Read Te B'aib'ara I-Rom 15 Bible Online

I-Rom 15 - Te B'aib'ara bible

I-Rom 15

¹E riai iroura ngaira aika a korakora ara onimaki b'a ti na taotaon nanora nakoia aika a mamara aia onimaki, ao ti na aki iri oin nanora ni karaoa are ti tangiria.

²Ti na bane n tatabemaniira nako ni kakukureia raora ni baika na bongana i bukiia, b'a a aonga ni buokaki aia onimaki ni kakorakoraki.

³ B'a E aki kakukureia i bon i rouna Kristo; n ai aron are koreaki ni kaangai, “A b'akarai aia taeka n iowawa ake a taetae n iowawa nako im.”

⁴B'a b'aai ni kabane ake a koreaki ngkoa a koreaki i bukin reireiara, b'a e aonga n reke iroura te kaantaninga n taekan te taotaonaki n nano ma te kaunga nano n te B'aib'ara.

⁵Ao te Atua are e riki mai Rouna taotaonan te nano ma kabebetean te nano, E na anganingkami te nano ni bonnano are e reke ni katotongan aroni Kristo Iesu,

⁶b'a e aonga n ae kam neboa te Atua are Taman ara UEA are Iesu Kristo n te nano ae ti teuana ao n te b'anaa ae ti teuana.

⁷Ma ngaia ae kam na i m'anem'ane n i akoakoi, n ai aron naba Kristo ngke E m'aneira n akoira, b'a E aonga n neboaki iai te Atua.

⁸I tuangngkami b'a E roko Kristo b'a te tia buokiia I-Iutaia, ni kaotia nakoia b'a E a tia ni kakaonimaki te Atua ni kakoroa bukin ana taeka n akoi ake E taekin nakoia aia bakatibu ake a kakannato;

⁹ao b'a a aonga n neboa naba te Atua aomata aika tiaki I-Iutaia i bukin arona n nanoanga nakoia, n ai aron are koreaki ni kaangai: “Ma ngaia ae N na karaoiroiko i buakoia Tientaire Ao N na anenea aram.”

¹⁰Ao aio naba: “Kim'areirei, ngkami aika Tientaire, ma ana aomata te Atua!”

¹¹Ao manga aio naba: “Kam na karaoiroa te UEA, ngkami aika Tientaire; Ke a kamoamoa natanaomata ni kabaneia!”

¹²Ao e taku Itaia, “Ane e na kaoti temanna man ana utu Iete; E na taua taekaia botannaomata aika Tientaire, ao ane a na kaantaningaia.”

¹³Ao te Atua are e riki mai Rouna te kaantaninga, E na kaon nanomi n te kim'areirei ni kabanea ma te rau i bukina ngkai kam onimakinna, b'a e aonga n teimatoa ami kaantaninga ni m'aakan te Tamnei are Raoiroi.

¹⁴Tariu, I aki nanokokoraki iroumi b'a a rangi n raoiroi aromi, ao kam rangi n atai baika kam riai ni karaoi, ao kam kona n i reirei iroumi.

¹⁵Ma n te reta aei ao I a tia n ninikoria n taekini b'aai tabeua aika I a tia ni kauringngkami iai. I ninikoria n taekin i bukina b'a E a tia te Atua n ana akoi ni karikai

¹⁶b'a ana tia m'akuri Iesu Kristo ngai i bukiia aomata aika tiaki I-Iutaia. I m'akuri b'a ai aron te ibonga ngai n tataekina ana euangkerio te Atua, b'a a aonga n riki aomata aika tiaki I-Iutaia b'a ai aroni karea aika E na kukurei te Atua i rouia, aika a tia ni katabuaki i bukina iroun te Tamnei are Raoiroi.

¹⁷Ma ngaia ae i bukin arou n reitaki ma Iesu Kristo, ao e riai b'a N na kamoamoaai n au m'akuri i bukin te Atua.

¹⁸B'a N na ninikoria n taekina te baere E a tia ni karaoia Kristo i rou n au taeka ma au m'akuri i bukini kairaia aomata aika tiaki I-Iutaia, b'a a aonga n ongeaba nakon te Atua.

¹⁹Ao N na bon ninikoria naba n taekina aroni Kristo ni karaoani kanikina ma m'akuri aika kamimii ni m'aakan te Tamnei are Raoiroi. Ma ngaia are, ni m'anangau nakon taabo nako ake I a tia n roko iai, mai Ierutarem ni karokoa aonon Iruriko, ao I a tia n tataekina euangkerioni Kristo.

²⁰I kekeiaki n tataekina te euangkerio tiaki n taabo ike e a tia n roko iai taekani Kristo, b'a N na aki reita nako te m'akuri are e a tia ni moanaki i m'aiu iroun temanna.

²¹N ai aron are koreaki ni kaangai: “A na noria ake a tuai n tuangaki taekana, Ao a na atatai ake a tuai n ongo.”

²²Ao bon aei bukin are e aki kona n rereke iai au tai n roko iroumi.

²³Akea ngkai au m'akuri n taabo aikai, ao I a kaman tangiria i nanon ririki aika bati b'a N na kawaringkami,

²⁴Ngkana I m'ananga nako Tibein; ao I kaantaningaia b'a N na noringkami i aoni kawaiu n au tai ni m'ananga, ao ni bakaborauaki nako iai iroumi i mwin tiau n nora aroni kakukurein te mena i buakomi i nanon te tai ae kimototo.

²⁵N te tai aei, ao N na nako Ierutarem n nikiri b'aai i bukini buokaia ana aomata te Atua ikekei.

²⁶B'a a kukurei nanoia I-M'aketonia ma I-Akaia n anga b'aai n tituaraoi i bukiia ake a aki kaub'ai i buakoia ana aomata te Atua ake a mena i Ierutarem.

²⁷Boni ngaiia aika kukurei ni karaoa aei. Ma a bon riai ni buokiia ake a aki kaub'ai: b'a ngkai a buokanib'ai I-Iutaia ma aomata aika tiaki I-Iutaia ni baika raraoi mairoun te Atua i bukin tamneia,[17] ao bon te b'ai ae riai irouia Kristian aika tiaki I-Iutaia b'a a na buokiia Kristian aika I-Iutaia, n anganiia baika a kainanoi i bukini maiuia.

²⁸Ma ngaia aei, ngkana I a tia ni karaoa aei, ma n anganiia naba rab'atan te m'aiti ni m'ane are e a tia ni bobotaki i bukiia, ao N na karoko iroumi i aoni kawaiu nako Tibein.

²⁹Ao I ataia b'a ngkana I roko iroumi, ao N na roko ma te kab'aia ae moan te bati mairouni Kristo.

³⁰I bubutingkami, taari, i bukin ara UEA are Iesu Kristo ao i bukin te tangira are mairoun te Tamnei, b'a kam na kakorakoraingkami ma ngai n tataro nakon te Atua i buku,

³¹b'a N na kamaiuaki mairouia ake a rawa n onimaki i Iutaia, ao a na kukurei n au m'akuri ana aomata te Atua ake a mena i Ierutarem.

³²Ngkana I tia ni karaoa aei, ao N na nakoimi ma te kukurei, ngkana nanon te Atua, ao e na rangi n nako raoi arou n tiku ni motirawa i buakomi.

³³E na mena iroumi ni kabaneingkami te Atua are mai Rouna te raoi. Amen.