¹³I taetae nakoimi ngkami aika tiaki I-Iutaia; b'a ngkai aia tia tuatua aomata aika tiaki I-Iutaia ngai, ao N na taua nakoau aei b'a te b'ai ae rangi ni kakawaki i rou.

¹⁴B'a a aonga ni bakantang kaain au botannaomata; ao n te aro anne a kona iai ni kamaiuaki tabem'aang i buakoia iroun te Atua n au m'akuri.

¹⁵B'a ngkana e riki kaakan taekaia b'a aroia aomata nako n riki b'a raoraon te Atua, ao tera ngkanne aroia ngkana a manga butim'aeaki? Kaanga ai aroia maate ake a manga uti.

¹⁶Ngkana e katabuaki m'akoron te kariki b'a ana b'ai te Atua, ao are nikirana bon ana b'ai naba; ao ngkana e katabuaki wakaan te kai b'a ana b'ai te Atua, ao bon ana b'ai naba m'angana.

¹⁷Ngkami aika tiaki I-Iutaia, ti te bo ngkami ma m'aangan te kai ae te oriwa are riki n aki akaaka, aika m'aangana ake a katomaaki ni kamaiuaki ma m'aangan te oriwa are unikaki raoi, aika m'aangana ake a tia n oteaki. Kam a tia n onei mwini m'aanga tabeua ake a tia ni koreaki mai iai; ao i bukin aromi aei, ao kam a b'aina te kab'aia are e reke man rikimi b'a m'aangan te kai are unikaki raoi.

¹⁸Ma ngaia ae tai taku b'a kam raoiroi riki nakoni m'anga ake a koreaki ni kaakaki. Ma ngkana e reke aei iroumi, ao uringnga b'a tiaki ngkami aika kam kamaiua te wakaa, b'a te wakaa ae kamaiungkami.

¹⁹Ane ko na kaangai ngkanne, “A oteaki m'angana b'a ti aonga n onei mwiia.”

²⁰E koaua ane ko taku; a oteaki i bukin aia aki-onimaki, ma ngkoe, ko mena ni nem ane ko mena iai i bukin am onimaki. Ma ngaia ae tai b'aina te kainikatonga, ma ko na b'aina te mamaku.

²¹B'a ngke E kaaki m'aanga ake boni m'aanga ni koaua te Atua, ao ko taku b'a E na aki kona ni karaoia naba nako im?

²²Ko nora ngkanne aron ana ataataiaomata te Atua ao arona ni matoatoa: E matoatoa nakoia ake a tia ni b'aka, ma E ataataiaomata nakoimi, ngkana kam teimatoa n onimakina arona nakoimi. Ma ngkana kam aki, ao ane kam na koreaki ni kaakaki.

²³Ao te koraki ake m'aanga ake a oteaki ni kaakaki, ngkana a toki man aroia n aki onimaki, ao a kona ni manga kaokaki nakon aroia are rimoa; b'a E kona te Atua ni karaoia.

²⁴B'a ngke ko koreaki man te oriwa are riki n aki akaaka, ao ko katomaaki nakon te oriwa are unikaki raoi, e ngae ngke bon tiaki m'angana ngkoe, ao ai bebete ra riki aroia ni katomaaki m'aanga ake boni m'angan te oriwa are unikaki raoi, ngkana a kaokaki nakon aroia ake rimoa?

²⁵B'a I aki tangiringkami, taari, b'a kam na aki ata te b'ai ae raba aei, b'a kam kaawa ni bakanrabakau iai: b'a iai tem'angina i buakoia Iteraera aika a matoatoa nanoia n rawa n onimaki, ao a na tiku n aroia aei ni karokoa ae e koro m'aitiia aomata aika tiaki I-Iutaia n nakon te Atua.

²⁶B'a n te aro aei, ao a na kamaiuaki kaain te botannaomata ae Iteraera ni kabaneia, n ai aron are koreaki ni kaangai: “Ane E na nako mai Tion te Tia Kamaiu E na kaaki te buakaka mairouia ana kariki Iakob'a.

²⁷ Aio au boraraoi ma ngaiia, ngkana I kab'ara aia bure.”

²⁸I bukina ngke a rawa I-Iutaia ni butim'aea taekan te euangkerio, ao a riki b'a ana kairiribai te Atua i bukimi, ngkami aika tiaki I-Iutaia. Ma ngkai a teimatoa aroia b'a aomata ngaiia aika rineaki iroun te Atua, ao E bon tangiriia i bukiia aia bakatibu ake a kakannato.

²⁹B'a E aki kona te Atua ni kaoki b'aai ake E a tia n anga, ao E aki kona ni m'aninga taekaia aomata ake E a tia n rineia.

³⁰B'a kam a tia ngkami aika tiaki I-Iutaia n aki ongeaba nakon te Atua ngkoa; ma ngkai, kam a nanoangaki i bukin aia aki-ongeaba I-Iutaia.

³¹Ao ai arona naba nakoia I-Iutaia: b'a a aki ongeaba ngkai, ma ane a na nanoangaki naba n ai aromi.

³²B'a E a tia te Atua ni kabaeia aomata nako i aan te aro n aki-ongeaba, b'a E aonga ni kaota ana nanoanga nakoia ni kabaneia.

³³Ai batiraa kaub'ain te Atua, ao ai nanora rabakauna ma ana atatai! Ai kangaanga ra ataakin ana moti, ao ai kangaanga ra kuneakin arona!

³⁴N aron are koreaki ni kangai: “B'a antai ae ata ana iango te UEA? Ao antai ae anganna taeka ni buobuoki?

³⁵Antai ae anganna te b'ai teuana b'a E aonga ni manga kaoka nakoina boona?”

³⁶B'a mairoun te Atua b'aai ni kabane; a bane ni karikaki i bukina, ao a na bane ni manga oki nakoina. Ana b'ai te neboaki n aki toki. Amen.