Read Te B'aib'ara 1.I-Korinto 11 Bible Online

1.I-Korinto 11 - Te B'aib'ara bible

1.I-Korinto 11

¹Kakairi i rou, n arou ngkai I kakairi iroun Iesu.

²I kamoamoaingkami, ngkai kam ururing baike I karaoi ao I reireiningkami iai, ao ngkai kam iri nanon taeka n reirei ake I a tia n anganingkami.

³Ma I tangiringkami b'a kam na ataia b'a atun te mm'aane boni Kristo, ao atun te aine bon te mm'aane, ao atuuni Kristo bon te Atua.

⁴Te mm'aane ae tataro ke ae taetae ni burabeti, n rabuna atuna, ao e kamatauningaa atuna.

⁵Ao te aine ae tataro ke ae taetae ni burabeti, n aki rabuna atuna, ao e kamatauningaa atuna; bon akea okorona ma te aine are e a tia ni korobuatauaki.

⁶B'a ngkana e aki rabunaki atun te aine, ao ke e koreaki irana; ma ngkana te b'ai ni kamamaa nakon te aine korean irana ma korobuatauana, ao ke e rabunaki atuna.

⁷B'a e bon aki riai n rabunaki atun te mm'aane, ngkai katotongan ao mimitongin[27] te Atua; ma te aine boni mimitongin[28] te mm'aane.

⁸B'a e aki riki te mm'aane mairoun te aine, ma e riki te aine mairoun te mm'aane;

⁹ao e aki karikaki te mm'aane i bukin te aine, ma e karikaki te aine i bukin te mm'aane.

¹⁰I bukin aei, ao i bukiia naba anera, ao e riai iroun te aine b'a e na memena kanikinaean tauan arona i aon atuna.

¹¹E boni ngae n anne, ma n te maiu n i raorao i nanon te Uea, ao e bon riai iroun te mm'aane b'a e na iai te aine i rarikina, ao iroun te aine b'a e na iai te mm'aane i rarikina.

¹²B'a ngkae e riki te aine mairoun te mm'aane, ao ai aron naba te mm'aane: e riki mairoun te aine, ma n te aro ni bungiaki; ao a bane b'aai n riki mairoun te Atua.

¹³Kam na karekei ami baire i bon i roumi: e tau te aine n tataro nakon te Atua, n aki rabunaki atuna?

¹⁴A aki reireiningkami aroni b'aai aika karikaki, b'a e aki toronaomata te mm'aane ngkana e ananau iran atuna?

¹⁵ma ngkana e ananau irannatun te aine, ao boni b'aini kamoamoakina; b'a e anganaki iran atuna b'a b'ain rabunan atuna.

¹⁶Ma ngkana iai ane kani kauntaeka taekan te baei, ao akea riki ae I kona n taekinna, b'a ti aei: b'a akea riki te katei teuana ae ti ataia ke a ataia ana ekaretia nako te Atua.

¹⁷Man au taeka aikai, ao bon akea iai kamoamoakimi i rou, i bukina b'a aromi ni bobotaki e a kariki riki baika bubuaka nako imi nakoni baika raraoi.

¹⁸B'a aio moa, ngkana kam botaki n ekaretia.[29] ao I ongo b'a e bwenaua ami botaki nakoni koraki n i-kakaiwi aika kakaokoro; ao I kakoaua te rongorongo anne teutana.

¹⁹B'a a bon riai n iai taiani bwenaua n ami botaki, b'a a aonga ni kinaki iai te koraki aika bon taan onimaki ni koaua i buakomi.

²⁰Ma ngaia aei, ngkana kam botaki, ao bon tiaki ana Toa te UEA are kam kanna.

²¹B'a ngkana kam am'arake, ao e waki n am'arake i bon i rouna te aomata n aki tataninga; ao e baki temanna, ao e manging temanna.

²²B'a akea ami auti aika kam kona n am'arake ma ni moi iai? Ke kam kakeaa bonganan ana ekaretia te Atua, ma ni kamamaaia te koraki akana akea aia b'ai? Tera ae N na atongnga nako imi? N na kamoamoaingkami? I bon aki kamoamoaingkami n anne.

²³B'a I karekea mairoun te UEA te baere I a tia naba n anganingkami: b'a E anaa te berena te UEA are Iesu n te bong are E kam'aneaki iai;

²⁴ao ngke E a tia n tataro ni katituaraoi, ao E urua, ao E kangai, “Rab'atau aei[30] i bukimi. Kam na karaoa aei b'a kanuringau.”

²⁵Ngke a a tia n am'arake, ao E anaa te m'angko n aron naba are E karaoia nakon te berena, ao E kangai, “Te m'angko aei, te boraraoi ae boou i nanon raraau. Kam na karaoa aei, n taai ake kam moi iai, b'a kanuringau.”

²⁶B'a n taai ake kam kana iai te berena aei, ma ni moi n te m'angko aei, ao kam kaotiota iai maten te UEA, ni karokoa ae E roko.[31]

²⁷Ma ngaia aei, b'a ane kana te berena, ke e moi n ana m'angko te UEA n te aro ae aki riai, ao e bure iai nakon rab'atan te UEA ma raraana.

²⁸Ke e tirotiroa moa nanona te aomata, ao i mwina e na kana te berena, ma ni moi n te m'angko.

²⁹B'a ane am'arake ma ni moi n aki ataia b'a tera rab'atan te UEA, ao e na karekea motikan taekana ae na kabuakakaki iai.

³⁰Ao anne bukin ae a bati iai i buakomi aika mamara ma aika aki konab'ai, ao a tia ni mate tabem'aang.

³¹Ma ngkana ti neneri raoi aroarora, ao akea bairean taekara.

³²Ma ngkana a baireaki taekara iroun te UEA, ao E bon reireiniira iai, b'a ti aonga n aki uaia ni kabuakakaki ma te aonnaba ae ekaanako nanon te Atua.

³³Ma ngaia aei, taari, ngkana kam bootaki ni karaoa ana Toa te UEA, ao kam na tataningaia raomi.

³⁴Ngkana iai ae baki i buakomi, ao a riai n am'arake n aia auti, b'a kam aonga n aki motikaki taekami iroun te Atua ngkana kam bootaki. Ao i bukin b'aai riki ake tabeua, I a bon kaeti ngkana I roko ikanne.